Yyefuge tèni kileɲarage
86
Dawuda kileɲarage.
Kafooŋi Kile,
ma niŋgyiini pɛrɛ ma a na ɲwɔ shwɔ,
ɲaha kurugo yɛ,
mii na ɲyɛ fòŋɔfoo ná yyefugofoo.
2 Na le ma fukange ɲwɔhʼi,
ɲaha kurugo yɛ,
mu yyahafyagare na ɲyɛ mii i.
Mii u ɲyɛ mu báarapyi ke,
mii à naye tíiŋɛ mu na,
mii Kileŋi,
na shwɔ.
3 Kafooŋi,
ɲùɲaara ta na na,
ɲaha kurugo yɛ,
mu mii ɲyɛ na yiri canŋa maha canŋa.
4 Funntanga kan ma báarapyiŋʼá,
ɲaha kurugo yɛ,
mu mii na ɲáare Kafooŋi.
5 Kafooŋi,
mu à ɲwɔ,
mu mú na yàfani.
Mpii puni pi maha mu mɛge yiri ke,
mu maha ɲùɲaara taa pire na.
6 Kafooŋi,
na ɲarage lógo,
maa ma niŋgyiini cyán na parage na.
7 Mii aha mpyi cwɔ̀nrɔmpe e,
mii sí mu yyere,
ɲaha kurugo yɛ,
mu sí mii ɲwɔ shwɔ.
8 Kafooŋi,
mu cyíin ɲyɛ a sìi kilebii shwɔhɔlʼe mɛ,
mu kapyiiŋkii fiige mú ɲyɛ a sìi mɛ.
9 Kafooŋi,
supyishiŋi puni mu à dá ke,
uru sí n-pa niŋkure sín mu taan,
si mu pêe.
10 Ɲaha kurugo yɛ,
mu à pêe,
mu na kabwɔhigii pyi,
mu kanni u ɲyɛ Kile.
11 Kafooŋi,
na taanna ma kuni karigii na,
bà mii si mpyi sʼa ɲaare mu sèeŋi ɲuŋʼi mɛ.
Na zòmbilini wà liye na,
ma a ma yyahafyagare le lʼe.
12 Mii sí mu kêe ná na zòmbilini puni i Kafooŋi mii Kileŋi,
mii sí raa mu mɛge pêre tèrigii puni i.
13 Ɲaha kurugo yɛ,
mu cɛ̀nmpʼà pêe mii kàmpanŋke na,
mu à mii munaani dìrʼa wwû kwùŋi kacyewyige e.
14 Ei Kile,
yàmpeente feebii pìlʼà yîri mii kurugo,
supyikyanyi yà na mii taboŋɔ caa,
pi kuro ɲyɛ a sìi mu i mɛ.
15 Ŋka Kafooŋi,
mu u ɲyɛ ɲùɲaare ná ɲùmpiŋke foo Kile,
mu lùuni ɲyɛ na yîri fwɔ fwɔ mɛ,
mu à ɲî cɛ̀nmpe ná ɲwɔmɛfente na.
16 Yyaha kɛ̂ɛnŋʼa na wíi ma a ɲùɲaara ta na na,
fànhe le ma báarapyinaŋi i,
ma a ma báarapyicwoŋi jyaŋi shwɔ.
17 Pyiŋkanna cyêe na na,
ndemu li sí mii pyi mii i ɲcè na mii sí yyeɲiŋɛ ta ke,
lire ká mpyi,
mii màpɛngefeebii sí lire ɲya si sílige,
ɲaha kurugo yɛ,
mu Kafooŋi u ɲyɛ mii tɛgɛfooŋi si mii funŋke ɲíŋɛ.