Kile u ɲyɛ fànhe kanfooŋi
108
Dawuda mɛɛni là.
Mɛɛni.
2 Ei Kile,
mii funŋkʼà ɲíŋɛ,
Mii sí mɛɛ cêe si mu kêe ná na zòmbilini puni i.
3 Mii mpòoŋke ná mii ŋkɔ̀nnɔŋi,
yii ɲɛ̀!
Mii sí ɲyɛ̀ge ɲɛ̀.
4 Kafooŋi Kile,
mii sí mu kêe sùpyire shwɔhɔlʼe,
Mii sí myahigii cêe si mu pêe supyishiŋi puni shwɔhɔlʼe.
5 Ɲaha kurugo yɛ,
mu cɛ̀nmpʼà dùgo fo nìɲyiŋi tɛgɛni na,
ka mu ɲwɔmɛfente si dùgʼa nɔ ɲahaɲyi na.
6 Ei Kile,
ma pèente cyêe nìɲyiŋi tɛgɛni na,
mu sìnampe pu ɲìŋke cyeyi puni ɲî.
7 Na ɲwɔ shwɔ ma a wuu shwɔ ná ma kàniŋɛ cyɛge e,
mu shiinbii kyaa lʼà táan mu á ke,
bà pire ɲùŋɔ si mpyi si wwû mɛ.
8 Kile à tɛ̀ɛn u cyage niɲcɛnŋke e maa jwo:
«Mii sí n-pyi javoo si Sikɛmu cyage táa táa,
si Sikɔti ɲaɲyi shwɔ̀hɔŋi súma.
9 Galadi na ɲyɛ mii wu,
Manase mú na ɲyɛ mii wu.
Efirayimu u ɲyɛ mii tɔɔnte ɲùntoŋke,
Zhuda u ɲyɛ mii saanre kàbiini.
10 Mohabu u ɲyɛ mii lùwiliyaage.
Mii sí na tanhaɲyi wà Edɔmua i.
Mii sí sí ta Filisi kìni na si sêe li na.»
11 Jofoo u sí n-kàre ná mii i fànɲyahaga kànhe e yɛ?
Jofoo u sí mii yyaha cû n-kàre Edɔmu i yɛ?
12 Ei Kile,
mu balʼa?
Mu Kile u mpyi a wuu cyé,
maa mpyi mu saha ɲyɛ na sì ná wuu kàshicyɛge e mɛ.
13 Pa wuu shwɔ wuu zàmpɛɛnbii na.
Ɲaha kurugo yɛ,
sùpyaŋi u ntɛ̀gɛŋi ɲyɛ yafyin mɛ.
14 Ŋka Kile ká mpyi ná wuu e,
wuu sí kabwɔhigii pyi,
uru u sí wuu zàmpɛɛnbii fwooŋɔ u tooyi ɲwɔhʼi.