Wuu fwù kan Kafooŋi Kile á u cɛ̀nmpe kurugo
103
Dawuda mɛɛni là.
Mii sí n-sìi fwù kan Kafooŋi Kile á.
Mii sí n-sìi u mɛtange jwo ná na zòmbilini puni i.
2 Mii sí n-sìi fwù kan Kafooŋi á,
mii funŋɔ sì n-wwɔ̀ u kacɛnni là niŋkin na mɛ.
3 Uru u maha mii ntìimbaaŋi puni yàfani mii na,
maa mii tayayi puni kwùu.
4 Uru u maha mii shwuu fanŋke na,
maa ɲjire taha mii na ná u cɛ̀nmpe ná u ɲùmpiŋke e.
5 U à mii funŋke ɲíŋɛ na shìŋi canmpyaagii puni i ná yacɛnyi i,
maa mii kafuge tèni fànhe fiige núruŋʼa le mii i,
ɲyɛŋi fànhe fiige.
6 Ntìiŋi karigii Kafooŋi maha mpyi,
pi maha ɲcwu mpimu na ke,
u maha pire tànga kaan.
7 U à u funŋke jwo Musa á,
maa u kabwɔhigii cyêe Izirayɛli shiinbii na.
8 Kafooŋi u ɲyɛ ɲùɲaare ná ɲùmpiŋke foo,
u lùuni ɲyɛ a wyɛ̀rɛ mɛ,
tɛgɛlɛ ɲyɛ u cɛ̀nmpe na mɛ.
9 U ɲyɛ na lawwuuge pyi tèrigii puni i mɛ,
u lùyiriwuŋi sì n-kwôro tèrigii puni i mɛ.
10 U ɲyɛ a wuu cû a tàanna ná wuu kapegigilʼe mɛ,
u ɲyɛ a wuu sâra a tàanna ná wuu ntìimbàaŋi i mɛ.
11 Bà nìɲyiŋi ná ɲìŋke shwɔ̀hɔŋʼà pêe mɛ,
mpii pi ɲyɛ na fyáge u na ke,
amuni u cɛ̀nmpʼà pêe pire kàmpanŋke na.
12 Bà canŋafyinmpe ná canŋacwumpe shwɔ̀hɔŋʼà tɔɔn mɛ,
amuni u à wuu ná wuu ntìmbaaŋi shwɔ̀hɔŋi tɔɔn.
13 Bà pyìibii tuŋi ɲùŋke maha mpi ná pi e mɛ,
amuni Kafooŋi ɲùŋke maha mpi ná u yyahafyagare feebilʼe.
14 Ɲaha na yɛ,
u à wuu yaaŋkanni cè,
u à cè na wuu na ɲyɛ pworo.
15 Sùpyaŋi shìŋi na ɲyɛ mu à jwo ɲyɛ̀purugo,
u maha yafyɛɛnre pyi sige yafwɔhɔfwɔhɔyi fiige.
16 Kafɛɛgɛ ka fwɔ,
ti maha mpînni,
cyage e ti mpyi ke,
wà sàha maha ɲcè mɛ.
17 Ŋka mpii pi ɲyɛ na fyáge Kafooŋi na ke,
u sí raa cɛ̀nmpe pyi pire na canŋa maha canŋa ná tèrigii puni i.
U sí raa katiigii pyi pi pyìibii ná pi ɲampyire na,
18 pire mpimu pi maha yaha u tunmbyaare karigii na,
maa u toŋi kapyaagii kurigii ɲaare ke.
19 Kafooŋi à u saanre tatɛɛnge yaa nìɲyiŋi i,
u na ɲyɛ yaayi puni ɲùŋɔ na.
20 Yii pi ɲyɛ u mɛ̀lɛkɛ fànhaɲyanhaga wuubii,
maa báare u à,
maa u ɲwɔmɛɛni cû ke,
yii a Kafooŋi kêre.
21 Yii pi ɲyɛ u kàshicyɛge,
maa báare u á,
maa u ɲyii wuuni pyi ke,
yii a Kafooŋi kêre.
22 Yii puni pi ɲyɛ u yadayi maa mpyi u fànhe ɲwɔhʼe cyeyi puni i ke,
yii a Kafooŋi kêre.
Mii sí n-sìi fwù kan Kafooŋi á.