Kafooŋi Kile u ɲyɛ Saanŋi
97
Kafooŋi Kile u ɲyɛ Saanŋi!
Ɲìŋke sùpyire ti pyi múguroŋi i,
suumpe lwɔhʼà kìrigii ɲcyiimu kwûulo ke,
cyire puni shiinbii pi pyi funntange e.
2 Ɲahaŋa nimbwɔhɔ ná numpiriŋkʼà u kwûulo,
Ntìiŋi ná sèeŋi u à tɛ̀gʼa u Saanre ɲwɔhɔ cyán.
3 Nage na ɲî na wà u yyaha na,
maa u zàmpɛɛnbii súuge kànmpaɲyi puni na.
4 U kileɲjini bɛ̀ɛnmpe na ɲyɛ diɲyɛŋi cyeyi puni i,
ɲìŋke maha lire ɲya maa fyá na ɲcyɛ̂ɛnni.
5 Ɲaɲyi maha ɲani seŋkuro fiige Kafooŋi yyahe taan,
Yi maha ɲa ɲìŋke puni Kafooŋi yyahe taan.
6 Nìɲyii cyeyi maha u ntìiŋi kyaa yu,
supyishiŋi puni maha u sìnampe ɲya.
7 Kacyinzuunbii puni,
pire mpimu pi maha pi kàsinmɛɛŋkii yogolo ná yire ɲùŋɔ bàa yaayi i ke,
pi ɲùɲyi yi sôgo silige cye e.
Kilebii puni pi niŋkure sín Kafooŋi yyahe taan.
8 Siyɔn kànhʼà yire lógo maa múgoro.
Kafooŋi,
Zhuda kànyi shiinbii na ɲyɛ funntange e,
mu kakwɔnɲjyahani kurugo.
9 Ɲaha kurugo yɛ,
Kafooŋi,
mu u ɲyɛ Kileŋi nìɲyiwuŋi diɲyɛŋi puni ɲuŋɔ na.
Mu à fànha tò kilebii puni na.
10 Yii mpimu pi à Kafooŋi kyaa táan yiyʼá ke,
yii kapegigii kyaa pɛn yiyʼá.
Mpii pi à piye pwɔ u na ke,
u maha pire múnahigii kàamucaa,
maa pi shwuu shinpiibii na.
11 Bɛ̀ɛnmpe maha fworo shintíiŋʼá,
zòɲcɛnŋi foo maha mpyi funntange e.
12 Yii shintíibii pi pyi funntange e Kafooŋi kurugo,
yii i u mɛge niɲcɛnŋke cêe mɛɛ.