Kile na ɲyɛ ɲwɔmɛɛ niŋkin foo
105
Yii fwù kan Kafooŋi Kile á,
yii i u mɛge kêe,
yii u kabwɔhɔgii kyaa jwo sùpyire punʼá.
2 Yii myahigii cêe u á,
yii u pêe ná myahigilʼe,
yii u kakyanhala karigii puni kyaa jwo.
3 Yii a u mɛge niɲcɛnŋke pêre,
Kafooŋi cyafeebii,
yii pyi funntange e.
4 Yii a Kafooŋi ná u fànhe caa,
yii a filili u na tèrigii puni i.
5 Kacɛnŋkii nimbwɔhigii u à pyi ke,
yii funŋɔ cwo cyire na,
kakyanhala karigii ná yoge karigii u à pyi ke,
yii funŋɔ cwo cyire na,
6 yii pi ɲyɛ u báarapyiŋi Ibirahima tùluge shiinbii ná u shincwɔnrɔbii,
Yakuba pyìibii ke,
yii kyaa li.
7 Uru u ɲyɛ Kafooŋi wuu Kileŋi.
U na u fànhe pyi ɲìŋke puni ɲuŋʼi.
8 U tunmbyaare kani na ɲyɛ u funŋʼi tèrigii puni i,
u mpyi a puru jwumpe jwo tùluyo kampwolʼá.
9 U à tire le ná Ibirahima e,
maa ti pyi ŋkàaga Isiyaka á.
10 U à tire pyi sàliya mà kan Yakuba á,
maa ti pyi tunmbyara niɲjirigembaara Izirayɛli á na:
11 «Mii sí Kana kìni kan mu á,
lire sí n-pyi yii nàzhan kɔɔgɔ.»
12 Lirʼà pi ta shinpaanra kanna,
pi mpyi a ɲyaha mɛ,
maa mpyi nàmpantɛɛnlii kìni i.
13 Pi mpyi maha yîri supyishiŋi wʼe maha ŋkàre wabɛrʼe,
maha yîri saanre tʼe maha ŋkàre tabɛre e.
14 Ŋka,
Kile ɲyɛ a ɲɛɛ wà u pi kyérege mɛ,
u à saanbii faha pi kurugo,
na:
15 «Yii àha n-bwɔ̀n na ninɲcwɔnrɔbii na a dɛ,
yii àha kapii pyi na tùnntuunmpii na mɛ!»
16 U à katege cyán kìni na,
ka sùpyire yalyire puni si ŋkwɔ̀.
17 U mpyi a nàŋi wà yaha u à kàre u shiinbii yyaha na,
uru u mpyi Yusufu,
ŋgemu pi mpyi a pɛ́rɛ biliwe fiige ke.
18 Pi mpyi a yɔ̀rɔyi le u tooyi na,
maa tɔɔnɲyɔ le u yacige e,
19 mà sà nɔ fo u jwumpe tèefunŋɔni na,
sùpyaŋi shiŋi u ɲyɛ u wi ke,
Kafooŋi jwumpʼà pa lire cyêe.
20 Ka saanŋi si kuni kan pi u cye yaha,
sùpyire ɲùŋufooŋʼà u yige.
21 Ka u u u yaha u pyɛnge karigii yyahayyerete na,
maa u yaha u cyeyaayi puni ɲuŋɔ na,
22 u raa fànhafeebii kɛ̂ɛnŋi u ɲɛɛmpe,
u u yákilifente cyêe shinlyeebii na.
23 Ɲyɛ,
ka Izirayɛli si ŋkàre Misira kìni i,
Yakuba à sà ntɛ̀ɛn Kyamu kìni i.
24 Kafooŋi à u shiinbii pyi pi à ɲyaha sèlʼe,
maa pi fànhe ɲyaha pi zàmpɛɛnbii woge na.
25 U à Misira shiinbii funɲyi kɛ̂ɛnŋɛ,
ka pi i u shiinbii kyaa pɛn piyʼá,
maa u báarapyiibii cùmulemɛ pi.
26 Ka Kile si u báarapyiŋi Musa ná u shincwɔnrɔŋi Arɔn tun pi á.
27 Ka pire si u kabwɔhigii pyi Misira shiinbii shwɔhɔlʼe,
maa kakyanhala karigii pyi Kyamu shiinbii yyére.
28 Ka Kafooŋi si numpini tùugo,
ka numpiriŋke si jyè kìni i,
pi ɲyɛ a cyé u jwumpe na mà?
29 U à pi lwɔhe puni kɛ̂ɛnŋʼà pyi sìshyan,
ka pi fyaabii sí n-kwû.
30 Ka pi kìni si ɲî ntàsɛɛnbii na,
fo mà sà nɔ pi saanbii bashwɔnyi na.
31 U à jwo ke,
ka sisɔnnɔnte
ná lùpaanre si mpa kìni puni i.
32 U à zànhafunɲcɛɛnɲyi tùugo pi á zànhe cyaga,
maa naɲiŋke pyi kìni i.
33 U à pi ɛrɛzɛncire ná pi fizheciyi kɛ̀ɛgɛ,
maa kìni cire kyɛɛgɛ.
34 U à jwo sahaŋki ke,
ka kampɛɛnmbiiyi si fworo,
mà bâra kampɛɛnɲyɛ niɲyahaɲyahaya na.
35 Ka yire si ɲyɛge puni lyî,
maa ɲìŋke yasɛɛre puni lyî.
36 U à pi kìni pyìcyiibii puni bò,
pire pi ɲyɛ pi fànhe yasɛɛre niɲcyiire.
37 Lire kàntugo,
ka Kile si Izirayɛli shiinbii yige pi nintugobii wyɛ́rɛfyinŋi ná sɛɛnŋi na,
tùluge kà shin ɲyɛ a kwôro kàntugo yyére mɛ.
38 Pi ŋkàreŋi mpyi a sàa táan Misira shiinbilʼe,
ɲaha kurugo yɛ,
pi mpyi a sàa fyá pi yyaha na.
39 Ka Kafooŋi si ɲahaŋa tɛ̀gʼa u shiinbii tò,
numpilage e,
naɲiŋke mpyi maha bɛ̀ɛnmpe kaan pi á.
40 Pi à kyara ɲáara ke,
ka u u sanntuubii pìi kan pi á,
maa yalyirea kan pi á mà yîri nìɲyiŋi i fo mà pi funɲyi ɲíŋɛ.
41 U à kafaaga ɲwɔ múgo,
ka lwɔhe si wa na fworo kurʼe,
na fwu na ŋkɛ̀ɛge síwage kurugo ba fiige.b
42 U à funŋɔ cwo u ɲwɔmɛɛni niɲcɛnni na,
u báarapyiŋi Ibirahima á.
43 U à u shiinbii yige funntange funŋke e,
u shincwɔnrɔbii nivworobii mpyi na funntanga kwuuyi wàa.
44 U à supyishiŋi sanŋi taare kan pi á,
u à supyishiŋi wabɛrɛ u cyempyige tɔɔn kan pi á,
45 bà pi si mpyi si uru tùnnture yige ti kuni i,
sʼa uru sàliyaŋi kurigii ɲaare mɛ.
Yii Kafooŋi kêe!