Kafooŋi u ɲyɛ kanhamafeebii tɛgɛfooŋi
113
Yii Kafooŋi kêe
Kafooŋi Kile báarapyiibii,
yii u kêe,
yii Kafooŋi mɛge kêe.
2 Kafooŋi mɛge ku pêe,
mà lwɔ́ numɛ na fo tèekwombaa.
3 Kafooŋi mɛge ku kêe cyeyi puni i,
mà lwɔ́ canŋafworompe na,
mà sà nɔ canŋacwumpe na.
4 Kafooŋi na ɲyɛ supyishiŋi puni nìɲyi na,
u mpèeŋʼà dùgo fo nìɲyiŋi tɛgɛni na.
5 Jofoo u ɲyɛ Kafooŋi,
wuu Kileŋi ɲca yɛ?
Urʼà tɛ̀ɛn fo nìɲyiŋi tɛgɛni na,
6 maa ɲùŋke sôgo maa nìɲyiŋi ná ɲìŋke wíi.
7 U maha kanhamafooŋi yîrige ɲìŋke na,
maa fòŋɔfooŋi yige kafuntuŋke e,
8 si pi tìŋɛ ná shinbwoobii
ná pi shiŋi fànhafeebilʼe.
9 U maha baga kan cijyiriŋkʼá,
maa u pyi pyànu funntanga wu u pyìibii shwɔhɔlʼe.
Yii Kafooŋi kêe!