Kileɲarage Izirayɛli shiinbii ntɛ̀gɛŋi kurugo
80
Mɛceŋkuruŋke yyaha yyére shinŋi.
Nde mɛɛni cèŋkanni mɛgɛ ɲyɛ:
«Tunmbyaare cire yafyɛɛnre.»
Azafu mɛɛni là.
2 Ei Izirayɛli nâhafooŋi,
ma niŋgyiini cyán,
mu u maha Yusufu shiinbii yyaha cû mpàkuruŋɔ fiige ke,
mu u à tɛ̀ɛn ma saanre tatɛɛnge e Sherubɛɛnbiia shwɔhɔlʼe ke,
ma sìnampe pyi pʼa ɲî.
3 Ma sífente cyêe Efirayimu ná Bezhamɛ ná Manase na,
ma a mpa wuu shwɔ.
4 Kile,
wuu núruŋʼa pa maye yyére,
ma yyecɛnŋke yige wuu á,
lire ká mpyi,
wuu sí n-shwɔ.
5 Ei Kafooŋi Kile,
Siŋi Punifoo,
fo ɲaha tère e mu lùuni sí n-tɛ̀ɛn,
mu u ma shiinbii ɲarage shwɔ yɛ?
6 Mu à pi ɲyilwɔhe tɛ̀gʼa pi ɲwɔ cya,
maa pi lùbyayaage ɲî ɲyilwɔhe na tooyo taanre mà kan pi á.
7 Mu à wuu tɛnɲyɛɛbii yaha pi i ntùnni wuu tatɛɛnge kurugo,
ka wuu zánmpɛɛnbii si wa na wuu fwɔ́hɔre.
8 Siŋi Punifoo Kile,
wuu núruŋʼa pa maye yyére,
ma yyecɛnŋke yige wuu á,
lire ká mpyi,
wuu sí n-shwɔ.
9 Mu à ɛrɛzɛn cige dìrʼa kò Misira kìni i,
mu à supyishiŋi sanŋi kɔ̀rʼa lwɔ́ pi tatɛɛnge e,
maa ku cɛnmɛ kuru cyage e.
10 Mu à cyage yalʼa yaa kʼá,
ka ku u ndìre le,
fo mà kìni ɲî.
11 Ku mbyimpe mpyi a ɲaɲyi puni tò,
ku ŋkéɲyi si ɲyɛ sɛdiri cibwoyo ŋkéye fiige.
12 Ku ŋkéɲyʼà tɔɔn fo mà sà nɔ suumpe lwɔhe ɲwɔge na,
ka ku póroyi si ntɔɔn fo mà sà nɔ Efirati baŋi ɲwɔge na.
13 Ɲaha kurugo mu à ku kàsɔɔge cyán,
ka kuuntoribii si wa na ku yasɛɛre nàŋkaage yɛ?
14 Sige cáabii na ku kɛ̀ɛge,
sige yaare si i ku lyî.
15 Siŋi Punifoo Kile,
náaŋi ma a núrʼa pa,
mà mu yaha nìɲyiŋi i,
ɲùŋke sôgo ma a wíi,
ma a yaha ŋke ɛrɛzɛn cige na,
16 mu kàniŋɛ cyɛgʼà kuru ŋkemu cɛnmɛ ke,
yaha uru pyàŋi na,
mu à uru ŋgemu pyi u u lyɛge ke.
17 Nagʼà ku súugo,
kʼà kwɔ̀n,
mu lùyirinʼà ku puni kɛ̀ɛge.
18 Sùpyaŋi mu à tìŋɛ ma kàniŋɛ cyɛge na ma a u pyi u u lyɛge ke,
ma cyɛge taha uru na ma a yaha u na.
19 Lire ká mpyi,
wuu saha sì laaga tɔɔn mu na mɛ.
Fànfɔnŋɔ kan wuu á,
wuu sí raa mu mɛge kêre.
20 Ei Kafooŋi Kile,
Siŋi Punifoo,
wuu núruŋɔ mayʼá,
ma yyecɛnŋke yige wuu á,
lire ká mpyi,
wuu sí n-shwɔ.