Kile sàliyaŋʼà sàa ɲwɔ
119
Mpii pi ɲyɛ na ɲaare ná zòvyinre e,
maa ɲaare na tàanna ná Kafooŋi Kile sàliyaŋi i ke,
pire wuunʼà ɲwɔ.
2 Mpii pi ɲyɛ ɲaare na ntaanni ná u kàlaŋi i,
maa u caa ná pi zòmpyaagii puni i ke,
pire wuunʼà ɲwɔ.
3 Pire ɲyɛ na kapyimbaala pyi mɛ,
ŋka Kafooŋi kurigii pi maha ɲaare.
4 Kafooŋi,
mu à ma yyeshempe jwo wuu á,
wuu raa ɲaare wuu a ntàaani ná pʼe ná sèlʼe.
5 Aa,
mii à yaa mii i na toroŋkanni ɲwɔ,
bà mii si mpyi sʼa mu ɲyii wuuni pyi mɛ.
6 Mii aha a mu toŋi kurigii ɲaare,
mii sì n-sìi n-sílige mɛ.
7 Mii aha mu ntìiŋi kakwɔnɲjyahigii lógo,
mii sí fwù kan mu á ná zòvyinre e.
8 Mii sí raa mu ɲyii wuuni pyi,
ma hà sìi ɲcyé na na mɛ.
9 Di nàɲjyiiwe sí n-jà u toroŋkanni ɲwɔ ɲjwo yɛ?
Fo u aha a ɲaare na ntàanni ná mu jwumpe e.
10 Mii na mu caa ná na zòmbilini puni i,
ma hà na yaha si n-wâa n-fworo ma toŋi kurigilʼe mɛ.
11 Mii à mu jwumpe yaha na zòmbilini na,
mii àha ŋkwɔ̀ kapii pyi mu na mɛ.
12 Mii fwù ɲyɛ mu na Kafooŋi,
na taanna ma ɲyii wuuni na.
13 Mii sí mu ɲwɔge kakwɔnɲjyahigii
puni kyaa jwo.
14 Na mu kurigii ɲaare,
lire maha mii funŋke táan mu à jwo nàfubwɔhɔ mii à ta.
15 Mii sí n-sɔ̂nŋɔ mu yyeshempe na,
si na yyahe le mu kuzhyagilʼe.
16 Mu ɲyii wuuni mpyiŋʼà sàa táan mii á,
mii sì funŋɔ wwɔ̀ mu jwumpe na mɛ.
17 Ɲwɔ ma báarapyiŋi na,
bà mii si mpyi si shì ta,
sʼa mu jwumpe kurigii ɲaare mɛ.
18 Na ɲyiigii múgo,
bà mii si mpyi sʼa mu sàliyaŋi kabwɔhigii ɲaa mɛ.
19 Mii na ɲyɛ nàmpɔnŋɔ naha ɲìŋke na,
ma hà ma toŋi kurigii ŋwɔhɔ na na mɛ.
20 Mii zòmbilini maha mii súuge tèrigii puni i,
mu kakwɔnɲjyahigii lage na.
21 Yàmpeente feebii pi à láŋa maa laaga tɔɔn mu toŋi kurigii ɲaaraŋi na ke,
mu maha pire fùguro.
22 Na shwɔ fahante ná kafwɔhɔre na,
ɲaha kurugo yɛ,
mii na mu kurigii ɲaare.
23 Ɲùŋufeebii mɛɛ ká vùnŋɔ pwɔ mii na,
mu bilinaŋi na sɔ̂nŋi mu ɲyii wuuni na.
24 Mu kurigii ɲaaraŋʼà sàa táan mii á,
cyire cyi maha mii yɛrɛge.
25 Mii niziniŋi u ŋge ɲìŋke na,
shì kan na á sahaŋki ma tàanna ná ma jwumpe e.
26 Mii à na karigii jwo mu á,
ka mu u mii ɲwɔ shwɔ,
na taanna ma ɲyii wuuni na.
27 Ma kurigii yyeshempe yyaha jwo na á,
lire e,
mii sí raa sɔ̂nŋi mu kabwɔhigii na.
28 Nàvunŋke maha mii pyi mii i mɛɛ súu,
na yatanɲyi waha ma tàanna ná ma jwumpe e.
29 Kafinaare kuni laaga tɔɔn na na,
ɲwɔ na na,
ma a na yaha si ma sàliyaŋi yyaha cè.
30 Ɲwɔmɛfente kuni mii a cwɔɔnrɔ,
mii sí raa ɲaare sʼa ntàanni ná mu kakwɔnɲyahigilʼe.
31 Mii à naye pwɔ mu kurigii ɲaraŋi na,
Kafooŋi,
ma hà na yaha si n-sílige mɛ.
32 Mii la na ɲyɛ sʼa fî mu toŋi kurigilʼe,
ɲaha kurugo yɛ,
mu à mii funŋke múgo.
33 Kafooŋi,
na taanna ma ɲyii wuuni na,
mii sí li pyi si nɔ tɛgɛni na.
34 Na yaha si karii yyaha cè,
bà mii si mpyi si ŋkwôro mu sàliyaŋi ɲuŋʼi,
sʼa u kurigii ɲaare ná na zòmbili puni i mɛ.
35 Na yyaha cû ma toŋi kurigii ɲaaraŋi na,
ɲaha kurugo yɛ,
cyire e mii funntange maha fwore.
36 Ma kurigii ɲaaraŋi lage yaha ku pyi na zòmbilini i,
mà tòro nàfuuŋi lage na.
37 Na ɲyiigii laaga tɔɔn ɲùŋubaa yaayi ŋgyìiŋi na,
ma a shì kan na á,
ma tàanna ná ma jwumpe e.
38 Ma ɲwɔmɛɛni funŋɔ ma báarapyiŋʼá,
mu à lire ndemu lwɔ́ ma yyahafyagare feebilʼá ke.
39 Silige karigii laaga tɔɔn na na,
mii na fyáge cyi yyaha na,
mu kakwɔnɲyahigilʼà ɲwɔ.
40 Wíi,
mu yyeshempe lagʼà sìi mii na,
shì kan na á ma ntìiŋi kurugo.
41 Kafooŋi,
ma cɛ̀nmpe yaha pu nɔ na na,
na shwɔ bà mu à li ɲwɔmɛɛni lwɔ́ mɛ.
42 Lire ká mpyi,
mii sí n-jà na fwɔ́rɔfeebii ɲwɔ shwɔ,
ɲaha kurugo yɛ,
mii à dá mu jwumpe na.
43 Ma hà n-sìi sèeŋi jwumpe yaha pu kwɔ̀ na ɲwɔge e mɛ,
ɲaha kurugo yɛ,
mii na sɔ̂nŋi mu kakwɔnɲjyahigii na.
44 Mii sí raa mu sàliyaŋi kurigii ɲaare canŋa maha canŋa,
tèrigii puni i,
fo tèekwombaa.
45 Mii sí raa ɲaare na ɲyii ɲaaraŋkanna na,
ɲaha kurugo yɛ,
mii la ɲyɛ si ntaha mu yyeshempe ɲwɔhʼi.
46 Mii sí mu kurigii kyaa jwo saanbilʼá,
kuru silige bá sì mii ta mɛ.
47 Mu toŋi kurigii kyalʼà sàa táan mii á,
cyire na mii na ɲcáa.
48 Mii à na cyeyi yîrige mu toŋi kurigilʼá cyire ɲcyiimu kyaa lʼà táan mii á ke,
mii maha sɔ̂nŋi mu ɲyii wuuni na.
49 Jwumpe mu à jwo ma báarapyiŋʼá ke,
funŋɔ cwo puru na,
ɲaha kurugo yɛ,
puru na mii à na sɔ̀nŋɔre taha.
50 Nde li maha mii zòŋi taala mii yyefuge tèni i ke,
lire li ɲyɛ,
mu jwumpe maha shì kan mii á.
51 Yàmpeente feebilʼà mii fwɔ́hɔrɔ,
ŋka lire là ɲyɛ a mii yige mu sàliyaŋi kuni i mɛ.
52 Kafooŋi,
mii à sɔ̂nŋɔ mu tèni là kakwɔnɲjyahigii na,
lirʼà mii zòŋi taala.
53 Mii lùuni maha sàa yîri shinpiibii taan,
pire mpimu pi à cyé mu sàliyaŋi na ke.
54 Mà mii yaha nàmpɔnte e,
mu ɲyii wuuni li ɲyɛ mii mɛceeni ɲùŋke.
55 Kafooŋi,
numpilage e,
mii funŋke maha ɲcwo mu na,
maa mu sàliyaŋi kuni ɲaara.
56 Mii nàzhanŋi u ɲyɛ,
na ɲaare na ntàanni ná mu yyeshempe e.
57 Kafooŋi,
ɲjwo mii nàzhanŋi u ɲyɛ,
na mu jwumpe kurigii ɲaare.
58 Mii na mu ɲáare ná na zòmbilini puni i,
ɲwɔ na na ma tàanna ná ma ɲwɔmɛɛni i.
59 Mii à na toroŋkanni kàanmucya,
maa núru mu kurigilʼá.
60 Mii sì yi le shuunni i mɛ,
mii sí ntíi raa mu toŋi kurigii ɲaare.
61 Shinpiibii cwòŋʼà mii myígile,
ŋka,
mii funŋɔ ɲyɛ a wwɔ̀ mu sàliyaŋi na mɛ.
62 Numpililyɛge e,
mii maha yîri maa fwù kan mu á,
mu kakwɔnɲjyahigii nintíigii kurugo.
63 Mpii pi ɲyɛ na fyáge mu na,
maa ɲaare na ntàanni ná mu yyeshempe e ke,
mii na ɲyɛ pire puni cèvoo.
64 Kafooŋi,
ɲìŋkʼà ɲî mu cɛ̀nmpe na,
na taanna ma ɲyii wuuni na.
65 Kafooŋi,
mu à kacɛnŋii pyi ma báarapyiŋʼà,
bà mu mpyi a li ɲwɔmɛɛni lwɔ́ mɛ.
66 Na taanna yákilifente niɲcɛnnte ná ɲcèŋi na,
ɲaha kurugo yɛ,
mii à dá mu toŋi kurigii na.
67 Mà jwo yyefuge ku nɔ mii na ke,
mii mpyi maha wuruge,
ŋka numɛ,
mii à mu jwumpe cû a ɲwɔ.
68 Mu à ɲwɔ,
kacɛnŋkii mu maha mpyi,
na taanna ma ɲyii wuuni na.
69 Yàmpeente feebii pìlʼà finɛ mii na,
ŋka,
mii à yaha mu yyeshempe na,
ná na zòmbilini puni i.
70 Pire yákilibilʼà tò,
ŋka mii wi ke,
mu sàliyaŋi u à táan mii á.
71 Yyefugʼà nɔ mii na ke,
lirʼà mii tɛ̀gɛ,
bà mii si mpyi si mu ɲyii wuuni mpyiŋi taanna mɛ.
72 Mu à sàliyaŋi ŋgemu jwo ke,
urʼà pwɔ́rɔ mii á,
mà tòro sɛɛnŋi ná wyɛ́rɛfyinŋi tɔɔnɲwɔ kampwɔhii niɲyahagii na.
73 Mu cyeyi yʼà mii dá maa mii sûlu,
yákilifente kan na á,
bà mii si mpyi si mu toŋi kurigii yyaha cè mɛ.
74 Mu yyahafyagare feebii sí mii ɲya sí n-pyi funntange e,
mà li ɲùŋke pyi,
mii à na sɔ̀nŋɔre taha mu jwumpe na.
75 Kafooŋi,
mii à li cè na mu kakwɔnɲyahigilʼà tíi,
mu sʼà yyefuge nɔ mii na mà tàanna ná ma ɲwɔmɛfente e.
76 Mu cɛ̀nmpe pu mii zòŋi taala,
bà mu à li ɲwɔmɛɛni lwɔ́ ma báarapyiŋʼá mɛ.
77 Ma ɲùŋke pi ná mii i bà mii si mpyi si shì ta mɛ,
ɲaha kurugo yɛ,
mu sàliyaŋʼà táan mii á.
78 Yàmpeente feebii pi ɲyɛ na ɲcwu mii na tawage e ke,
pire yaha pi sílige,
mii wi ke,
mii na sɔ̂nŋi mu yyeshempe na.
79 Mu yyahafyagare feebii pi à mu kurigii cè ke,
pire pi núrʼa pa mii yyére.
80 Na zòmbilini puni yaha li jà lʼa ma ɲyii wuuni pyi,
lire ká mpyi,
mii sì n-sílige mɛ.
81 Mu zhwoŋi lagʼà sìi mii munaani na,
mii sɔ̀nŋɔrʼà taha mu jwumpe na.
82 Mii ɲyiigilʼà mu ɲwɔmɛɛni ɲyii cyán a kànha,
mii à jwo:
«Ɲaha tère e mu sí mii zòŋi taala yɛ?»
83 Mii à pyi mu à jwo sɛɛgɛ boro,
naŋgurugʼà ndemu wwɔ̀ ke,
ŋka mii funŋɔ ɲyɛ a wwɔ̀ mu ɲyii wuuni na mɛ.
84 Mu báarapyiŋi shìŋi canmpyaagii saanŋkii ɲyɛ jwuuli yɛ?
Ɲaha tère e mu sí yoge kwɔ̀n mii kyéregefeebii na yɛ?
85 Yàmpeente feebii na kacyewyige tùru mii yyaha na,
ɲaha kurugo yɛ,
pi ɲyɛ na sɔ̂nŋi mu sàliyaŋi na mɛ.
86 Mu toŋi kurigii puni na ɲyɛ sèe,
pi à yîri mii kurugo ɲùŋɔ bàa,
na tɛ̀gɛ.
87 Pòori kyaa,
pi mpyi na sí mii wuyi kwɔ̀ ɲìŋke na,
ŋka,
mii ɲyɛ a mu yyeshempe yaha mɛ.
88 Shì kan na á ma tàanna ná ma cɛ̀nmpe e,
lire ká mpyi,
mii sí raa mu kurigii ɲaare.
89 Kafooŋi,
mu jwumpe sí n-kwôro fo tèekwombaa,
pʼà tígilʼà ɲwɔ nìɲyiŋi na.
90 Mu ɲwɔmɛfente sí n-kwôro tèrigii puni i fo tèekwombaa,
mu à ɲìŋke dá,
kʼà tígilʼa ɲwɔ.
91 Mu kakwɔnɲjyahigii kurugo,
yaayi puni na ɲyɛ wani mà sà nɔ niɲjaa na,
ɲaha kurugo yɛ,
yaayi puni na báare mu á.
92 Ká mpyi mu sàliyaŋi ɲyɛ a mpyi a táan mii á mɛ,
numɛ mpyi na si mii ta mii à kwû yyefuge cye e.
93 Mii sì n-sìi funŋɔ wwɔ̀ mu yyeshempe na mɛ,
ɲaha kurugo yɛ,
puru cye kurugo mu à shì kan mii á.
94 Mii na ɲyɛ mu wu,
na shwɔ,
ɲaha kurugo yɛ,
mu yyeshempe ɲwɔhʼi mii à taha.
95 Shinpiibii na mii peeli si mii bò,
ŋka mii à na sɔ̀nŋɔre taha mu kurigii ɲaraŋi na.
96 Mii à li ɲya na tɛgɛlɛ na ɲyɛ yaayi puni na,
ŋka,
tɛgɛlɛ ɲyɛ mu toŋi na mɛ.
97 Mu sàliyaŋi kyalʼà táan mii á dɛ!
Mii maha sɔ̂nŋi u na tèrigii puni i.
98 Mu toŋʼà mii pyi mii à cyìige na zàmpɛɛnbii na,
ɲaha kurugo yɛ,
u ɲyɛ mii funŋʼi tèrigii puni i.
99 Mii à ɲcèŋi ta mà tòro na cyelentiibii puni na,
ɲaha kurugo yɛ,
mii na sɔ̂nŋi mu toŋi na sèlʼe.
100 Mii à karii yyaha cè mà tòro shinlyeebii na,
ɲaha kurugo yɛ,
mii à yaha mu yyeshempe na.
101 Mii na na tɔɔge kàanmucaa kumpegigii puni na,
bà mii si mpyi sʼa ɲaare sʼa ntàanni ná mu jwumpe e mɛ.
102 Mii ɲyɛ a kàntugo wà mu kakwɔnɲyahigilʼá mɛ,
ɲaha kurugo yɛ,
mu u à mii taanna cyi na.
103 Mu jwumpʼà sàa táan mii á,
pʼà táan mii ɲwɔge e sɛɛre na.
104 Mu yyeshempʼà sìɲcyiimɛ kan mii á,
lire kurugo,
mii na kafinaare kurigii puni fún.
105 Mu jwumpe na ɲyɛ fùkina mii tooyʼe,
bɛ̀ɛnmɛ pi mii kuni i.
106 Ɲwɔmɛɛni mii à lwɔ́,
na mii sí raa ɲaaare sʼa ntàanni ná mu kakwɔnɲyahigilʼe ke,
mii sí lire fûnŋɔ.
107 Mii à kyaala a tòro,
Kafooŋi,
shì kan na á ma tàanna ná ma jwumpe e.
108 Kafooŋi,
ɲɛɛ na fwùŋi na sáraga fiige,
na taanna ma kakwɔnɲjyahigii na.
109 Mii munaani na ɲyɛ mpuŋɔ na tèrigii puni i,
ŋka mii ɲyɛ a funŋɔ wwɔ̀ mu sàliyaŋi na mɛ.
110 Shinpiibilʼà kànhaɲya cyán mii kuni i,
ŋka mii ɲyɛ a mu yyeshempe yaha mɛ.
111 Mu kurigii cyi ɲyɛ mii nàfuuŋi tèrigii puni i,
cyi maha funntange kan mii zòmbilinʼá.
112 Mii à li lwɔ́ naye funŋʼi,
sʼa mu ɲyii wuuni pyi tèrigii puni i,
si sà nɔ fo tɛgɛni na.
113 Funɲwɔ shuunni fooŋʼà sàa pɛn mii á,
ŋka,
mu sàliyaŋʼà táan mii á.
114 Mu u ɲyɛ mii taŋwɔhɔge ná mii tɔɔnnte yabeŋke,
mii sɔ̀nŋɔrʼà taha mu jwumpe na.
115 Yii laaga tɔɔn na na shinpiibii,
mii la na ɲyɛ sʼa na Kileŋi toŋi kurigii ɲaare.
116 Yaha na na,
bà mu à li ɲwɔmɛɛni lwɔ́ mɛ,
si shì ta.
Ma hà na yaha sì n-sílige na sɔ̀nŋɔre tatahage kàmpanŋke na mɛ.
117 Na tɛ̀gɛ si shwɔ,
mii sí yyaha le mu ɲyii wuuni i tèrigii puni i.
118 Mpii pi à laaga tɔɔn mu ɲyii wuuni na ke,
mu maha ɲcyé pire na,
ɲaha kurugo yɛ,
pi kakyaalaɲyahigii na ɲyɛ kafinara.
119 Mu sí ɲìŋke shinpiibii puni wà kàkyaya fiige,
lire kurugo,
mu kurigii ɲaraŋʼà táan mii á.
120 Mii cyeere na ɲcyɛ̂ɛnni mu yyahafyagare na,
mu kakwɔnɲjyahigii fyagare ɲyɛ mii na.
121 Sèeŋi ná ntìiŋi kuni mii ɲyɛ na ɲaare,
ma hà na yaha na kyérege feebii cye e mɛ.
122 Yyére ná na yyeɲiŋke karigilʼe,
ma hà yàmpeente feebii yaha pi a na kyérege mɛ.
123 Mii à mɔ na mu zhwoŋi
ná mu ntìiŋi ɲwɔmɛɛni sigili.
124 Ma báarapyiŋi cû a tàanna ná ma cɛ̀nmpe e,
na taanna ma ɲyii wuuni na.
125 Mii na ɲyɛ mu báarapyi,
yákili niɲcɛnŋɛ kan na á,
si jà mu kurigii yyaha cè.
126 Kafooŋi,
tènʼà nɔ mu u kyaa pyi,
ɲaha kurugo yɛ,
pi à mu sàliyaŋi kɛ̀ɛgɛ.
127 Sèeŋi na,
mu toŋi kurigilʼà táan mii á,
mà tòro sɛɛnŋi na,
ali mà tòro sɛɛnŋi yabilibiliŋi na.
128 Sèeŋi na,
mii à li ta na mu yyeshempe punʼà tíi,
kafinaare kurigii punʼà pɛn mii á.
129 Mu kurigii na ɲyɛ kakyanhala,
lire kurugo mii à naye pwɔ cyi na.
130 Mu jwumpe yyahe ɲcèŋi maha bɛ̀ɛnmpe kaan,
pu maha funŋɔ kan funŋɔbaashiinbilʼá.
131 Mii maha na ɲwɔge múgo mu jwumpe lage na fo maha ŋkyɛn,
ɲaha kurugo yɛ,
mu toŋi kurigilʼà sàa táan mii á.
132 Yyaha kɛ̂ɛnŋʼa na wíi ma a ɲùɲaara ta na na,
bà mu maha ntêe na li pyi ma mɛge pèveebilʼá mɛ.
133 Na yyaha cû ma tàanna ná ma ɲwɔmɛɛni i,
ma hà ntíimbaaŋi kani là yaha li fànha ta na na mɛ.
134 Na shwɔ sùpyire ŋkyèregeŋi na,
bà mii si mpyi sí mu yyeshempe cû ɲwɔ mɛ.
135 Ma yyecɛnŋke yige ma báarapyiŋʼá,
ma a na taanna ma ɲyii wuuni na.
136 Ɲyilwɔhɔ niɲyahaga na fwore mii ɲyiigilʼe,
ɲaha kurugo yɛ,
sùpyire ɲyɛ na mu sàliyaŋi cwore ná sèlʼe mɛ.
137 Mu à tíi Kafooŋi,
mu kakwɔnɲjyahigii mú à ɲwɔ.
138 Mu à ma kurigii tìŋɛ
ntìiŋi ná ɲwɔmɛfente ɲuŋʼi.
139 Mii lùunʼà sàa yîri,
ɲaha kurugo yɛ,
mii zàmpɛɛnbilʼà funŋɔ wwɔ̀ mu jwumpe na.
140 Mu jwumpʼà fûnŋɔ,
pʼà sàa táan mu báarapyiŋʼá.
141 Mii na ɲyɛ shinbilere,
wà ɲyɛ na ntɔ̀re mii i mɛ,
ŋka,
mii funŋɔ ɲyɛ na wwùu mu yyeshempe na mɛ.
142 Mu ntìiŋi na ɲyɛ tèekwombaa ntìi,
mu sàliyaŋi si ɲyɛ sèe.
143 Cwɔ̀nrɔmpe ná funmpɛɛnre na ɲyɛ mii na,
ŋka,
mu toŋi kurigii maha mii funŋke táan.
144 Mu kurigilʼà tíi tèrigii puni i,
na yaha si cyi yyaha cè,
si shì ta.
145 Kafooŋi,
mii na mu yiri ná na zòmbilini puni i,
na ɲwɔ shwɔ,
mii sí raa mu ɲyii wuuni pyi.
146 Mii na mu yiri,
pa na shwɔ,
lire ká mpyi,
mii sí raa mu kurigii ɲaare.
147 Mà ta ɲyɛ̀ge sàha múgo mɛ,
mii sí mu ɲaara,
mii sɔ̀nŋɔrʼà taha mu jwumpe na.
148 Mii sí ɲyiigii múgo numpilage paange e,
si sɔ̂nŋɔ mu ɲwɔmɛɛni na.
149 Kafooŋi,
ma cɛ̀nmpe funŋke e,
lógo na ɲwɔ na,
shì kan na á ma kakwɔnɲjyahigii funŋke e.
150 Kakuumpyiibii nimpaampii pi mpii,
pi laagʼà tɔɔn mu sàliyaŋi na.
151 Ŋka,
mu wi ke Kafooŋi,
mu laagʼà byanhara mii na,
mu toŋi kurigii puni na ɲyɛ sèe.
152 Mu kurigilʼà li cyêe mii na fo tèemɔni i,
na mu à cyire yaa,
cyi mú sí n-kwôro fo tèekwombaa.
153 Na yyefuge wíi ma a ku láha na na,
ɲaha kurugo yɛ,
mii ɲyɛ a funŋɔ wwɔ̀ mu sàliyaŋi na mɛ.
154 Na kani cû ná ma cyeyi shuunniŋi i ma a na tànga jwo,
shì kan na á ma tàanna ná ma ɲwɔmɛɛni i.
155 Zhwoŋi laagʼà tɔɔn shinpiibii na,
Ɲaha kurugo yɛ,
pi ɲyɛ na mu ɲyii wuuni caa mɛ.
156 Ɲùɲaarʼà sìi mu i Kafooŋi,
shì kan na á ma tàanna ná ma kakwɔnɲyahigilʼe.
157 Mii kyéregefeebii ná mii zàmpɛɛnbilʼà ɲyaha,
ŋka mii ɲyɛ a mu kurigii ɲaraŋi yaha mɛ.
158 Mii à shinpiibii ɲya,
ka pi la si wwû mii na,
mà lire ɲùŋke pyi,
pi ɲyɛ a mu jwumpe le ɲjire e mɛ.
159 Kafooŋi,
wíi,
táanŋkanni na mu yyeshempʼà táan mii á ke.
Shì kan na á ma cɛ̀nmpe kurugo.
160 Mu jwumpe punʼà sìi sèe,
mu ntìiŋi kakwɔnɲjyahigii sí n-kwôro fo tèekwombaa.
161 Ɲùŋufeebii pìlʼà mii kyérege ɲùŋɔ bàa,
ŋka,
mu jwumpe kanni na mii ɲyɛ na fyáge.
162 Mu jwumpe maha mii funŋke táan,
mu à jwo shinŋi u à nàfubwɔhɔ ta ke.
163 Kafinarʼà pɛn mii á,
mii na ti fún,
ŋka mu sàliyaŋʼà táan mii á.
164 Mii maha mu kêe tooyo baashuunni canŋke e,
mu kakwɔnɲjyahigii nintíigii kurugo.
165 Mu sàliyaŋʼà táan mpimu á ke,
pire maha sàa yyeɲiŋɛ ta,
yafyin sì n-jà pi cúnŋɔ mɛ.
166 Mu zhwoŋi mii ɲyɛ na sigili Kafooŋi,
mii na mu toŋi kurigii ɲaare.
167 Mii munaanʼà taha mu kurigii na,
cyi kyalʼà sàa táan mii á.
168 Mii na mu yyeshempe ná mu kurigii ɲaare,
ɲaha kurugo yɛ,
mu ɲyii ɲyɛ mii kapyiiŋkii puni na.
169 Na parage yaha ku nɔ ma na Kafooŋi,
na yaha si karii yyaha cè bà mu à li ɲwɔmɛɛni lwɔ́ mɛ.
170 Na ɲarage yaha ku nɔ ma na,
na shwɔ bà mu à li ɲwɔmɛɛni lwɔ́ mɛ.
171 Mii ɲwɔge sí mu kêe sèlʼe,
ɲaha kurugo yɛ,
mu na mii taanni ma ɲyii wuuni na.
172 Mii ɲjini li mu jwumpe cêe mɛɛ,
ɲaha kurugo yɛ,
mu toŋi kurigii punʼà tíi.
173 Ma cyɛge ku na tɛ̀gɛ,
ɲaha kurugo yɛ,
mu yyeshempe mii à cwɔɔnrɔ.
174 Kafooŋi,
mu u mii shwɔ,
lire lage kʼà sìi mii na,
mu sàliyaŋi u maha mii funŋke táan.
175 Na yaha si mpyi shì na sʼa ma kêre,
mu kakwɔnɲjyahigii cyi na tɛ̀gɛ.
176 Mii na ɲaare na mâre mpàpinaga fiige,
pa ma báarapyiŋi cya,
ɲaha kurugo yɛ,
mii ɲyɛ a funŋɔ wwɔ̀ mu toŋi kurigii na mɛ.