Sémeŋi Kaŋkurowuŋi
(Zaburu 107—150)
Kile u ɲyɛ cwɔ̀nrɔmɔfeebii shwofooŋi
107
Yii fwù kan Kafooŋi Kile á,
ɲaha kurugo yɛ,
u à ɲwɔ,
u cɛ̀nmpe sì n-sìi n-kwɔ̀ mɛ.
2 Kafooŋi à mpimu ɲùŋɔ wwû ke,
pire pi a ŋko amuni,
pire u à yige pi kyéregefeebii cye e,
3 maa pi wà piye na mà fworo kìrigilʼe,
mà yîri canŋafyinmpe ná canŋacwumpe,
suumɔkulo ná wwòrokule e ke.
4 Pìi mpyi a pînni na ɲaare na mâre síwage e,
pi ɲyɛ a kuro ta,
ndemu pi sí n-lwɔ́ ŋkàre kànhe katufiige na mɛ.
5 Katege ná byage mpyi pi na,
Pi fànhe mpyi na ŋko si ŋkwɔ̀.
6 Mà pi yaha kuru yyefuge e,
pi à mɛɛ wà Kafooŋi á,
ka u u pi yige puru cwɔ̀nrɔmpe e.
7 Ka u u pi yyaha cû kuni nintiini i,
mà kàre kànhe kà na,
pi sí n-jà ntɛ̀ɛn ŋkemu i ke.
8 Pi Kafooŋi kêe u cɛ̀nmpe kurugo,
u kabwɔhigii kurugo,
u à cyire ɲcyiimu pyi sùpyirʼá ke.
9 Byage mpyi mpimu na ke,
u à pire kan pi à bya a tìn,
katege mpyi mpimu na ke,
u à pire kan pi à lyî a tìn.
10 Pìi mpyi a tɛ̀ɛn numpini i,
kwùŋi numpini i.
Pire mpyi yyefuge e yɔ̀rɔyi na kàsuŋi i,
11 Kile jwumpe ɲcyéŋi kurugo,
mà bâra nìɲyiŋi u Kileŋi yɛrɛyi nlògombaaŋi kurugo.
12 Lire kurugo,
u à kanhare yaha pi na fo mà pi tîrige.
Pi à cwo,
shin ɲyɛ a ta si pi tɛ̀gɛ mɛ.
13 Mà pi yaha kuru yyefuge e,
pi à mɛɛ wà Kafooŋi á,
ka u u pi yige puru cwɔ̀nrɔmpe e.
14 U à pi dìrʼa yige numpini i,
kwùŋi numpini i,
maa pi yapwoyi kwɔ̀n a láha pi na.
15 Pi Kafooŋi kêe u cɛ̀nmpe kurugo,
u kabwɔhigii kurugo,
u à cyire ɲcyiimu pyi sùpyirʼá ke.
16 Ɲaha kurugo yɛ,
u à kàsubage bàrayi dàɲyɛtɔɔnnɔ wuyi murulo,
maa ku yashwɔhɔyi tɔɔnmbiigii kyɛɛgɛ.
17 Pìi mpyi na funŋɔbaara karigii pyi,
ka yyefuge si pi ta pi ntìimbaaŋi kurugo.
18 Yalyire puni la mpyi a wwû pi na,
fo mà kwùŋi pyi u à byanhara pi na.
19 Mà pi yaha kuru yyefuge e,
pi à mɛɛ wà Kafooŋi á,
ka u u pi yige puru cwɔ̀nrɔmpe e.
20 U à jwo ke,
ka pi i ɲcùuŋɔ,
u à pi shwɔ fanŋke na.
21 Pi Kafooŋi kêe u cɛ̀nmpe kurugo,
u kabwɔhigii kurugo,
u à cyire ɲcyiimu pyi sùpyirʼá ke.
22 Pi sáraya wwû pi i fwù kan Kile á,
pi i u kapyiiŋkii cêe mɛɛ ná funntange e.
23 Pìi mpyi suumpe lwɔhe ɲuŋʼi kwooyi i,
pire mpyi na cwɔ̀hɔnte pyi lùbwɔhe ɲuŋʼi.
24 Pire mú à Kafooŋi kapyiiŋkii ɲya,
maa u kakyanhala karigii nimpyiiŋkii ɲya suumpe lwɔhe niɲcuguŋke e.
25 U à jwo ke,
ka kafebwɔhɔ si yîri,
mà lwɔhe pyi ku u fuuli na yîri.
26 Pi bakwooyi mpyi maha fulʼa yîri nìɲyiŋi i,
maa núrʼà tîge lwɔhe e,
pi múnahigii mpyi a sìi mpuŋɔ na.
27 Yyemahaŋkʼà pi ta,
pi i tìintaa simbyaa fiige.
Pi funŋɔ kaceni puni mpyi a pînni.
28 Mà pi yaha kuru yyefuge e,
pi à mɛɛ wà Kafooŋi á,
ka u u pi yige puru cwɔ̀nrɔmpe e.
29 U à kafebwɔhe yyéreŋɛ,
ka lùfuuɲjirige si ntɛ̀ɛn.
30 Ku ntɛ̀ɛnŋʼà pi funɲyi táan,
ka Kafooŋi si pi yyaha cû a kàre pi ɲyii tayyerege e.
31 Pi Kafooŋi kêe u cɛ̀nmpe kurugo,
u kabwɔhigii kurugo,
u à cyire ɲcyiimu pyi sùpyirʼá ke.
32 Pi u mɛge mpèeŋi jáara sùpyire nimbinnibii shwɔhɔlʼe,
pi i u kêe kacwɔnrɔbii nimbinnibii shwɔhɔlʼe.
33 Uru u maha baabii kɛ̂ɛnŋʼa pyi siwaga,
maa lùbilibii pyi tawaga,
34 maa ɲìŋke nintange kɛ̂ɛnŋʼa pyi nimpɛngɛ,
ku tɛɛnfeebii pege kurugo.
35 U mú à síwage kɛ̂ɛnŋʼa pyi lwɔhɔ cyaga,
maa ɲìŋgage kɛ̂ɛnŋʼa pyi lùbiliwe.
36 U à kuru pyi kategefeebii tatɛɛngɛ,
pirʼa ku pyi kànha,
sùpyii tatɛɛngɛ.
37 Ka pi i wa na faaŋi pyi maa ɛrɛzɛn cire cɛnmi,
maa yasɛrɛ niɲyahara taa.
38 Kile à jwó lwɔ́ pi na maa pi pyi pi a ɲyaha sèlʼe,
u ɲyɛ a là yaha lʼà fworo pi yatɔɔre e mɛ.
39 Pìi fànha à pa ɲcyɛ́rɛ fo mà pi ɲùɲyi sôgo,
nàɲwɔhɔre ná kanhare ná nàvunŋke cye e.
40 Kafooŋi à fahante pyi tʼà nɔ fànhafembwoyi na,
maa pi yaha pi i ɲaare piye ɲùŋɔ kurugo síwage kuro bàa woge e.
41 Ŋka,
u à kanhamafeebii yige pi yyefuge e,
maa pi sùpyire pyi tʼà ɲyaha yatokuruŋɔ fiige.
42 Shintíibii sí lire ɲya si mpyi funntange e,
ŋka shinpiibii puni ɲwɔyi sí n-tò.
43 Yákilifeebii ka lire ɲya,
pi si li cè na Kafooŋi à ɲwɔ.