Yyefugofoo yacyage
109
Mɛceŋkuruŋke yyaha yyére shinŋi.
Dawuda mɛɛni là.
Ei Kile,
mu mii ɲyɛ na ŋkêre ke,
ma hà vyâha mɛ.
2 Ɲaha kurugo yɛ,
shinpiibii ná nàɲwɔhɔrɔre pyifeebilʼà pi ɲwɔyi múgo mii kurugo,
pi na finni mii na.
3 Pi màpɛnge jwumpʼà mii kwûulo kànmpanɲyi puni na,
pi na mii tùnni ɲùŋɔ bàa.
4 Pi kyalʼà táan mii á ŋka pi na mii cɛ̂ɛge,
mii sí ɲyɛ a là bâra kileɲarege na mɛ.
5 Pi à mii kacɛnni fwooni tò ná kapiini i,
maa mii tàange fwooni tò ná màpɛnge e.
6 Shinpiŋi wà u yîri u kurugo,
u cɛ̀ɛgɛfooŋi wà u yyére u kàniŋke na.
7 U kataanmpe ká a sí n-cwɔɔnrɔ,
u ta ɲcɛ̀ɛgɛfoo,
u kileɲarage ku tɔ̀rɔ kapii u na.
8 U shìŋi canmpyaagii cyi cyɛ́rɛ,
wabɛrɛ u u báaraɲwɔge lwɔ́.
9 U pyìibii pi pyi tu bàa,
u cwoŋi u pyi leeŋkucwɔ.
10 U pyìibii pi fába pi i mpyi ɲáraɲarii,
pi fworo pi bakuuyi i pi a wà pi sʼa yalyire ɲáare tatɔɔnge e.
11 Fwooni là foo u u cyeyaayi puni kuu,
nànmpwuunbii pìi pi u lantaŋi puni pyi piye wu.
12 Sùpya kà zíi núru kacɛnnɛ pyi u na mɛ,
sùpya kà zíi ɲùɲaara ta u pyìibii na mɛ.
13 U tùluge shi ku tò ɲìŋke na,
u mɛge ku pînni lyeɲwɔge nimpaŋke e.
14 Kafooŋi Kile u funŋɔ cwo u tìibii kapegigii na,
u nuŋi kapegigii kà zíi yàfa mɛ.
15 Cyire kapegigii cyi sàa kwôro Kafooŋi funŋʼi tèrigii puni i,
u u u mɛge pînniŋɛ ɲìŋke na.
16 Ɲaha kurugo yɛ,
u ɲyɛ a sàa funŋɔ ta si kacɛnnɛ pyi shin na mɛ,
u à li taha fòŋɔfooŋi ná kanhamafooŋi na,
maa nàvunŋɔfooŋi kyérege si mbò.
17 Lanŋaŋke ku mpyi a táan u á tapyige e,
lanŋaŋke ku cwo u yabiliŋi na.
U mpyi a sìi na jwó leni mɛ,
jwóŋi laaga ku tɔɔn u na.
18 Lanŋaŋke ku pyi u na vànntinŋɛ fiige,
ku tîge u funŋʼi lwɔhɔ fiige,
ku jyè u kaciiyi i sìnmɛ fiige.
19 Lanŋaŋke ku u tò vàanŋa fiige,
ku u cyîbe seepwɔgɔ fiige tèrigii puni i.
20 Mii cɛɛgɛfeebii sàraŋi u pyi ure mà yîri Kafooŋi yyére,
ná mpii pi ɲyɛ na jwumpimpe yu,
mii munaani na ke.
21 Ŋka mu wi ke,
Kafooŋi Kile,
ɲwɔ na na,
ma mɛge ntàanŋi kurugo,
na shwɔ ma cɛ̀nmpe nimbwompe kurugo.
22 Ɲaha kurugo yɛ,
mii na ɲyɛ fòŋɔfoo ná kanhamafoo,
mii zòŋʼà cwɔ̂nrɔ mii funŋke e.
23 Mii na ŋkwùu na wà mbyimɛ fiige,
mii à kɔ̀rɔ kampɛɛnŋɛ fiige.
24 Mii niŋkunɲyi fànhʼà cyɛ́rɛ súnleni cye e,
mii à cwɔgʼa pyi niŋgara.
25 Mii à pyi fahana yaaga,
pi aha mii ɲya,
pi maha pi ɲùɲyi kwôre.
26 Ei,
mii Kafooŋi Kile,
na tɛ̀gɛ,
na shwɔ ma cɛ̀nmpe kurugo.
27 Pi yaha pi li cè na mu cyɛge fyè wi,
na mu Kafooŋi u à li pyi.
28 Pi mɛɛ ká mii láŋa,
mu sí jwó le mii á.
Pi aha yîri mii kurugo,
pi sí n-sílige,
ŋka mu báarapyiŋi sí n-pyi funntange e.
29 Ɲùzogore ti mii zànmpɛɛnbi tò vàanntiŋɛ fiige,
silige ku pyi pi na vàantinbwɔhɔ fiige.
30 Mii sí funntanga fwù kan Kafooŋi á sèlʼe,
si u kêe supyiɲyahare shwɔhɔlʼe.
31 Ɲaha kurugo yɛ,
u sí n-yyére fòŋɔfooŋi kàniŋke na,
si u shwɔ u cɛ̀ɛgɛfeebii na.