Kile u ɲyɛ u wuubii taŋwɔhɔge
91
Ŋgemu ká ŋwɔhɔ nìɲyiŋi u Kileŋi kàntugo ke,
urufoo sí taŋɔŋɔ ta Siŋi Punifoo mbyimpe e.
2 Urufoo sí n-jwo Kafooŋi Kileŋi á:
«Mu u ɲyɛ mii taŋwɔhɔge
ná mii kàshisulukáaŋke.
Mu u ɲyɛ mii Kileŋi,
mii à na sɔ̀nŋɔre taha mu na.»
3 Uru u sí mu shwɔ kànhaɲcyaanbii kànhaɲyi na,
si mu shwɔ kafɛɛge yampimpe kakyaare na.
4 U sí mu le u fukange ɲwɔhʼi,
mu sí ŋwɔhɔ u fukange ɲwɔhʼi.
U ɲwɔmɛfente sí n-pyi mu tɔɔnte yabeŋke ná mu tɔɔnte vànntinŋke.
5 Mu sì raa fyáge numpilage yafugoyi na mɛ,
lire ɲyɛ mɛ,
canŋke tàanbii niŋgaabii na mɛ,
6 lire ɲyɛ mɛ,
kafɛɛge yampimpe pu maha ɲaare numpini i ke,
lire ɲyɛ mɛ,
kawaagii cyi maha sùpyire bùu canvwuge na ke.
7 Shiin kampwoo mɛɛ ká ɲcwo mu taan,
ka shiin kanmpwɔhii kɛ si ɲcwo mu kàniŋke na,
yafyin sì mu ta mɛ.
8 Ɲyiigii múgo ma a wíi kanna,
sàraŋkanni na Kile sí shinpiibii sâra ke,
mu sí lire ɲya.
9 Sèeŋi na,
mii à naye tíiŋɛ Kafooŋi na.
Mu aha nìɲyiŋi Kileŋi pyi ma taŋwɔhɔge,
10 kapii sì n-sìi mu ta mɛ,
yyefugo mú sì ɲcwo mu pyɛnge na mɛ.
11 Ɲaha kurugo yɛ,
u sí yi jwo u mɛ̀lɛkɛɛbilʼá,
pi i yaha mu na ma tashyeyi puni i.
12 Pire sí mu cwɔhɔ ná pi cyeyi i,
bà li si mpyi,
kafaaga kà ŋkwɔ̀ mu tɔɔge kà bânni mɛ.
13 Mu sí ɲaara cànrage ná màcwɔnŋi ɲuŋʼi,
yi sì yaaga pyi mu na mɛ.
Mu sí cànralyevɔnŋke ná wwòpege tánhana n-tòro.
14 Kafooŋi à jwo:
«Ná u sʼà mii kyaa táan uyʼá,
mii sí u shwɔ.
Ná u sʼà mii mɛge cè maa ku pêe,
mii sí n-yaha u na.
15 U aha mii yyere,
mii sí u ɲwɔ shwɔ.
Mii sí n-pyi ná u e u cwɔ̀nrɔmpe tèni i,
mii sí u yige pʼe si u pêe.
16 Mii sí shìtɔɔnwɔ kan u á fo si u funŋke ɲíŋɛ,
si li cyêe u na,
na mii u ɲyɛ u shwofooŋi.»