Kileɲarage yyeɲiŋke kurugo
85
Mɛceŋkuruŋke yyaha yyére shinŋi.
Kore jyaabii mɛɛni là.
2 Kafooŋi Kile,
mu à kacɛnnɛ pyi ma kìnʼá,
mu à Yakuba shiinbii núruŋʼa tìŋɛ.
3 Mu à ma shiinbii ntìimbaaŋi tugure láha pi na,
mu à pi kapegigii puni yàfa pi na.
Shelaa
4 Mu à ma lùyirini ɲwɔ yaha,
mu à láha ma lùpɛɛnni na.
5 Ei wuu shwofooŋi Kile,
núrʼa pa wuu á,
wuu nàvunŋke ku ɲyɛ mu i ke,
ku kwɔ̀.
6 Mu lùuni sí n-yîri n-kwôro wuu taan la?
Nàvunŋke sí n-kwôro mu na zà nɔ lyeɲwɔyi nimpaɲyi na la?
7 Mu sí fànha le wuu e sahaŋki,
lire sì funntanga kan mu shiinbilʼá mu wwoɲɛɛge e mà?
8 Kafooŋi,
ma cɛ̀nmpe cyêe wuu na,
ma a wuu shwɔ.
9 Kafooŋi Kile na ɲjemu yu ke,
mii na yire núru,
yyeɲiŋke jwumpe u ɲyɛ na yu u shiinbilʼá,
pire mpimu pi ɲyɛ na fyáge u na ke,
ŋka,
pi àha núru pi funŋɔbaara karigii kurugo mɛ.
10 Sèeŋi na,
u zhwoŋʼà byanhara u yyahafyagare feebii na,
bà u sìnampe si mpyi si wuu kìni ɲî mɛ.
11 Cɛ̀nmpe ná sèeŋʼà yiye círʼa ta
ka ntìiŋi ná yyeɲiŋke si yiye pûrʼa cû.
12 Sèeŋi sín-fyîn n-vworo ɲìŋke e,
ntìiŋi si sí n-yîri nìɲyiŋi i si ntîge.
13 Kafooŋi sí u jwóŋi sùguro,
wuu ɲìŋke yafaayi sí ɲwɔ.
14 Ntìiŋi sí raa ɲaare u yyahayyere,
si kuro wwû u á.