Kile u maha mpàa u shiinbii na
125
Zheruzalɛmu ŋkàreŋi mɛɛni là.
Mpii pi à pi sɔ̀nŋɔre taha Kafooŋi Kile na ke,
pire na ɲyɛ mu à jwo Siyɔn ɲaŋke.
Yafyin sì n-jà ku pyi ku cúnŋɔ mɛ,
ku sí n-kwôro fo tèekwombaa.
2 Bà ɲaɲyʼà Zheruzalɛmu kwûulo mɛ,
amuni Kafooŋi à u shiinbii kwûulo,
mà lwɔ́ numɛ na fo tèekwombaa.
3 Ntìimbaaŋi fànhafente sì n-jà Kile wuubii kìni yyaha cû ŋkwôro mɛ.
Lire baare e,
ntìimbaaŋi lage mú sí n-jyè pire e.
4 Kafooŋi,
ta kacɛnŋii pyi shincɛnmpilʼá,
pire zòmpyaagii cyi à tíi ke.
5 Ŋka mpii pi ɲyɛ na ɲaare kunahayi i ke,
Kafooŋi,
pire ná ntìimbaaŋi pyifeebii wà siɲcyan.
Yyeɲiŋke ku pyi Izirayɛli á.