Yii mɛɛ nivɔnɔ cêe Kile á
96
Yii mɛɛ nivɔnɔ cêe Kafooŋi Kile á,
diɲyɛŋi sùpyire puni ti mɛɛ cêe Kafooŋi á.
2 Yii mɛɛ cêe Kafooŋi á,
yii i u mɛge pêe,
yii a yi yu canŋa maha canŋa na uru u ɲyɛ shwofooŋi.
3 Yii a u sìnampe kyaa yu supyishiŋi punʼá,
yii raa u kabwɔhigii kyaa yu sùpyire punʼá.
4 Kafooŋi à pêe,
u mú à yaa ná ŋkèeŋi nimbwoŋi i.
U na ɲyɛ fyagara yaaga,
mà tòro kilebii puni na.
5 Supyishiŋi sanŋi kilebii puni na ɲyɛ laaga bàa,
ŋka Kafooŋi u à nìɲyiŋi yaa.
6 Pèente ná sìnampe ɲyɛ u á,
u cyage niɲcɛnŋkʼà ɲî sífente ná sìnampe na.
7 Ɲìŋke sùpyire puni,
yii pèenɛ taha Kafooŋi na,
yii a Kafooŋi sìnampe ná u mpèeŋi kyaa yu.
8 Yii pèenɛ taha Kafooŋi mɛge na,
yii pa jyè u pyɛnge e ná yii sárage yaayi i.
9 Yii yaleere fyìnmpe woore le yiye na,
yii i niŋkure sín Kafooŋi taan.
Diɲyɛŋi sùpyiibii puni,
yii a fyáge Kile na fo yii a ɲcyɛ̂ɛnni.
10 Yii yi jwo supyishiŋi punʼá na:
«Kafooŋi u ɲyɛ Saanbwɔhe.»
Ɲìŋkʼà tígile,
ku sì n-cúnŋɔ mɛ.
U sí yoge kwɔ̀n supyishiŋi na ná ntìiŋi i.
11 Nìɲyiŋi u pyi funntange e,
ɲìŋke kʼa múgure.
Suumpe lwɔhe ná ku funŋɔ yaayi puni yʼa tùnmbwompe pyi.
12 Sige ná ku funŋɔ yaayi puni yʼa múgure,
sige cire puni tʼa funntanga myahigii cêe
13 Kafooŋi yyahe taan,
ɲaha kurugo yɛ,
u sí n-pa.
U sí n-pa yoge kwɔ̀n ɲìŋke na,
u sí yoge kwɔ̀n diɲyɛŋi sùpyire na ntìiŋi funŋke e,
si supyishiŋi yoge kwɔ̀n si ntàanna ná u sèeŋi i.