Kile na ɲyɛ ɲwɔmɛɛ foo
89
Ezerayiti tùluge shinŋi Etan kàlaŋi mɛɛni.
2 Mii sí raa Kafooŋi Kile cɛ̀nmpe cêe mɛɛ tèrigii puni i,
Mii sí raa mu ɲwɔmɛfente kyaa yu tèrigii puni i.
3 Mii à jwo,
ɲjwo mu cɛ̀nmpe na ɲyɛ tèrigii puni wumɔ,
mu à ma ɲwɔmɛfente yalʼa tìŋɛ nìɲyiŋi i.
4 Kafooŋi à jwo:
«Mii à tunmbyara le ná na niɲcwɔnrɔŋi i,
mii à kâa na báarapyiŋi Dawuda á ɲjwo:
5 “Tèrigii puni i,
mii sí mu shiŋi yaha u pyi ná ɲùŋufente e,
mii sí mu saanre pyi ti tígile fo têekwombaa.”»
Shelaa
6 Kafooŋi,
nìɲyiŋi ná u funŋɔ yaayi puni sí raa mu kêre ma kabwɔhigii kurugo,
sʼa mu ɲwɔmɛfente kyaa yu niɲcɛnmpii tabinniyi i.
7 Kafooŋi Kile,
mu ɲcaŋi u à sìi nìɲyiŋi i jofoo yɛ?
Nìɲyiŋi yadaŋke ŋkire ku sí n-jà kuye tàanna ná mu i yɛ?
8 Kile yadaɲyi niɲcɛnɲyi tabinnage e,
yi punʼà sìi na fyáge u yyaha na.
U à sìi fyagara yaaga mà tòro u kwùumpe yaayi puni na.
9 Kafooŋi,
Siŋi Punifoo Kile,
mu fiige sífooŋi u à sìi jofoo yɛ?
Kafooŋi,
ɲwɔmɛfentʼà mu kwûulo cyeyi puni i.
10 Mu u maha suumpe lwɔhe yàmpeente wwû kʼe,
kʼahaa fuuli na yîri,
mu u maha ku fɔ̀ɔnŋɔ.
11 Mu u à Arahavub cwɔ̀nhɔnɔ mà bò,
mu à ma zàmpɛɛnbii bwɔ̀n a caala ná ma cyɛge fànhaɲyahaga woge e.
12 Nìɲyiiŋi ɲyɛ mu wu,
ɲìŋke mú ɲyɛ mu wogo.
Mu u à diɲyɛŋi ná u funŋɔ yaayi puni dá.
13 Mu u à suumɔ kùluni ná wwòro kùluni dá.
Tabɔri ɲaŋke ná Hɛrimɔ ɲaŋke maha múguri mu mɛge kurugo.
14 Mu cyɛge fànhʼà ɲyaha,
mu cyɛgʼà bìli,
mu kàniŋɛ cyɛgʼà yîrigʼa yaha.
15 Ntìiŋi ná sèeŋi u à tɛ̀gʼa mu Saanre ɲwɔhɔ cyán,
cɛ̀nmpe ná ɲwɔmɛfente si ɲyɛ mu yyahe taan tèrigii puni i.
16 Kafooŋi,
mpii pi à mu pèeŋkanni cè ná funntange e ke,
pire wuunʼà ɲwɔ.
Pi sí raa ɲaare mu yyahe bɛ̀ɛnmpe na.
17 Mu mɛge kurugo,
pi sí n-pyi funntange e canmpuni,
pi sí pèenɛ ta mu ntìiŋi kurugo.
18 Ɲaha kurugo yɛ,
mu u ɲyɛ pi fànhe sìnampe.
Mu cɛ̀nmpe maha wuu fànhe pyi kʼà ɲyaha.
19 Sèeŋi na,
wuu sanɲcwɔnsigiŋi kani ɲyɛ Kafooŋi cye e,
Wuu Saanŋi kataanmpe ɲyɛ Izirayɛli u niɲcɛnŋi cye e.
20 Mu à têlʼa jwo ná ma yyahafyagare feebilʼe ŋɔɔge kʼe
na:
«Mii à kàshikwɔnmpege kà tɛ̀gɛ,
mii à nàɲjyiiŋi wà dùrugo sùpyire shwɔhɔlʼe.
21 Mii à Dawuda ta mà pyi na báarapyi,
mii à u tìri ná na sìnmpe niɲcɛnmpe e.
22 Mii cyɛge sí u cû ɲwɔ,
mii yabiliŋi sí fànha le u e.
23 U zàmpɛɛnbii sì n-jà mpâa u e mɛ,
shinpiibii cyɛge mú sì nɔ u na mɛ.
24 Mii sí u ntùntaɲɛɛbii cwɔ̀nhɔnɔ u ɲyii na,
si u màpɛnge feebii tùn.
25 Mii ɲwɔmɛfente ná mii cɛ̀nmpe sí n-pyi ná u e,
u sí fànhaɲyahaga ta mii mɛge cye kurugo.
26 Mii sí u fànhe pìli zà nɔ fo suumpe lwɔhe na,
si u kàniŋɛ cyɛge pyi ku nɔ baabii na.
27 U sí raa mii yiri amɛ:
“Mu u ɲyɛ mii tuŋi,
ná mii u Kileŋi ná mii zhwoŋi kafaage.”
28 Mii sí u pyi na jyaŋi niɲcyiiŋi,
si u pyi ɲìŋke saanbii puni nimbwoŋi.
29 Mii sí na cɛ̀nmpe yaha u yahare e tèrigii puni i,
mii tunmbyaare sí n-fûnŋɔ u kàmpanŋke na.
30 Mii sí u tùluge pyi ku tígile tèrigii puni i,
Ná nìɲyiŋi ɲyɛ a kwɔ̀ mɛ,
u saanre sì n-kwɔ̀ mɛ.
31 «U pyìibii ká mii sàliyaŋi kuni yaha,
pi aha mpyi pi ɲyɛ na ɲaare na tàanni ná mii toŋi i mɛ,
32 pi aha mii kayaani kɛ̀ɛge
maa mpyi pi ɲyɛ a ɲɛɛ mii jwumpe na mɛ,
33 mii sí pi ɲwɔmɛcumbaani fwooni tò pi na ná kàbiini i,
si pi bwɔ̀n pi ntìimbaaŋi kurugo.
34 Ŋka mii sì na cɛ̀nmpe láha pi na mɛ,
mii sì na ɲwɔmɛfente kɛ̀ɛge pi á mɛ.
35 Mii sì na tunmbyaare fyìinnɛ mɛ,
mii sì na jwuɲjwumpe kyáala mɛ.
36 Mii à kâa na tufeempe na tɔɔge kʼe,
ɲjwo,
mii sì n-sìi n-finnɛ Dawuda á mɛ.
37 U tùluge sí n-kwôro fo tèekwombaa,
u saanre sí n-kwôro mii yyahe taan tèrigii puni i canŋaɲyiini fiige.
38 Ti sí n-kwôro fo tèekwombaa yiŋke fiige,
kuru na ɲyɛ shéere sèe wu nìɲyiŋi i.»
Shela
39 Ŋka mu à ma shincwɔnrɔŋi wà a yaha,
mu à cyé u na,
mu lùunʼà yîri u taan.
40 Tumbyaare ti mpyi mu ná ma báarapyiŋi shwɔhɔlʼe ke,
mu à tire kɛ̀ɛge,
mu à u saanre ɲùntoŋke cyán a fwòoŋɔ nìŋke na.
41 Mu à u káaŋke fúrugo,
maa u kàshisulu bayi jya.
42 Kuntorobilʼà ku yaayi kuu,
kʼà pyi ɲjirivaha yaaga ku tɛnɲɛɛbilʼá.
43 Mu à fànha le u ntùntaɲɛɛbilʼe,
maa funntanga kan u zàmpɛɛnbilʼá.
44 Mu à u kàshikwɔnŋwɔɔni ɲwɔge pɛn,
mu ɲyɛ a u tɛ̀gɛ kàshige na mɛ.
45 Mu à u sìnampe láha u na,
mu à u saanre yatɛɛnŋke cyán ɲìŋke na.
46 Mu à u nàɲjyiige tèni bere,
maa u ɲùŋke sôgo silige cye e.
Shela
47 Kafooŋi,
mu sí raa maye ŋwɔhɔni zà nɔ fo ɲaha tère na yɛ?
Mu lùyirini sí raa súuge na fiige zà nɔ fo ɲaha tère na yɛ?
48 Funŋɔ cwo li na,
na mii shìŋi canmpyaagii ɲyɛ a ɲyaha mɛ,
mu à sùpyire dá maa ti pyi kafɛɛgɛ.
49 Sùpyaŋi ŋgire u sí n-kwôro shì na kwûmbaa yɛ?
Jofoo u sí n-jà u munaani shwɔ kwuukànhe na yɛ?
Shela
50 Kafooŋi,
taa mu tèecyiini kacɛnŋkii ɲyɛ ke?
Ko mu mpyi a kâa Dawuda á cyi kyaa na ma ɲwɔmɛfente funŋke e?
51 Kafooŋi,
fahante tʼà nɔ mu báarapyiibii na ke,
funŋɔ cwo tire na.
Funŋɔ cwo li na,
na nte supyiɲyahare tugure ɲyɛ mii ɲuŋʼi.
52 Kafooŋi,
mu zàmpɛɛnbii na mii fwɔ́hɔre.
Pi na mu shincwɔrɔŋi fare.
53 Kafooŋi u kêe tèrigii puni i fo têekwombaa.
Amiina!
Amiina!