Shintíiŋi wuunʼà ɲwɔ
112
Yii Kafooŋi kêe.
Shinŋi u ɲyɛ na fyáge Kafooŋi Kile na,
u sàliyaŋi kurugii ɲaareŋi sʼà táan u á ke,
urufoo wuunʼà ɲwɔ.
2 Fànhe sí n-pyi u tùluge shiinbilʼe ɲìŋke na.
Shintíiŋi tùluge shiinbii sí jwó ta.
3 Yyeɲiŋke ná yaarafente sí n-pyi shintíiŋi pyɛnge e,
u sí n-kwôro ntìiŋi i tèrigii puni i.
4 Numpini i,
bɛ̀ɛnmpe maha fworo shincɛnŋʼá,
uru ŋgemu u ɲyɛ ná ɲùɲaare ná ɲùmpiŋke e maa ntíi ke.
5 Shinŋi u ɲyɛ ná ɲùɲaare e maa fwɔ̀higii leni,
maa u karigii pyi ntìiŋi funŋke e ke,
urufoo wuunʼà ɲwɔ.
6 Yafyin sì n-sìi u cúnŋɔ mɛ.
Wà funŋɔ sì n-sìi n-wwɔ̀ u na mɛ.
7 U ɲyɛ na fyáge kafepɛngɛ yyaha na mɛ,
u zòŋʼà tàra,
u sɔ̀nŋɔrʼà taha Kafooŋi na.
8 U yákiliŋʼà tɛ̀ɛn,
u ɲyɛ na fyáge mɛ,
u sí u zàmpɛɛnbii ɲya tacwuge e.
9 U sí funŋke fíniŋɛ si fòŋɔfeebii kan,
u ntìiŋi sí n-kwôro tèrigii puni i,
u sí ɲùɲjirire ta pèente funŋke e.
10 Shinpiŋi ká lire ɲya,
u lùuni sí n-yîri,
sʼa u ŋkyànhigii kùru si ɲcwɔgɔ.
U sì u ɲɛɛmpe ta mɛ.