Wuu fwù kan Kile á u cɛ̀nmpe kurugo
138
Dawuda mɛɛni là.
Mii Kileŋi,
mii à fwù kan mu á ná na zòmbilini puni i,
mii sí mɛɛ cêe si mu kêe kilebii shwɔhɔlʼe.
2 Mii sí niŋkure sín si yyaha kan mu pèente bage niɲcɛnŋke kàmpanŋke na,
si mu mɛge kêe mu cɛ̀nmpe ná mu ɲwɔmɛfente kurugo,
ɲaha kurugo yɛ,
mu à ma mɛge ná ma jwumpe pyi pʼà fànha tò yaayi puni na.
3 Canŋke mii à mu yyere ke,
mu à mii ɲwɔ shwɔ,
mu à mii zòŋi tàra maa fànha le mii i.
4 Kafooŋi Kile,
ɲìŋke saanbii ká mu jwumpe lógo tèni ndemu i ke,
pi puni sí fwù kan mu á.
5 Pi sí mɛɛ cêe si Kafooŋi kapyiiŋkii kyaa jwo,
ɲaha kurugo yɛ,
Kafooŋi sìnampʼà sàa pêe.
6 Kafooŋi mɛnʼà sìi fo nìɲyiŋi na ke,
shinŋi u à uye tîrige ke,
u ɲyii ɲyɛ urufoo na,
u mú sʼà yàmpeente feebii cè mà u yaha kuru tatɔɔnge e.
7 Mii mɛɛ ká sìi yyefuge nimbwɔhʼe,
mu sí mii munaani shwɔ,
mu sí ma cyɛge tɛ̀gɛ mii wwû mii zàmpɛɛnbii cye e pi lùyirini yyaha na,
si mii shwɔ ná ma kàniŋɛ cyɛge e.
8 Kafooŋi,
karigii puni mu à sìi na mpyi mii á ke,
mu sí cyire fûnŋɔ.
Kafooŋi,
mu cɛ̀nmpe sì n-sìi n-kwɔ̀ mɛ,
ma hà kàntugo wà ma cyɛge kapyiinʼá mɛ.