Kafooŋi à Siyɔn cwɔɔnrʼa pyi u tatɛɛnge
132
Zheruzalɛmu ŋkàreŋi mɛɛni là.
Kafooŋi Kile,
funŋɔ cwo Dawuda
ná u kyaage karigii na.
2 U à kâa Kafooŋi á,
maa ɲwɔ fáa Yakuba u sífente puni fooŋʼá na:
3 «Mii sàha sì n-jyè na vàanŋke bage e mɛ,
mii sàha sì n-sínni na yasinniŋke na mɛ,
4 mii sàha sì ŋɔɔmɔ yaha pu jyè na ɲyiigilʼe,
si na ɲyikwɔɔre tò mɛ,
5 fo mii aha tatɛɛngɛ ta Kafooŋi mɛɛ na,
maa baga ta Yakuba u Síŋi puni fooŋi mɛɛ na.»
6 Wuu à lógo na tunmbyaare mbwùuni na ɲyɛ Efirata e,
wuu à li ta Yaari kɛrɛyi i.
7 Wuu jyè Kafooŋi bage e,
wuu niŋkure sín u tooyi yatahage fère e.
8 Kafooŋi,
yîri,
ma a ma ma taŋɔŋke e,
ta ma ná ma fànhe mbwùuni i.
9 Mu sáragawwuubii pi ntìiŋi vàanntinŋke le piye na,
mpii pi ɲyɛ mu pêeveebii ke,
pire pi a funntanga kwuuyi wàa.
10 Mu bilinaŋi Dawuda kurugo,
maha ɲcyé ma saanŋi niɲcwɔnrɔŋi na mɛ.
11 Kàage Kafooŋi à kâa Dawuda á ke,
kuru sì ŋkɛ̂ɛnŋɛ mɛ.
U à jwo:
«Mii sí mu tùluge shinŋi wà pyi saanwa mu cyaga.
12 Mu pùnampyire ká a mii tunmbyaare kurigii ɲaare,
ná mii a tùnnture ntemu kan tʼá ke,
ti tùluge mú sí n-tɛ̀ɛn
mu saanre yatɛɛnŋke e tèrigii puni i.»
13 Ɔɔn,
Kafooŋi à Siyɔn cwɔɔnrɔ,
u la ɲyɛ si u pyi u tatɛɛnge.
14 U à jwo:
«Ŋke kànhe ku ɲyɛ mii taŋɔŋke fo tèekwombaa,
kʼà pyi mii ɲyii cyage.
15 Mii sí ɲwɔ Siyɔn na si u bwɔ̀nhigii ɲyî sùmapyaŋi na,
sí u funŋɔ fòŋɔfeebii pyi pi tìn ɲjyìŋi i.
16 Mii sí zhwoŋi vàanɲyi le u sáragawwuubii yaciyʼe,
u pèeveebii sí funntanga katanra cyàha.
17 Mii sí Dawuda tùluge shinŋi wà pyi saanbwɔhɔ wani,
mii sí bɛ̀ɛnmɛ yaaga bégele na saanŋi niɲcwɔnrɔŋʼá.
18 Mii sí silege le u zàmpɛɛnbii yaciyi i,
ŋka saanre ɲùntoŋke sí raa ɲî u ɲùŋke na.»