Izirayɛli shiinbii ɲwɔmɛyahare ná Kile ɲwɔmɛfente kani
106
Yii Kafooŋi kêe!
Yii fwù kan Kafooŋi Kile á,
ɲaha kurugo yɛ,
u à ɲwɔ,
u cɛ̀nmpe sì n-sìi n-kwɔ̀ mɛ.
2 Jofoo u sí n-jà Kafooŋi kabwɔhigii puni kyaa jwo,
si u kêe u kakeeŋkii puni i yɛ?
3 Shinŋi u ɲyɛ na ɲaare kuntiini i,
maa katiigii pyi tèrigii puni i ke,
urufoo wuunʼà ɲwɔ.
4 Kafooŋi,
mu aha a ɲwɔge ma shiinbii na,
ma a funŋɔ cwo na na.
Mu aha a sí pi shwɔ,
ma a ɲwɔ na na,
5 bà mii sí mpyi si nta yyeɲiŋke e,
ná mu shincwɔnrɔbilʼe,
si mpyi funntange e ná mu shiinbii funntangawuubilʼe,
si ɲùɲjirire ta ná mu wuubilʼe mɛ.
6 Wuu à kapegigii pyi wuu tulyeyi fiige,
wuu à kapyimbaagii pyi,
maa ɲcɛ̀ɛgɛ ta.
7 Mà wuu tulyeyi yaha Misira Kìni i,
pi ɲyɛ a mpyi a mu kakyanhala karigii yyaha cè mɛ.
Kacɛnŋkii mu à pyi pi á ke,
pi funŋʼà filʼa wwɔ̀ cyire na,
maa ɲùŋɔ kyán mu na suumpe lwɔhe ɲwɔge na,
Suumpe Lwɔhe Niɲyage ɲwɔge na.
8 Lire ná li wuuni mú i,
u à pi shwɔ u mɛge kurugo,
si li cyêe pi na,
na uru u ɲyɛ javooŋi.
9 U à sêe Suumpe Lwɔhe Niɲyage na,
ka kuru si waha,
ka u u pi jyiile kuru wyicuguŋke na,
bà wà maha siwaga jyiile mɛ.
10 U à pi shwɔ pi zàmpɛɛnbii na,
maa pi wwû pi kyéregefeebii cye e.
11 Lùfuuɲjirigʼà pi ntùntaɲɛɛbii lyî,
ali pi shin niŋkin ɲyɛ a shwɔ mɛ.
12 Lirʼà pyi ke,
ka pi i dá u jwumpe na,
maa myahigii cêe maa u kêe.
13 Li bá ɲyɛ a mɔ mɛ,
ka pi i filʼa funŋɔ wwɔ̀ u kabwɔhigii nimpyiiŋkii na,
nde u mpyi a bégele pi mɛɛ na ke,
pi bá ɲyɛ a lire sige mɛ.
14 Ka yaaya niɲyahaya lapege si jyè pi e síwage e,
ka pi i Kile ɲwɔ cû wani.
15 Ɲyɛ,
ka Kile si pi yacyage kan pi á,
ŋka u à kwɔ̀ maa yampimpe pà yaha pi na.
16 Mà pi yaha pi tatɛɛnge e,
ka Musa yiɲcyɛge si jyè pi e,
mà bâra Arɔn na,
uru ŋgemu u mpyi a yaha uye kanna na Kafooŋi á ke.
17 Ka ɲìŋke si múgo maa Datan jò,
maa Abiramu ná u shɛ̀rɛfeebii ɲwɔ tò.
18 Nagʼà sùguro pi wwòɲɛɛbii ɲuŋʼi,
naɲiŋkʼà pire shinpiibii súugo fee fee.
19 Pi à sɛɛnŋi tɛ̀gʼa nunaga yaa Horɛbua ɲaŋke na,
maa niŋkure sínni kuru cyeyi yayaaŋke taan.
20 Pi à sìnampefoo Kile fáa
ná ɲyɛlyi nu nàɲja e.
21 Pi à funŋɔ wwɔ̀ pi shwofooŋi Kile na,
uru ŋgemu u mpyi a kabwɔhigii pyi Misira kìni i ke.
22 U à kakyanhala karigii pyi Kyamu kìni i,
u à fyagara karigii pyi Suumpe Lwɔhe Niɲyage e.
23 Kile mpyi a jwo uru sí pi shi bò,
ŋka Musa u ɲyɛ u shincwɔnrɔŋi ke,
ka uru si jyè pi ná Kile shwɔhɔlʼe,
maa Kile fɔ̀ɔnŋɔ u àha pi shi bò mɛ.
24 Pi à lire kìni niɲcɛnni faha,
pi ɲyɛ a ɲɛnʼa dá Kile jwumpe na mɛ.
25 Pi à jwoore pyi pi vàanɲyi bayi i,
maa ɲcyé si n-lógo Kafooŋi ɲwɔ na.
26 Ɲyɛ ka Kile si ŋkâa pi á,
na uru sí pi yaha pi kwû síwage e,
27 si pi tùluge yaha ku bò supyishiŋi sanŋi cye kurugo,
si ku bwɔ̀n ɲcaala kìrigilʼe.
28 Pi à taha kacyiinni Baal Pehɔri fye e,
maa kwúsun yaare lyî.
29 Pi à Kafooŋi lùuni yîrige ná pi kapyiiŋkilʼe,
ka kwuyampe si jyè pi e.
30 Ɲyɛ,
ka Fineyasi si yîri maa lire kani cwɔɔnrɔ,
ka kwuyampe si yyére.
31 Lire kani kurugo,
ka Kafooŋi si jwo na u à tíi,
mà lwɔ́ lire tèni na fo tèekwombaa.
32 Pi à Kafooŋi lùuni yîrige Meriba lwɔhe cyage e,
ka lire si kapii pyi lʼà Musa ta.
33 Pi à Musa lùuni yîrige,
ka lire si u pyi u à jwuɲjwumbaama jwo.
34 Pi ɲyɛ a supyishiŋi sanŋi shi bò
mu à jwo bà Kafooŋi mpyi a yi jwo pi á mɛ,
35 ŋka pi à wùrugo supyishiŋi sanŋi shwɔhɔlʼe,
maa wa na pire u kapyiiŋkii tàanni.
36 Pi à pire u kacyanhigii sun,
ka lire si mpyi kànhaŋa pi á.
37 Pi bá à pi pùnampyire ná pi pùcempyire
pyi sáraga jinabilʼá.
38 Pi à shintíibii sìshyange wu,
pi pùnampyire ná pi pùcempyire sìshyange kyaa li.
Pi à pire pyi sáraga Kana kìni kacyɛnhigilʼá,
ka kuru sìshyange si kìni ɲwɔhɔ.
39 Pi à piye ɲwɔhɔ pi kapyiiŋkii cye kurugo,
maa mpyi ɲwɔmɛyahamii pi toroŋkanni nimpiini kurugo.
40 Ɲyɛ,
ka Kafooŋi lùuni si yîri u shiinbii taan,
ka u yabiliŋi wuubii la si wwû u na.
41 U à pi le supyishiŋi sanŋi cye e,
ka pi ntùntaɲɛɛbii si mpyi pi ɲùŋufeebii.
42 Pi zàmpɛɛnbilʼà pi kyérege,
maa pi kûrʼa le pi fànhe ɲwɔhʼi.
43 Kafooŋi à pi shwɔ tooyo niɲyahayʼe,
ŋka pi à kwôro na ɲùŋu kyange,
maa là bâra pi kapyimbaagii na.
44 Lire ná li wuuni mú i,
u à pi tùpyaagii lógo ke,
mà pi yaha pi yyefuge e.
45 U à funŋɔ cwo u tunmbyaare na pi kàmpanŋke na,
maa ɲùɲaara ta pi na,
u ɲùmpiŋke kurugo.
46 Mpii pi mpyi a pi cû a kàre bilere e ke,
u à pi ɲùɲaare le pire e.
47 Kafooŋi wuu Kileŋi,
wuu shwɔ,
wuu yige supyishiŋi sanŋi shwɔhɔlʼe maa wuu wà wuye na,
bà wuu sí n-pyi sʼa mu mɛge niɲcɛnŋke kêre,
si wuu pèente ɲùŋke pyi mu ŋkèeŋi mɛ.
48 Pèente ti taha Kafooŋi,
Izirayɛli u Kileŋi na fo tèekwombaa
Sùpyire puni ti jwo:
«Amiina.»
Yii Kafooŋi kêe.