Kafooŋi kanni u à yaa ná pèente e
115
Wuu na bà mɛ,
Kafooŋi Kile,
wuu na bà pèentʼà yaa ti taha mɛ,
ŋka,
tʼà yaa ti taha mu mɛge na,
mu cɛ̀nmpe ná mu ɲwɔmɛfente kurugo.
2 Ma hà supyishiŋi sanŋi yaha u jwo:
«Taa pi Kileŋi ɲyɛ ke?»
mɛ.
3 Wuu u Kileŋi na ɲyɛ nìɲyiŋi na,
nde lʼà táan u á ke,
lire u maha mpyi.
4 Pi wyɛ́rɛfyinŋi kacyanhigii ná sɛɛnŋi wogigii
na ɲyɛ sùpyaŋi cyeyi yayaaɲya.
5 Ɲwɔɲyi na ɲyɛ cyi á,
ŋka cyi ɲyɛ na yu mɛ,
ɲyiigii na ɲyɛ cyi á,
ŋka cyi ɲyɛ na ɲaa mɛ.
6 Niŋgyigii na ɲyɛ cyi á,
ŋka cyi ɲyɛ na núru mɛ,
munahigii na ɲyɛ cyi á,
ŋka cyi ɲyɛ na nùgo taa mɛ.
7 Cyeyi ɲyɛ na cyi á,
ŋka cyi ɲyɛ na yaaga cwore mɛ,
tooyi na ɲyɛ cyi á,
ŋka cyi ɲyɛ na ɲaare mɛ.
Cyi ŋkɔ̀ɔnyi ɲyɛ a sìi na tùnmɔ yige mɛ.
8 Cyi yaafeebii pi pyi cyi fiige,
mà bâra mpii pi à pi sɔ̀nŋɔre taha cyi na ke.
9 Izirayɛli shiinbii,
yii yii sɔ̀nŋɔre taha Kafooŋi na,
uru u ɲyɛ pi tɛgɛfooŋi ná pi tɔɔnte yabeŋke.
10 Arɔn tùluge shiinbii,
yii yii sɔ̀nŋɔre taha Kafooŋi na,
uru u ɲyɛ pi tɛgɛfooŋi ná pi tɔɔnte yabeŋke.
11 Mpii pi ɲyɛ na fyáge Kafooŋi na ke,
yii yii sɔ̀nŋɔre taha Kafooŋi na,
uru u ɲyɛ pi tɛgɛfooŋi ná pi tɔɔnte yabeŋke.
12 Kafooŋi na sɔ̂nŋi wuu kyaa na,
u sí jwó lwɔ́ wuu na,
u sí jwó lwɔ́ Izirayɛli shiinbii na,
u sí jwó lwɔ́ Arɔn tùluge shiinbii na.
13 Kafooŋi sí jwó lwɔ́ u yyahafyagare feebii na,
shinbileere bâra shinbwo na.
14 Kafooŋi u a là bârali yii na,
u a là bârali yii ná yii pyìibii na.
15 Kafooŋi u jwóŋi lwɔ́ yii na,
uru ŋgemu u à nìɲyiŋi ná ɲìŋke dá ke.
16 Nìɲyiŋi na ɲyɛ Kafooŋi wu,
ŋka u à ɲìŋke kan sùpyirʼá.
17 Kwuubii bà pi sí Kafooŋi kêe mɛ,
mpii pi à kàre vyàhaŋi cyage e ke,
pire bà mɛ.
18 Ŋka,
wuu pi sí Kafooŋi kêe,
mà lwɔ́ numɛ na,
fo tèekwombaa.
Yii Kafooŋi kêe