Saanŋi ɲwɔmɛɛni niɲjwooni
101
Dawuda mɛɛni là
Mii sí cɛ̀nmpe ná ntìiŋi cêe mɛɛ,
Kafooŋi Kile,
mii sí mɛɛ cêe si mu kêe.
2 Mii sí naye waha si raa ɲaare kuntiini i.
Ɲaha tère e mu sí n-pa mii yyére yɛ?
Mii sí raa ɲaare ná zòvyinre e,
na pyɛngɛ shiinbii shwɔhɔlʼe.
3 Mii sì ɲɛɛ kakuuŋke kà tufiige na mɛ,
mpii pi ɲyɛ pi ɲyɛ na fyáge Kile na mɛ,
pire kapyiiŋkilʼà pɛn mii á,
cyi kaɲwɔɔ ɲyɛ mii á mɛ.
4 Zòŋkuuyi feebii laaga tɔɔn na na,
mii sì n-sìi ɲɛɛ kakuuŋɔ na mɛ.
5 Shin maha shin u maha u shinɲɛɛŋi mɛge kɛ̀ɛge ŋwɔhɔre e ke,
mii sí urufoo ɲwɔge tò.
Yàmpeente feebii pi ɲyɛ pi ɲyɛ na piye cyíin sɔ̂nŋi mɛ,
mii sì zò sú pire taan mɛ.
6 Mii sí n-yaha sèe shiinbii na kìni i,
si pi pyi pi tɛ̀ɛn na taan.
Mpii pi ɲyɛ na ɲaare ntìiŋi kuni i ke,
pire pi sí raa báare mii á.
7 Nàŋwɔhɔre pyifooŋi wà tufiige tatɛɛngɛ ɲyɛ a sìi mii bage e mɛ,
kafiniviniŋi wà tufiige tayyerege ɲyɛ mii yyahe taan mɛ.
8 Canŋa maha canŋa ɲyɛ̀gɛ na,
mii sí kìni shinpiibii puni shi bò,
bà kakuumpyiibii sí n-pyi si ŋkwɔ̀ Kafooŋi kànhe e mɛ.