Wuu mɛɛ cêe wuu u Kafooŋi kêe
98
Mɛɛni
Yii Kafooŋi Kile kêe ná mɛɛ nivɔnni i,
ɲaha kurugo yɛ,
u à kakyanhala karii pyi,
u à sífente ta u cyɛge fànhayahaga woge ná niɲcɛnŋke cye kurugo.
2 Kafooŋi à li cyêe na uru u ɲyɛ shwofooŋi,
u à li cyêe supyishiŋi na,
na urʼà tíi.
3 U ɲyɛ a funŋɔ wwɔ̀ u cɛ̀nmpe ná u ɲwɔmɛfente na Izirayɛli shiinbilʼá mɛ.
Diɲyɛŋi sùpyire punʼà li ɲya na wuu Kileŋi u ɲyɛ shwofooŋi.
4 Yii Kafooŋi kêe diɲyɛ supyire puni.
Yii funntanga myahii cêe fànha na u á.
5 Yii myahigii cêe Kafooŋi á ná ŋkɔ̀nnɔŋi i,
yii i u kêe ná ŋkɔ̀nnɔŋi myahigilʼe.
6 Yii u kêe ná mpuruge ná mpúruwaani myahigilʼe,
yii funntanga myahii cêe fànha na Sanbwɔhe,
Kafooŋi yyahe taan.
7 Suumpe lwɔhe ná ku funŋɔ yaayi puni yʼa tùnmpe nimbwompe pyi,
mà bâra diɲyɛŋi ná u funŋɔ yaayi puni na.
8 Baabii puni pi a kaŋkurigii kwòre,
ɲaɲyi puni yi wwɔ̀,
yi raa funntange tùnmbwompe pyi,
9 Kafooŋi yyahe taan,
ɲaha kurugo yɛ,
u sí n-pa.
U sí n-pa yoge kwɔ̀n ɲìŋke na.
U sí yoge kwɔ̀n ɲìŋke na ntìiŋi funŋke e,
si yoge kwɔ̀n supyishiŋi puni na,
ná sèeŋi i.