Kile u ɲyɛ shintíiŋi wogigii cwɔɔnrɔfooŋi
94
Kile u maha ŋkooŋwuure pyi ke,
Kafooŋi Kile u maha ŋkooŋwuure pyi ke,
maye cyêe!
2 Diɲyɛŋi yukyaaŋi,
yîri.
Yàmpeente feebii sâra ma tàanna ná pi kapyiiŋkilʼe.
3 Fo ɲaha tère e yɛ,
Kafooŋi,
fo ɲaha tère e shinpiibii funntange sí n-kwɔ̀ yɛ?
4 Pi maha yu ɲwɔbwɔhɔ na,
pi jwumpe na súuli.
Pire kapiimpyiibii puni maha piye pêre.
5 Pi maha mu shiinbii cwɔ̀nhɔni Kafooŋi,
pi maha mu kìni shiinbii kyérege.
6 Pi maha leŋkwucyeebii ná nàmpwunntɛɛnbii bùu,
pi maha círimpii múnahigii wwû.
7 Cyire mú i,
pi maha jwo:
«Kafooŋi ɲyɛ na yafyin ɲaa mɛ,
Yakuba u Kileŋi ɲyɛ na kàanmucyaga pyi mɛ.»
8 Sìɲcoyo yà ye,
yii a yiye kàanmucaa dɛ!
Yákili bàa yaaya yà ye,
ɲaha tère e yii sí yákili ta yɛ?
9 Kile u à niŋgyiini kan sùpyaŋʼá ke,
uru sí n-jà mpyi na u aha raa núru mà?
Uru u à ɲyiini yaa ke,
u sí n-jà mpyi u aha raa ɲaa mà?
10 Uru u maha supyishiŋi kíbe,
maa ɲcèŋi kaan sùpyirʼá ke,
u sí n-jà mpyi na u àha yii kúu mà?
11 Kafooŋi à sùpyaŋi funzɔnŋɔre cè,
ti na ɲyɛ laaga bàa.
12 Kafooŋi,
mu aha sùpyaŋi ŋgemu kúu,
maa u taanna ma sàliyaŋi karigii na ke,
urufoo wuunʼà ɲwɔ.
13 Ŋgwahaŋi ká nɔ u na,
mu maha u zòŋi taala,
mà jwo shinpiibii kacyewyige ku tùgo ke.
14 Kafooŋi sì u shiinbii wà n-yaha mɛ,
u sì n-cyé u wuubii na mɛ.
15 Yoge saha sí n-kwɔ̀n sèeŋi ɲuŋʼi,
zòɲcɛɛnmpii feebii sí ɲɛɛ u na.
16 Jofoo u sí ntùŋɔ taha shinpiibii na ná mii i yɛ?
Jofoo u sí n-bâra mii na si shinkuuyi tùn yɛ?
17 Ká mpyi Kafooŋi ɲyɛ a mpyi a mii tɛ̀gɛ mɛ,
pòori kyaa,
mii múnaani mpyi na sí n-kàre vyâhaŋi cyage ea.
18 Mii aha jwo:
«Mii tooyi na ɲcyɛ̂ɛnni,»
lire tèni i mu cɛ̀nmpe maha mii tígilʼa yyéreŋɛ Kafooŋi.
19 Mii funmpɛn karigii ká ɲyaha tèni ndemu i ke,
mu maha mii zòŋi taala,
maa mii funŋke táan.
20 Mu sí n-jà n-pyi yukyaabii nintíimbaabii wwoɲɛɛ la?
Pire maha sàliyaŋi mɛgɛ le maa yyefuge wàa sùpyire na.
21 Pi maha ntùŋke taha shintíiŋi na,
maa ɲcɛ̀ɛgɛ bàa fooŋi múnaani le kwùŋi i.
22 Ŋka Kafooŋi u ɲyɛ mii kàshisulukaaŋke,
mii u Kileŋi u ɲyɛ mii taŋwɔhɔge kafaage.
23 U sí pi pege núruŋɔ ɲcyán pi na,
si pi shi bò pi kapegigii kurugo.
Kafooŋi,
wuu u Kileŋi sí pi shi bò.