Kileɲarage Zheruzalɛmu kànhe kyaa na
79
Azafu mɛɛni là.
Ei Kile,
supyishiŋi sanŋʼà pa mu taare cû,
pi à mu pèente bage niɲcɛnŋke kafuun pyi,
pi à Zheruzalɛmu kànhe jya fee fee.
2 Pi à mu báarapyiibii bò a kan ɲjaama sanɲcyɛnyʼá,
maa mu yyahafyagare feebii kyaare kan sigeyaayʼá.
3 Pi à pi sìshyange fwu lwɔhɔ fiige,
Zheruzalɛmu kànhe puni i,
sùpya ɲyɛ a ta si kwuubii tò mɛ.
4 Wuu à pyi fahana yaaya wuu tɛnɲɛɛbilʼá,
maa mpyi katanra ná kafwɔhɔrɔ yaaya wuu kwùumpe shiinbilʼá.
5 Ei Kafooŋi Kile,
mu lùuni sí n-yîri wuu taan zà nɔ fo ɲaha tère na yɛ?
Mu yiɲcyɛge sí raa súuge na fiige la?
6 Ma lùyirini sùguro supyishiŋi sanŋi ɲuŋʼi,
pire mpimu pi ɲyɛ pi ɲyɛ a mu cè mɛ,
mà bâra kìrigii na,
cyire ɲcyiimu cyi ɲyɛ cyi ɲyɛ na mu père mɛ.
7 Ɲaha kurugo yɛ,
pi à Yakuba shiinbii kyà,
maa pi tatɛɛnge kɛ̀ɛgɛ.
8 Kapegigii wuu tulyeyʼà pyi ke,
ma hà wuu cû ntàanna ná cyire e mɛ.
Fyâlʼa pa wuu tɛ̀gɛ ma ɲùɲaare kurugo,
yyefuge naha a pêe wuu na sèlʼe.
9 Wuu shwofooŋi Kile,
wuu tɛ̀gɛ,
ma mɛge mpèeŋi kurugo.
Wuu shwɔ maa wuu kapegigii yàfa wuu na,
ma mɛge ntáanŋi kurugo.
10 Ɲaha na mu à supyishiŋi sanŋi yaha u u ŋko:
«Taa pi Kileŋi ɲyɛ ke?»
Mu báarapyiibii sìshyange pi à wu ke,
lire sìshyanwuni ŋkooŋi wû pi na wuu ɲyiigii na,
supyishiŋi sanŋi si lire cè.
11 Ma niŋgyiini cyán kàsujyiibii parage na.
Mpii pi à yaha mbòŋi laagʼe ke,
ma cyɛge fànhaɲyahaga woge tɛ̀gʼa pire shwɔ.
12 Kafooŋi,
wuu tɛnɲɛɛbilʼà fahante ntemu taha mu na ke,
tire fiigii baashuunni tɛ̀gɛ pi na.
13 Lire ká mpyi,
wuu pi ɲyɛ mu shiinbii,
mu mpàabii ninahabii ke,
wuu sí raa fwù kaan mu á tèrigii puni i,
wuu sí raa mu mpèeŋi kyaa yu lyeɲwɔyi nimpayi punʼá.