Kafooŋi kanni u ɲyɛ yaayi puni kanvooŋi
127
Zheruzalɛmu ŋkàreŋi mɛɛni là.
Solomani mɛɛni là.
Kafooŋi Kile ká mpyi u ɲyɛ a bage ŋkemu yyéeŋɛ mɛ,
bafanrabii maha báare tawagʼe.
Kafooŋi ká mpyi u ɲyɛ na kànhe ŋkemu kàanmucaa mɛ,
ku sanɲcwɔnsigeŋi maha shùun ɲyii na tawage e.
2 Ɲyɛ,
yii na wyɛɛge na yîri maa mɔni ɲyii na,
maa yiye kanre yii ɲwɔlyiŋi ɲcyaŋi na,
yire puni na ɲyɛ tawagʼe.
Kafooŋi maha u tàanɲɛɛbii karigii cwɔɔnre maha pi yaha ŋɔɔmpe na.
3 Nàŋkwopyire na ɲyɛ yaaga,
ŋkemu kʼà kan Kafooŋi cye kurugo ke.
Pyìsini na ɲyɛ Kile màkanga yacenʼá.
4 Nɔ̀ŋi maha nàŋkwoobii mpiimu ta u nàjyiige tèni i ke,
pire maha mpyi u á bà tàanpyaa maha mpyi kàshikwɔnŋi cye e mɛ.
5 Nɔ̀ŋi kàshɛge kʼà ɲî cyire na ke,
uru wuunʼà ɲwɔ.
U ná u zàmpɛɛnbii ká piye ta kànhe tajyiɲwɔge na,
u sì n-sílege mɛ.