Fwùŋi ɲyɛ yaayi puni dávooŋi Kile wu
104
Na zòmbile,
fwù kan Kafooŋi Kile á,
Kafooŋi,
mii u Kileŋi,
mu à sàa pêe,
bwompe ná sìnampe pu ɲyɛ mu yaleere.
2 Mu à bɛ̀ɛnmpe le maye na vàntinmbwɔhɔ fiige,
mu à nìɲyiŋi pìli mu à jwo vàanŋa baga.
3 Mu à ma bayi yyéreŋɛ nìɲyiŋi lwɔhe ɲuŋʼi,
maa ɲahaɲyi pyi ma wòtorobii,
mu maha ɲaare kafɛɛge fukanɲyi ɲuŋʼi.
4 Mu maha kafɛɛge pyi ma tùnntuunbii,
maa naɲyiŋke pyi ma báarapyiibii.
5 Mu à ɲìŋke tìŋɛ ku núcyange ɲuŋʼi,
ku sì n-sìi ɲcúnŋɔ mɛ.
6 Mu mpyi a ku tò ná lùbwɔhe e vànntinmbwɔhɔ fiige,
lwɔhe mpyi a ɲaɲyi ɲùŋɔ jò.
7 Mu à sêe lwɔhe na,
ka ku u fê,
mu à tîn,
ka ku u kuye yîrige.
8 Kʼà dùgo ɲaɲyi na mà tîge ɲaɲyi kacyewyiyi i,
mà kàre ku tatɛɛnge e,
mu à kuru ŋkemu yaa ku mɛɛ na ke.
9 Mu à tɛgɛlɛ bwɔ̀n,
lwɔhe ɲyɛ a yaa ku ndemu yi,
si ŋkwɔ̀ mpa ɲìŋke tò sahaŋki mɛ.
10 Mu maha lùbilibii lwɔhe pyi ku u fwu lùŋkuubilʼe,
ku maha fwu ɲaɲyi ná yiye shwɔhɔlʼe.
11 Ku maha mpyi sige yaare lùbyaga,
sige dùfaanɲyi maha yi byage kwùu ku na.
12 Sanɲcyɛɛnre maha ti shèere yaa ku ɲwɔge na,
ti maha yu cire wyɛɛre shwɔhɔlʼe.
13 Mu maha ntɛ̀ɛn ma tatɛɛnge e nìɲyiŋi na,
maa zànhe cyán ɲaɲyi ɲuŋʼi.
Ɲìŋkʼà mu numpyiini tɔ̀ɔnŋi ta fo mà tîn.
14 Mu maha ɲyɛge pyi kʼà fyîn yatɔɔrʼá,
maa sùpyire yafaante pyi tʼà fyîn.
Lire pyiŋkanni na,
pi maha pi ɲwɔlyiŋi taa ɲìŋke e,
15 mà bâra ɛrɛzin sinmpe na,
puru maha pi funɲyi táan,
ná sìnmpe,
puru maha yyahayi pyi yi i ɲî,
ná yalyire,
tire maha fànha le pi e.
16 Kafooŋi cire maha lwɔhe ta a tîn,
u Liban kìni sɛdiri cire niɲcɛnmɛre maha lwɔhe ta sèlʼe.
17 Sanɲcyɛɛnre maha shèere yaa tire cire e,
bànaŋkɔnnɔyi si i yi tatɛɛnyi yaa sipɛrɛ citɔɔnyi i.
18 Ɲaɲyi nintɔɔnɲyʼà pyi sige sikyaabii tashwɔnɲyi,
kafawyiyi si ɲyɛ yiribii taŋwɔhɔge.
19 Kafooŋi,
mu à yiŋke dá si tèni láha liye na,
canŋaɲyiini mú sʼà li tèecwuuni cè.
20 Mu maha numpini pyi lʼà pa,
numpilagʼasi wwɔ̀,
lire tèni i sige yaare puni maha yîri na ɲaare.
21 Cànralyevɔnɲyi maha ŋkwòore yi yalyire kurugo,
yi maha yi ɲjyìŋi caa Kile á.
22 Canŋaɲyiini ká fwore,
yi maha núru,
maha ŋkàrʼa sà sínni yi cyeyi i.
23 Lire tèni i sùpyaŋi maha fworʼa kàre u faaŋʼá,
u maha u kapyiini pyi maha nɔ fo yàkoŋke na.
24 Ei Kafooŋi,
mu kapyiiŋkilʼà sàa ɲyaha,
mu à cyire puni pyi ná yákilifente e.
Ɲìŋkʼà ɲî mu yadaɲyi na.
25 Suumpe lwɔhe ku ŋke,
kʼà pêe ku yyahʼà pêe,
ku funŋke ɲyii yaayi pɛ̀rɛgɛ ɲyɛ a cè mɛ,
yi nimpyɛɛre bâra nimbwoyi na.
26 Bakwooyi maha ɲaare na mâre kʼe,
Leviyatana mu à dá ke,
uru maha bâhare kʼe.
27 Mu yire yaayi puni ɲyɛ na wíi,
mu u yire yalyire kan yirʼá ti têekanlʼe.
28 Mu aha ti kan yʼá,
yi maha ti shwɔ,
mu aha ma cyɛge múgo,
yi maha yacɛnɲyi ta fo maha yi funɲyi ɲíŋɛ.
29 Ŋka mu aha kàntugo wà yʼá,
yi funɲyi maha sàa pɛn.
Mu aha yi ŋɔni shwɔ yi na,
yi maha ŋkwû,
maa ŋkɛ̂ɛnŋʼa pyi pworo sahaŋki.
30 Mu aha ma kafɛɛge fwɔ,
yabɛrɛ maha mpyi,
mu maha ɲìŋke núruŋʼa pyi nivɔnŋɔ.
31 Kafooŋi sìnampe pu kwôro fo tèekwombaa,
Kafooŋi u pyi funntange e u kapyiŋkii kurugo.
32 U aha u yyahe le ɲìŋke e,
ku maha ɲcyɛ̂ɛnni,
u aha bwɔ̀n ɲaɲyi na,
yire maha naŋguruge yige.
33 Mii sí raa myahigii cêe Kafooŋi á na canmpyaagii puni i,
mà mii yaha shì na,
mii sí raa na Kileŋi kêre.
34 Mii mɛɛni li táan u á,
Kafooŋi u ɲyɛ mii funntange ɲùŋke.
35 Kapimpyiibii puni pi pînni ɲìŋke na,
shinpii kà sìi núru mpyi mɛ.
Na zòmbile,
fwù kan Kafooŋi á.
Yii Kafooŋi kêe.