Yyefugofoo Kileɲarege
102
Yyefugʼà shinŋi ŋgemu fànha kwɔ̀ ke,
uru u à Kafooŋi Kile ɲaare maa u funŋke puni jwo u á.
2 Kafooŋi,
na ɲarage lógo,
na yini yaha li nɔ ma na.
3 Mii yyefuge tèni i,
ma hà ma yyahe ŋwɔhɔ na na mɛ.
Mii aha mu yyere canŋke ŋkemu i ke,
ma niŋgyiini pɛrɛ ma a na yini lógo,
ma a na ɲwɔ shwɔ fwɔ fwɔ.
4 Ɲaha kurugo yɛ,
mii shìŋi canmpyaagii na ŋkwùu na wà bà naŋgurugo ɲyɛ mɛ,
mii kaciiyi si i súuge na fiige.
5 Mii zòŋʼà cwɔ̀nrɔ,
u à waha ɲyɛwaga fiige,
mii funŋɔ bá maha wwɔ̀ ɲjyìŋi na.
6 Mii kyɛɛnnʼà mii sɛɛge pyi,
kʼà tàra mii kaciiyi na.
7 Mii à pyi mu à jwo sige sanɲcyɛnga,
mu à jwo zhìtorogo,
ŋkemu ku maha ŋwɔhɔni katahʼe ke.
8 Mii na shwuun ɲyii na,
mu à jwo sanɲcyɛɛnni li ɲyɛ liye niŋkin baga ɲuŋʼi ke.
9 Mii zàmpɛɛnbii na mii fare canŋa maha canŋa,
pi maha mii fwɔ́hɔre maa mii mɛge tɛ̀gɛ na piye láŋi.
10 Cwɔɔnre ti ɲyɛ mii yalyire,
mii ɲyilwɔhʼà wùrugo mii lùbyage e,
11 mu lùyirini ná nàvunŋke kurugo,
ɲaha kurugo yɛ,
mu à mii lwɔ́ a wà tatɔɔnge e.
12 Mii shìŋi canmpyaagii na ntîri yàkoŋke mbyimpe fiige,
mii sí i ware bà ɲyɛ ɲyɛ mɛ.
13 Ŋka Kafooŋi,
mu wi ke,
mu sí n-kwôro Saanwa tèrigii puni i,
lyeɲwɔyi puni sí raa mu kyaa yu.
14 Mu sí n-yîri,
si ɲwɔ Siyɔn kànhe na,
tènʼà nɔ mu u ɲùɲaara ta ku na,
tèni kyaa li mpyi a jwo ke,
lʼà sàa nɔ.
15 Ɲaha kurugo yɛ,
ku kafaayi kyalʼà sàa táan mu báarapyiibilʼá,
ku pwoore ɲùɲaare mú na ɲyɛ pi e.
16 Lire e,
supyishiŋi sanŋi puni sí raa fyáge Kafooŋi mɛge na,
ɲìŋke saanbii sí raa ɲcyɛ̂ɛnni u sìnampe yyaha na.
17 Ɲaha kurugo yɛ,
Kafooŋi sí núru Siyɔn kànhe faanra,
u sí uye cyêe u sìnampe e.
18 U sí u niŋgyiini pɛrɛ yyefugofooŋi ɲarage na,
u sì n-cyé u ɲarage na mɛ.
19 Mpe pu sémʼa yaha lyeɲwɔyi nimpaɲyi yyaha na,
sùpyire ti sí n-pa kàntugo ke,
bà tire sí mpyi si Kafooŋi kêe mɛ.
20 Mà Kafooŋi yaha nìɲyiŋi na u tasinaŋke e,
u à ɲùŋke sôgo maa wíi ɲìŋke na.
U à tɛ̀ɛn nìɲyiŋi na maa ɲìŋke wíi,
21 bà u sí mpyi si kàsujyiibii kyɛɛnni lógo,
mpii pi à yaha mbòŋi laage e ke,
si pire shwɔ mɛ.
22 Lire ká mpyi,
Kafooŋi mɛge kyaa sí n-jwo Siyɔn kànhe e,
si u kêe Zheruzalɛmu i,
23 sùpyire ká bú wà tiye na tèni ndemu i,
ka kìrigii si cyiye bínni si Kafooŋi kêe ke.
24 Kile à mii fànhe cyɛ́rɛŋɛ mii nàɲjiige tèni i,
maa mii shìŋi canmpyaagii kwɔ̀n a cyán.
25 Ka mii i jwo:
«Kile,
mu u ɲyɛ mu shìŋi canmpyaagii sì n-sìi ŋkwɔ̀ mɛ,
ma hà na lwɔ́ si na yaha na shìŋi niŋke e mɛ.
26 Mà lwɔ́ fo tèemɔni i,
mu à ɲìŋke dá,
nìɲyiŋi si ɲyɛ mu cyeyi yayaaŋa.
27 Yire sí n-pa n-kwɔ̀,
ŋka mu sí n-kwôro fo tèekwombaa.
Yi sí n-lyɛ vànɲjyɛgɛ fiige,
mu sí yi fáa bà wà maha vàanntinŋɛ fáa mɛ,
yi sí n-kwɔ̀.
28 Ŋka,
mu sí n-kwôro ma lyempe e,
mu canmpyaagii sì n-sìi n-kwɔ̀ mɛ.
29 Mu bilibii pyìibii sí yyeɲiŋɛ tatɛɛngɛ ta,
pi tùluge sí n-pyi mu yyahe taan tèrigii puni i.»