Kile maha kacɛnŋkii pyi
92
Mɛɛni.
Canŋɔŋke mɛɛni.
2 Lʼà ɲwɔ na Kafooŋi Kile kêre,
na mu nìɲyiŋi u Kileŋi mɛge cêe,
3 maa mu kacɛnŋkii kyaa yu ɲyɛ̀ge na,
maa mu ɲwɔmɛfente kyaa yu numpilage e,
4 ná mepyaa kɛ ŋkɔ̀nnɔŋi ná mpòoŋke,
ná ŋkɔ̀nnɔbii myagigilʼe.
5 Ei Kafooŋi,
mu kapyiiŋkilʼà mii funŋke táan,
Mii sí raa funntanga katanbogii wàa mu cyɛge kapyiiŋkii kurugo.
6 Kafooŋi,
mu kapyiiŋkilʼà pêe,
mu sɔ̀nŋɔrʼà sàa cûgo.
7 Sìɲcoŋɔ ɲyɛ a ti cè mɛ,
funŋɔbaashin mú ɲyɛ a ti yyaha cè mɛ.
8 Shinpiibii mɛɛ ká a yîri ɲyɛgɛ fiige,
ka shintiimbaabii si wa na fyɛ̀n,
pi sí kakyara fo si pi shi bò.
9 Ŋka mu wi ke Kafooŋi,
mu Saanre sí n-kwôro fo tèekwɔmbaa.
10 Mu zàmpɛɛnbii pi ke,
Kafooŋi,
mu zànmpɛɛbii shi sí n-bò
ntìimbaaŋi pyifeebii sí n-bwɔ̀n n-caala.
11 Mu à mii fànhe ɲyaha sige nu fiige.
Mu à sìnmpuruge tɛ̀gʼa mii tìri.
12 Mii ɲyiinʼà mii zàmpɛɛnbii ɲya pi à cwo,
mii niŋgyiinʼà li mùntanmpe lógo mii ntùntaɲɛɛbii nimpiibii kyaa na.
13 Shintíibii maha dùru sháhaɲcyiin fiige,
pi maha ntɔɔnge Liban sɛdiri cige fiige.
14 Pi na ɲyɛ mu à jwo cicɛnmɛgɛ Kile bage e,
pi sí wevunre yige wuu Kafooŋi ntàani na.
15 Ti mɛɛ ka lyɛ,
ti sí raa seni,
tunmpe sí n-pyi tʼe sèlʼe,
ti sí raa wevunre pyi,
16 si li cyêe na Kafooŋi à tíi,
uru u ɲyɛ mii kafaage,
ntìimbaa ɲyɛ a sìi u e mɛ.