Supyipozhwɔgɔ kileɲarage
116
Kafooŋi Kile kyalʼà táan mii á,
ɲaha kurugo yɛ,
mii à u ɲáare,
ka u u mii ɲwɔ shwɔ.
2 U à u niŋgyiini pɛrɛ maa lógo mii ɲwɔ na,
lire kurugo,
mii sí raa u ɲáare na shìŋi canmpyaagii puni i.
3 Kwùŋi yapwɔyi mpyi a mii pwɔ,
fanŋke funmpɛɛnre mpyi mii na,
yyetanhare ná yyefuge mpyi mii na.
4 Ɲyɛ,
ka mii i Kafooŋi mɛge yyere,
«Kafooŋi,
ɲwɔ na na,
ma a na munaani shwɔ.»
5 Kafooŋi na ɲyɛ ɲùɲaarafoo maa ntíi,
wuu Kileŋi ɲùŋkʼà pi.
6 Kafooŋi maha fànhabaafeebii tɛ̀re,
mii fànhe mpyi a cyɛ́rɛ,
ka u u mii shwɔ.
7 Na munaa,
núrʼa pyi ma yyeɲiŋke e,
ɲaha kurugo yɛ,
Kafooŋi a ɲwɔ mu na.
8 U à mii munaani shwɔ kwùŋi na,
maa mii ɲyiigii shwɔ ɲyilwɔhe na,
maa mii tooyi shwɔ mbùruguŋi na.
9 Mii sí raa ɲaare Kafooŋi yyahe taan,
ɲyiishiinbii shwɔhɔlʼe ɲìŋke na.
10 Mii à dá u na,
ali tèni i mii mpyi na ŋko,
na yyefuge naha a sìi mii na ke.
11 Yyefugʼà mii ta fo mii à jwo:
«Sùpyire punʼà sìi kafinivinimii.»
12 Ɲaha mii sí n-jà mpyi Kafooŋi á,
u kacɛɛnŋkii puni kurugo mii á yɛ?
13 Mii sí zhwoŋi funɲcwokwuuni yîrige,
si Kafooŋi mɛge yyere.
14 Mii sí na ɲwɔfaayi wwû Kafooŋi á,
u shiinbii puni shwɔhɔlʼe.
15 Kafooŋi yyahafyagare feebii
ŋkwùŋʼà sìi kawaa u á.
16 Ei Kafooŋi,
mii na ɲyɛ mu báarapyi,
sêe,
mii na ɲyɛ mu báarapyi,
mii ɲyɛ mu báarapyicwoŋi jyaŋi.
Mu u à mii pwɔɔre sànha a láha mii na.
17 Mii sí sáraga wwû si ntɛ̀gɛ fwù kan mu á,
mii sí Kafooŋi mɛge yyere.
18 Mii sí na ɲwɔfaayi wwû Kafooŋi á,
u shiinbii puni shwɔhɔlʼe,
19 Kafooŋi bage ntàani na,
mu,
Zheruzalɛmu kànhe yabiliŋi i.
Yii Kafooŋi kêe!