Kileɲarage zànmpɛɛbii yyaha na
83
Azafu mɛɛni là.
Mɛceeni.
2 Ei Kile,
ma hà vyâha mɛ,
ma hà ŋkwôro yaaga jwumbaa mɛ,
ma hà ntɛ̀ɛn fyii mɛ,
Ei Kile.
3 Wíi,
mu zàmpɛɛnbii na tùnmpe nimbwompe pyi,
mpii pi à ntùŋke taha mu na ke,
pirʼà piye pêe.
4 Pi à vùnŋɔ pwɔ mu shiinbii na,
pi na kapii bégeli mu wuubii mɛɛ na.
5 Pi à jwo:
«Yii a ma wuu u pi shi tò,
Izirayɛli mɛge kà zìi núru mpyi wà funŋʼi mɛ.»
6 Pi punʼà wwɔ̀ funzɔnŋɔrɔ niŋkin na,
maa ɲwɔmɛɛ lwɔ́ piyʼá mu kurugo.
7 Edɔmu shiinbii ná Isumayɛli shiinbii,
Mohabu shiinbii ná Hagari shiinbii,
8 Gebali shiinbii ná Amɔ shiinbii ná Amalɛki shiinbii,
ná Filisi shiinbii ná Tiri kànhe shiinbii.
9 Ali Asiri shiinbii mú à bâra pi na,
maa Loti shiinbii tɛ̀gɛ.
Shelaa
10 Pi pyi bà mu à Madiyani shiinbii pyi mɛ,
pi pyi bà mu à Sisera ná Yabeni shiinbii pyi Kisɔn lwɔhe ɲwɔge na mɛ.
11 Mu à pire kakyara Eni Dɔri i,
ka pi i mpyi ŋkyàra ɲìŋke na.
12 Nde mu à pyi Orɛbu ná Zɛbu na ke,
lire pyi pi ɲùŋufembwoyi na,
ma a Zeba ná Salimuna wuuni fiige pyi pi ɲùŋufeebii na.
13 Pire pi mpyi a jwo:
«Wuu Kile cyage puni shwɔ
wuu pyi wuu wogo!»
14 Ei Kile,
pi pyi mu à jwo kafenaɲjire bamba,
pi pyi mu à jwo kàkyaya,
kafɛɛgʼà ɲjemu lwɔ́ ke,
15 pi pyi mu à jwo bà nage maha sige súugo mɛ,
pi pyi bà nage maha ɲaɲya pàara mɛ.
16 Zànhe kafebwɔhe tɛ̀gʼà pi ɲwɔhɔ lwɔ́,
ma a pi zòompii kwɔ̀n a cyán ná ma zànhe kafɛɛge e.
17 Kafooŋi Kile,
pi sílige fo pi ɲùɲyi yi sôgo,
lire sí pi pyi pi a mu caa.
18 Silige ná fyagare ti pyi pi na tèrigii puni i,
ɲùzogore ti pi kakyara,
19 pi i li cè na mu u ɲyɛ Kafooŋi,
na mu kanni u ɲyɛ nìɲyiŋi u Kileŋi ɲìŋke cyeyi puni ɲuŋɔ na.