Kafooŋi cɛ̀nmpe sì n-sìi n-kwɔ̀ mɛ
118
Yii fwù kan Kafooŋi Kile á,
ɲaha kurugo yɛ,
u à ɲwɔ,
u cɛ̀nmpe sì n-sìi n-kwɔ̀ mɛ.
2 Izirayɛli shiinbii pi jwo:
«U cɛ̀nmpe sì n-sìi n-kwɔ̀ mɛ.»
3 Arɔn shiinbii pi jwo:
«U cɛ̀nmpe sì n-sìi n-kwɔ̀ mɛ.»
4 Mpii pi ɲyɛ na fyáge Kafooŋi yyaha na ke,
pire pi jwo:
«U cɛ̀nmpe sì n-sìi n-kwɔ̀ mɛ.»
5 Yyefuge tèni i,
mii à Kafooŋi yyere,
ka u u mii ɲwɔ shwɔ maa mii ɲùŋɔ wwû.
6 Kafooŋi na ɲyɛ ná mii i,
mii ɲyɛ na fyáge yafyin na mɛ,
ɲaha shi sùpya sí n-jà n-pyi mii na yɛ?
7 Kafooŋi na ɲyɛ ná mii i,
uru u ɲyɛ mii tɛgɛfooŋi.
Mii kyalʼà pɛn mpimu á ke,
mii sí pire ɲya tacwuge e.
8 Mà maye tíiŋɛ Kafooŋi na,
lirʼà pwɔ́rɔ mà ma sɔ̀nŋɔre taha sùpya na.
9 Mà maye tíiŋɛ Kafooŋi na,
lirʼà pwɔ́rɔ mà ma sɔ̀nŋɔre taha fànhafeebii na.
10 Supyishiŋi sanŋi puni mpyi a mii kwûulo,
ŋka,
Kafooŋi mɛge cye kurugo,
mii à jà pi na.
11 Pi mpyi a mii kwûulo fo mà mii fɛnrɛ,
ŋka,
Kafooŋi mɛge cye kurugo,
mii à jà pi na.
12 Pi mpyi a se mii na sarii fiige,
ŋka,
pi à bò bà ŋwuro na maha fùgo fwɔ fwɔ mɛ.
Kafooŋi mɛge cye kurugo,
mii à jà pi na.
13 Pi mpyi a mii ŋɔɔŋɔ si ɲcyán,
ŋka,
Kafooŋi à mii tɛ̀gɛ.
14 Kafooŋi u ɲyɛ mii fànhe tatage ná mii mɛceeni ɲùŋke,
uru u à mii shwɔ.
15 Sítaare funntanga myahigii na ɲcêe shintíibii vàanɲyi bayi i.
Kafooŋi kàniŋɛ cyɛgʼà kabwɔhigii pyi.
16 Kafooŋi kàniŋɛ cyɛgʼà yîrige,
Kafooŋi kàniŋɛ cyɛgʼà kabwɔhigii pyi.
17 Mii sì n-kwû mɛ,
mii sí n-pyi ɲyii na,
si Kafooŋi kapyiiŋkii jáara.
18 Kafooŋi à mii kyérege sèlʼe,
ŋka u ɲyɛ a mii yaha kwùŋi cye e mɛ.
19 Yii shintíibii tajyiɲwɔyi múgo na á,
mii sí n-jyè,
si sà fwù kan Kafooŋi á.
20 Kafooŋi tajyiɲwɔge ku ŋke,
kure e shintíibii maha jyè.
21 Mii fwù na ɲyɛ mu na,
ɲaha kurugo yɛ,
mu à mii ɲwɔ shwɔ,
mu à mii pyi mii à shwɔ.
22 Bafaanribilʼà cyé kafaage ŋkemu na ke,
kuru kʼà pa mpyi bage kafaage sèe woge bage mbìini na.
23 Lirʼà pyi Kafooŋi kayaala,
maa mpyi kakyanhala wuu á.
24 Canmbilini Kafooŋi à bégele ke,
lire li ɲyɛ nde,
wuu múguro,
wuu u funntanga myahigii cêe u á.
25 Ɲwɔ wuu na Kafooŋi,
ma a wuu shwɔ,
ɲwɔ wuu na Kafooŋi,
ma a wuu pyi javee.
26 Ŋgemu u ɲyɛ na ma Kafooŋi mɛge na ke,
Kile u jwó le urufolʼá.
Mà wuu yaha Kafooŋi bage e,
wuu sí jwó le yii á.
27 Kafooŋi u ɲyɛ Kile,
uru u à bɛ̀ɛnmpe yige wuu á.
Yii jyè kataanni i ná cire ŋkéyi i,
yii a wá fo sárayi tawwuge ɲɛɛŋkii cyage e.
28 Mu u ɲyɛ mii u Kileŋi,
mii sí fwù kan mu á.
Mii u Kileŋi,
mii sí mu kêe.
29 Yii fwù kan Kafooŋi á,
ɲaha kurugo yɛ,
u à ɲwɔ,
u cɛ̀nmpe sì n-sìi n-kwɔ̀ mɛ.