Wuu niŋkure sín wuu u wuu dávooŋi Kile pêe
95
Yii à ma wuu u funntanga myahii cêe wuu Kafooŋi Kile á,
wuu funntanga kwuuyo wà wuu kafaage ná wuu shwofooŋi á.
2 Wuu sà yyére u yyaha yyére ná u pèente myahigilʼe,
wuu funntanga myahii cêe wuu u pêe.
3 Ɲaha kurugo yɛ,
Kafooŋi u ɲyɛ Kilebwoŋi.
Saanbwoŋi wi,
ŋgemu u ɲyɛ kilebii puni ɲuŋɔ na ke.
4 Ɲìŋke tacuguyi na ɲyɛ u cye e,
ɲaɲyi ɲùɲcyeyi mú na ɲyɛ u wuyo.
5 Suumpe lwɔhe na ɲyɛ u wogo,
ɲaha kurugo yɛ,
uru u à ku dá,
u cyeyi yʼà ɲìŋke niŋgwage mú yaa.
6 Yii a ma wuu u lyêele u taan wuu u pêe,
wuu niŋkure sín Kafooŋi á,
uru u à wuu dá.
7 Ɲaha kurugo yɛ,
uru u ɲyɛ wuu Kileŋi.
Wuu pi ɲyɛ u shiinbii,
u na mpimu kàanmucaa ke,
mpàabii,
u cyɛge na mpimu nâha ke.
Yii aha u mɛjwuuni lógo niɲjaa,
8 yii àha yii niŋgyiigii waha,
bà lʼà pyi canŋka Meriba e mɛ,
bà lʼà pyi síwage e Masa karigii canŋke mɛ.
9 Wani yii tulyeyʼà mii Kile ɲwɔ cû,
pi à mii pyi a wíi,
maa li ta,
pi mpyi a mii kapyiiŋkii ɲya.
10 Tire sùpyirʼà tiye la wwû mii na yyee beeshuunni funŋʼi,
Ka mii i ŋkwɔ̀ a jwo:
«Ŋge supyishiŋi zòompilʼà cɛɛnnɛ,
pi ɲyɛ na mii kurigii ɲaare mɛ.»
11 Lire e,
mii lùyiri wuŋʼà kâa ɲjwo:
«Pi sì n-sìi n-jyè mii taŋɔŋke e mɛ.»