Zheruzalɛmu ŋkàriŋi mɛɛni
84
Mɛceŋkuruŋke yyaha yyére shinŋi.
Nde mɛɛnʼà cêe ná Gati shiinbii ŋkɔ̀nnɔŋi i.
Kore jyaabii mɛɛni là.
2 Ei,
Kafooŋi Siŋi Punifoo Kile,
mu tatɛɛnge kyalʼà táan mii á.
3 Kafooŋi Kile pèente bage ntàani sèpɛngʼà sìi mii na
fo na ŋko raa mii bùu.
Mii zòmbilini ná mii cyeere puni na ɲyɛ funntange e
Kileŋi ɲyii wuŋi kurugo.
4 Kafooŋi Siŋi Punifoo Kile,
mii Saanŋi ná mii Kileŋi,
ali zíziinte maha ti ɲùɲyi taŋwɔhɔyi taa,
kùntɛɛnnte mú sí maha ti shèere tayaaŋke taa ti pyìre mɛɛ na
mu sárayi tawwuge ŋkère na.
5 Mpii pi maha ntɛ̀ɛn mu bage e ke,
pire wuunʼà ɲwɔ.
Pire maha mu kêre tèrigii puni i.
Shelaa
6 Mpii pi à mu pyi pi fànhe tatage ke,
pire wuunʼà ɲwɔ.
Mu pyɛnge kuni ɲanʼà táan mpimu á ke,
pire wuunʼà ɲwɔ.
7 Pi mɛɛ ka ŋkuruŋwaga jyiile,
kuru maha ŋkɛ̂ɛnŋʼa pyi lùbiliwe,
bɛ̀ngɛ zànha maha mpa maa là ɲwɔ ku na.
8 Là maha bârali pi niŋkaribii fànhe na na wà,
fo maha sà nɔ Kile taan Siyɔn kànhe e.
9 Kafooŋi Siŋi Punifoo Kile,
na ɲarage lógo.
Yakuba u Kileŋi,
ma niŋgyiini cyán.
Shela
10 Ei Kile,
wuu tɔɔnnte yabeŋke,
saanŋi wíi,
yaha ma shincwɔnrɔŋi na.
11 Mà canmbile niŋkin kanna pyi mu pyɛnge ntàani na,
lirʼà pwɔ́rɔ canmpyaa kanmpwoo na cyage kabɛrʼe.
Mii u yyére Kile bage tajyiɲwɔge na,
lirʼà pwɔ́rɔ shinpiŋi bage ntɛ̀ɛnŋi na.
12 Ɲaha kurugo yɛ,
Kafooŋi Kile na ɲyɛ canŋaɲyii ná tɔɔnnɔ yabeŋɛ.
Kafooŋi maha cɛ̀nmpe ná sìnampe kaan.
Mpii pi ɲyɛ na ɲaare ntìiŋi ɲuŋʼi ke,
u sì pire kún yacɛnŋke kà tufiige na mɛ.
13 Ei Kafooŋi Siŋi Punifoo Kile,
mpii pi à pi sɔ̀nŋɔre taha mu na ke,
pire wuunʼà ɲwɔ!