Yampiŋi kileɲarage
88
Mɛceeni.
Kore jyaabii mɛɛni là.
Mɛceŋkuruŋke yyaha yyére shinŋi.
Nde mɛɛni maha ɲcêe ná yyetanhare e.
Zeraki tùluge shinŋi Hemani mɛɛni.
2 Kafooŋi Kile,
mii shwofooŋi,
pìlaga bâra canŋa na,
mii na mɛɛ wàa mu á.
3 Na ɲarage yaha ku nɔ ma na,
ma niŋgyiini cyán na parage na.
4 Ɲaha kurugo yɛ,
mii yyefuge cye à tòro,
mii ná kwùŋi shwɔ̀hɔŋi ɲyɛ a kampelaaga kwɔ̀ mɛ.
5 Mii na ntɔ̀re mu à jwo fanŋke funŋke e mii ɲyɛ,
mu à jwo fànbile ɲyɛ mii i mɛ.
6 Mii na ntɔ̀re kwuubilʼe,
mu à jwo sùpyiibii pi à bò a le fanŋke e,
ná mu yákili saha ɲyɛ pi na mɛ,
ná mu saha ɲyɛ a yaha pi na mɛ.
7 Mu à mii le kacyewyicuguŋke e,
numpiriŋke cyage nafyiini na.
8 Mu à ma nàvunŋke sùguro mii ɲuŋʼi,
maa suumpe lwɔhe lùfuuɲjirige tɛ̀gʼa mii ɲuŋɔ jò.
Shelaa
9 Mu à mii shinceempii puni laaga tɔɔn mii na,
maa mii pyi ɲíginɛ yaaga pi á.
Mii à tò,
tafworoŋɔ saha ɲyɛ mii á mɛ.
10 Yyefugʼà mii yyahe wwɔ̀ mii na.
Kafooŋi Kile,
canŋa maha canŋa mii na mu yiri.
Mii à na cyeyi sànha mu á.
11 Kwuubilʼà mu sí raa kabwɔhigii pyi la?
Kwuubii sí n-yîri si mu kêe bɛ?
Shela
12 Taha fanŋke funŋke e mu cɛ̀nmpe kyaa sí raa yu la?
Taha tapinage kacyewyicuguŋke funŋke e mu ɲwɔmɛfente kyaa sí raa yu?
13 Wà sí n-jà mu kakyanhala karigii cè numpiriŋke e la?
Wà sí n-jà mu ntìiŋi cè funŋgwɔɔre cyage e la?
14 Kafooŋi,
mii wi ke,
mu ɲwɔhʼe mii ɲyɛ na ŋkúuli.
Canŋa maha canŋa ɲyɛ̀gɛ na,
mii ɲarage maha nɔ mu na.
15 Ei Kafooŋi,
ɲaha kurugo mu à mii cyé yɛ?
Ɲaha kurugo mu à ma yyahe ŋwɔhɔ mii na yɛ?
16 Mii na ɲyɛ yyefugofoo mà lwɔ́ fo mii nàŋkocyɛɛrewuŋi,
mii na ɲyɛ kwùŋi ɲwɔge e.
Mu à fyagare yaha mii na fo mà mii yákiliŋi wùrugo.
17 Mu lùyirintoronʼà mii puni tò,
yyefuge mu à nɔ mii na ke,
kurʼà mii shi pínniŋɛ.
18 Kʼà mii kwûulo lufoomɔ fiige canŋa maha canŋa,
maa mii ɲùŋɔ jò.
19 Mu à mii ceveebii ná mii tɛnɲɛɛbii laaga tɔɔn mii na,
numpini kanni li ɲyɛ mii tɛnɲɛɛŋi.