Kile kasinaaŋkii kyalʼà yaa ná ɲjwu i
111
Yii Kafooŋi kêe
Mii sí fwù kan Kafooŋi Kile á ná na zòmbilini puni i,
shintíibii nimbinnibii shwɔhɔlʼe.
2 Kafooŋi kapyiiŋkilʼà pêe.
Cyi kyalʼà táan mpimu á ke,
pire puni maha pi funɲyi caa cyi na.
3 Pèente ná sìnampe na ɲyɛ u kapyiiŋkii puni i,
u ntìiŋi sí n-kwôro fo tèekwombaa.
4 U la na ɲyɛ uru kabwɔhigii cyi kwôro sùpyire funŋʼi.
Kafooŋi ɲyɛ ɲùmpiŋɛ ná ɲùɲaarafoo.
5 U maha yalyire kaan u yyahafyagare feebilʼá,
maa funŋɔ cwo tèrigii puni i u tunmbyaare na.
6 U à u sífente cyêe u shiinbii na u kapyiiŋkii cye kurugo,
maa supyishiŋi wà u tara shwɔ a kan pi á.
7 U karigii puni na mpyi ɲwɔmɛfente ná ntìiŋi funŋke e,
u sàliyaŋi karigii punʼà tígile.
8 Cyi sí n-kwôro fo tèekwombaa,
cyi núcyange ku ɲyɛ ɲwɔmefente ná ntìiŋi.
9 U à u shiinbii ɲùŋu wwû,
maa tèekwombaa tunmbyaare le ná pi e,
u mɛgʼà táan,
kʼà sìi fyagara yaaga.
10 Kafooŋi yyahafyagare ti ɲyɛ yákilifente tasiige,
mpii pi ɲyɛ ná u yyahafyagare e ke,
pire puni na ɲyɛ yákilifee.
U ŋkèeŋi sí n-kwôro tèregii puni i.