Sémeŋi Sicyɛrewuŋi
(Zaburu 90—106)
Sùpyaŋi shìŋʼà bere ŋka Kile na ɲyɛ takwɔgɔ bàa
90
Kile sùpyaŋi Musa kileɲarage.
Kafooŋi,
mu à pyi wuu taŋwɔhɔge tèrigii puni i.
2 Mà jwo ɲaɲyi yi dá ke,
mà jwo ɲìŋke ná ku ɲuŋɔ yaayi yi dá ke,
mà lwɔ́ fo tasiige e,
mu u ɲyɛ Kile,
mu sí n-kwôro fo tèekwɔmbaa.
3 Mu u maha sùpyaŋi núruŋɔ pwoore e,
mu maha jwo:
«Adamapyiibii,
yii núru pwoore e!»
4 Ɲaha kurugo yɛ,
yyee kanmpwoo na ɲyɛ mu ɲyii na
mu à jwo taɲjaa canŋke kʼà tòrʼà kwɔ̀ ke,
mu à jwo numpilage tèni là.
5 Mu maha pi pînniŋɛ bà ŋɔɔgɔ maha mpînni mɛ,
pi maha mpyi mu à jwo ɲyɛge kʼà fyîn ɲyɛ̀ge na ke.
6 Ku maha fyɛ̀n ɲyɛ̀ge na,
yàkoŋke,
yafyɛɛnre maha fàan maa waha.
7 Mu nàvunŋkʼà wuu súugo,
mu lùyirinʼà wuu pyi wuu à fyá a wùrugo.
8 Mu à wuu ntìimbaaŋi karigii yaha ma yyahe taan,
maa wuu numpire karigii yaha ma yyahe bɛ̀ɛnmpe na.
9 Mu lùyirintoronʼà wuu shìŋi bere,
Wuu shìŋi maha ŋkwɔ̀ ŋɔŋkyara niŋkin funŋʼi.
10 Wuu shìŋi maha jà a yyee beetaanre ná kɛ kwɔ̀.
Fànhaɲyahaga wuubii maha jà a yyee beecyɛɛre kwɔ̀.
Ŋka cyire yeegii fànha maha mpyi kanhara ná yyefugo.
Ɲaha kurugo yɛ,
cyi maha filʼà kwɔ̀,
wuu asi bíi.
11 Jofoo u à mu nàvunŋke fànhe ɲyahaŋkanni cè yɛ?
Mu lùyirini li maha sùpyaŋi pyi u u fyáge mu yyaha na ke,
jofoo u à lire fànhe ɲyahaŋkanni cè yɛ?
12 Wuu taanna wuu shìŋi canmpyaagii tɔrɔŋkanni na,
bà wuu sí n-pyi si funɲcwugo zòmpyaa ta mɛ.
13 Kafooŋi Kile,
núrʼa pa wuu á,
wuu sí mu ɲyii cyán zà nɔ fo ɲaha tère na yɛ?
Ɲùɲaara ta ma báarapyiibii na.
14 Ɲyɛ̀ge ká sʼà múgo,
wuu ɲî ma cɛ̀nmpe na,
lire ká mpyi,
wuu sí raa ŋkwúuli funntange cye e wuu shìŋi canmpyaagii puni i.
15 Canmpyaagii pɛ̀rɛge wuu à pyi ɲùzogore e mu á ke,
cyire fiige funntanga kan wuu á.
Yeegii pɛ̀rɛge wuu à pyi yyefuge e ke,
cyire fiige funntanga kan wuu á.
16 Ma kabwɔhigii pìli ma báarapyiibii yyaha na,
ma a ma sìnampe cyêe pi pyìibii na.
17 Kafooŋi wuu Kileŋi,
jwóŋi lwɔ́ wuu na,
ma a wuu cyeleŋkarigii yaha cyi a sì yyaha na.
Ɔɔn,
wuu cyeleŋkarigii yaha cyi a sì yyaha na.