Nde Kile à pyi u shiinbilʼà tèecyiini i ke
78
Asafu kàlaŋi mɛɛni là.
Mii shiinbii,
yii na kàlaŋi lógo.
Yii yii niŋgyigigii pɛrɛ na jwumpe na.
2 Mii sí na ɲwɔge múgo si tàalinɛ jwo,
mii sí tèni nintoroni jwumpe pà ɲwɔhɔ jwo.
3 Wuu à pu lógo maa pu cè,
wuu tulyeyʼà pu jwo wuu á.
4 Wuu sì pu ŋwɔhɔ wuu pyìibii na mɛ,
wuu sí pu jwo tùluyi nimpaɲyʼá,
wuu sí Kafooŋi Kile kabwɔhigii ná u sífente kyaa jwo yʼá,
si mbâra u kakyanhala karigii na.
5 U à to le a kan Yakuba shiinbilʼá,
maa sàliya tìŋɛ Izirayɛli shiinbii ɲuŋʼi.
U à yi jwo wuu tulyeyʼá na pi pi pyìibii kâla cyire karigii na,
6 bà li si mpyi,
yyeɲwɔyi nimpaɲyi i,
pyìibii pi sí n-pa si ke,
pire mú si cyi cè si pi pyìibii taanna cyi na.
7 Lire ká mpyi,
pi sí pi sɔ̀nŋɔre taha Kile na,
pi sì funŋɔ wwɔ̀ u kabwɔhigii na mɛ,
sʼa u toŋi kurigii ɲaare.
8 Pi sì n-pyi pi tulyeyi fiige mɛ,
pire mpyi ɲwɔmɛcumbaalii maa ɲùŋɔ kyán.
Pi zòompii mpyi a pwɔ Kile na mɛ,
pi mú ɲyɛ a mpyi a kúu Kile á mɛ.
9 Mà sintaayi ná tàanbii yaha Efirayimu tùluge shiinbii cye e,
pi à fê kàshige canŋke kàshige yyaha na.
10 Pi ɲyɛ a kwôro Kile tunmbyaare e mɛ,
pi à cyé sʼa u sàliyaŋi kurigii ɲaare.
11 Pi à funŋɔ wwɔ̀ u kabwɔhigii na,
kakyanhala karigii u à pyi pi ɲyii na ke,
pi à funŋɔ wwɔ̀ cyire na.
12 U à kakyanhala karigii pyi pi tulyeyi ɲyii na
Zohan kùluni i,
Misira kìni i.
13 U à suumpe lwɔhe jya a pyi shuunni
maa pi pyi pi à jyiile,
u à lwɔhe sûlʼa yyereŋɛ kàsɔɔgɔ fiige.
14 Canŋke e,
u mpyi maha pi yyaha cû ná ɲahamɛɛni i,
nupilage e,
u mpyi maha pi yyaha cû ná naɲiŋke e.
15 U à kafaaya jya síwage e,
maa lwɔhɔ niɲyahaga kan pi a bya.
16 U à lwɔhe ɲarʼa yige kafaage e,
ku u fwu ba fiige.
17 Lire ná li wuuni mú i,
pi à kwôro na kapegigii pyi u na,
maa ɲuŋɔ kyán Kile nìɲyiwuŋi na síwage e.
18 Pi à li yîrige li kurugo si Kile ɲwɔ cû,
maa zòɲjyaare tà cya u á si n-lyî.
19 Pi à jwumpimɛ jwo Kile na,
na:
«Kile sí n-jà yalyire kan sùpyirʼá síwage e la?
20 Sèe,
u à kafaage bwɔ̀n,
ka lwɔhe si ɲcânrʼa fworo na fwu sèlʼe,
ŋka,
u sí n-jà bwuuru kan,
lire ɲyɛ mɛ,
mà kyara cya a kan u shiinbilʼá la?»
21 Kafooŋi à yire lógo,
ka u lùuni si yîri,
ka u u nage mîni Yakuba shiinbii mɛɛ na,
ka u lùuni si sàa yîri Izirayɛli shiinbii taan,
22 ɲaha kurugo yɛ,
pi ɲyɛ a dá Kile na mɛ,
pi ɲyɛ a pi sɔ̀nŋɔre taha li na,
na Kile sí n-jà pire shwɔ mɛ.
23 Lire ná li wuuni mú i,
u à kuni kan ɲahaɲyʼá nìɲyiŋi i,
maa nìɲyiŋi ɲwɔyi múgo.
24 U à maniŋi pyi u à tîge zànpya fiige mà kan pi á pi a lyî,
u à nìɲyiŋi yalyire kan pi á.
25 Pi shin maha shin à Kile mɛ̀lɛkɛɛbii yalyire lyî,
u à yalyire kan pi à lyî fo mà tìn.
26 U à canŋafyinmpe kafɛɛge pyi ku u fwu nìɲyiŋi i,
maa wwòrokulo kafɛɛge karima à pyi ku u fwu.
27 U à kyaare sùguro zànpya fiige pi ɲuŋʼi
mà ɲyaha nticyɛnŋi fiige.
Sanɲcyɛɛnrɛ ti mpyi ti ti,
mà ɲyaha suumpe lwɔhe ɲwɔge nticyɛnŋi fiige.
28 U à tire wu pi tatɛɛnge niŋke e
mà pi vàanɲyi bayi kwûulo.
29 Pi à tire lyî a tìn sèe sèlʼe,
nte lage ku mpyi pi na ke,
u à tire kan pi á.
30 Tire zòɲjaare ɲyɛ a pi funɲyi ɲíŋɛ mɛ,
mà yalyire yaha pi ɲwɔyi i,
31 ka Kile lùyirini si n-tîge pi ɲuŋʼi,
maa pi fànhaɲyahaga shiinbii bò,
maa Izirayɛli nàɲjyiibii bwɔ̀n a cyán ɲìŋke na.
32 Lire ná li wuuni mú i,
ka pi i wa na kapegigii pyi sahaŋki,
pi ɲyɛ ɲɛnʼa dá u kakyanhala karigii na mɛ.
33 Lire kurugo u à pi shìŋi canmpyaagii pyi laaga bàa,
maa cyi ɲuŋɔ kuu ná zòŋkwɔnɲcyaanre e.
34 Pìi nʼà mpyi a kwû pi e,
pi saanmpii mpyi maha Kile caa lire tèni i,
maa yyaha kɛ̂ɛnŋɛ u á,
maa núru u á fwɔ fwɔ.
35 Pi funɲyi mpyi maha ɲcwo li na,
na Kile u ɲyɛ pire kafaage,
na nìɲyiŋi u Kileŋi u ɲyɛ pire ɲùŋgwufooŋi.
36 Ŋka pi mpyi maha kayituwɔgɔre yu pi ɲwɔyi i,
maa finni u á ná pi ɲjirigilʼe.
37 Pi zòmpyaagii ɲyɛ a mpyi a pwɔ u na sèlʼe mɛ,
pi ɲyɛ a pyi ɲwɔmɛɛ fee Kile tunmbyaare kàmpanŋke na mɛ.
38 Ŋka ɲùɲaare na ɲyɛ u e,
u à pi kapegigii yàfa pi na,
u ɲyɛ a pi shi bò mɛ.
Tèrii niɲyahigilʼe,
u à u lùyirini sínniŋɛ,
u ɲyɛ a ɲɛnʼa u nàvunŋke sùguro pi ɲuŋʼi mɛ.
39 U à funŋɔ cwo li na,
na sùpyii pi ɲyɛ pi pi kanna,
pi na ɲyɛ kafɛɛgɛ fiige,
kʼaha ntòro,
ku saha ɲyɛ na núruli mɛ.
40 Pi à ɲùŋɔ kyán u na tèrii niɲyahigilʼe síwage e,
maa u lùuni yîrige cyage niŋgwage e.
41 Tère maha tère pi mpyi maha Kile ɲwɔ cû,
maa ŋkwôro na Izirayɛli shiinbii u Kileŋi niɲcɛnŋi lùyiri karigii pyi.
42 Pi à funŋɔ wwɔ̀ u sífente na,
u à tire ntemu tɛ̀gʼa pi yige pi zàmpɛɛnbii cye e ke.
43 U à kabwɔhigii ɲcyiimu pyi pi á Misira e,
maa kakyanhala karigii ɲcyiimu pyi Zohan màhampe e ke,
pi funŋʼà wwɔ̀ cyire puni na.
44 U à Misira kìni baabii lwɔhe kɛ̂ɛnŋʼa pyi sìshyan,
pi ɲyɛ a jà na ku byii mɛ.
45 U à lùkɔɔnɲyɔ tùugo pi á yʼa pi sìshyange byii,
maa ntàsɔnɲyi tùugo pi á yi i pi kakyara.
46 U à pi yafaayi yaha kampɛɛnɲyʼá,
maa pi kanhare tɔ̀ɔnŋi yaha kampɛnmbiiyʼá.
47 U à pi ɛrɛzɛn cire kɛ̀ɛgɛ ná zànhafunɲcɛɛnyi i,
maa pi fizhiye cire kɛ̀ɛgɛ ná wyeere e.
48 U à pi nìiyi bò ná zànhafuɲcɛɛnɲyi i,
maa mpàabii ná sikyaabii kɛ̀ɛgɛ ná kileɲini i.
49 U à u lùyirini nimbwooni cyêe pi na
ná u mùmpɛnmpe ná u nàvunŋke.
U à kakyampyi mɛ̀lɛkɛɛ niɲyahamii tùugo pi á.
50 U à kuni yaha u lùyirinʼá,
u ɲyɛ a pi shwɔ kwùŋi na mɛ,
ŋka u à pi yaha kafɛɛge yampimpe laage e.
51 U à Misira shiinbii pyìcyiibii puni bò,
Kyamu tùluge shiinbii pyìcyiibii kyaa li,
pire pi ɲyɛ pi fànhe yasɛɛre niɲcyiire.
52 Ɲyɛ,
u à u shiinbii yyaha cû mpàkuruŋɔ fiige mà fworo,
u à pi nâhaa síwage e mpànahawa fiige.
53 U à pi yyaha cû a kàre,
maa yaha pi na,
fyagara ɲyɛ a pi ta mɛ,
suumpe lwɔhʼà pi zàmpɛɛnbii lyî.
54 U à sà pi lèŋɛ u taare niɲcɛnnte e,
u ɲaŋke ɲuŋʼi,
u mpyi a kuru ŋkemu kɔ̀rʼa shwɔ ná u cyɛge fànhaɲyahaga woge e ke.
55 U à supyishi niɲyahawa kɔ̀rʼa lwɔ́ wani,
maa pire u taare táa táa mà kan Izirayɛli shiinbilʼá,
pi à pyi kɔɔgɔ.
U à Izirayɛli shiinbii pyi pi à tɛ̀ɛn uru supyishiŋi u bayi i.
56 Lire ná li wuuni mú i,
pi à nìɲyiŋi u Kileŋi ɲwɔ cû,
pi à cyé u na,
pi ɲyɛ a u toŋi kurigii ɲaara mɛ.
57 Pi à kuni yaha maa Kile ɲwɔhɔ yaha pi tulyeyi fiige,
bà sintaage niɲwɔmbaage tàanŋi maha kuzheeni yaha mɛ,
amuni pi à li yaha.
58 Pi à u lùuni yîrige ná tasunɲyi ɲjaaŋi i mpòhigii ɲuŋʼi kileŋi wabɛrʼá,
pi à yiɲcyage leŋɛ u e
ná kacyanhigii zunŋi i.
59 Kile à lire ɲya ke,
ka u lùuni si yîri sèlʼe,
maa ɲcyé Izirayɛli shiinbii na.
60 U tatɛɛnge ku mpyi Silo e ke,
maa ɲcyé kuru na,
kuru ku mpyi u vàanŋke bage sùpyire shwɔhɔlʼe.
61 Tunmbyaare mbwùuni li ɲyɛ na u fànhe ná u sìnampe cyêre ke,
u à lire yaha zàmpɛɛnbii pi à lwɔ́.
62 U à u shiinbii yaha kàshikwɔnŋwɔɔni yahare e,
u lùunʼà yîri u wuubii taan.
63 Nagʼà pi nàɲjiibii súugo
Cikwɔnrɔ myahii ɲyɛ a cêe pi pùcempyirʼá mɛ.
64 Kàshikwɔnŋwɔɔnnʼà tɛ̀gʼa pi sáragawwuubii bò,
pi leŋkwucyeebii ɲyɛ a yamɛɛ sú mɛ.
65 Ɲyɛ,
Kafooŋi à yîri mu à jwo shin u à ɲɛ̀ ŋɔɔmɔ na,
mu à jwo ɛrɛzɛn sinmɛ pʼà là bâra kàshikwɔnmpege ntanha na.
66 U à u zàmpɛɛnbii ninuruveempii bwɔ̀n,
u à pi sílige,
tɛgɛlɛ ɲyɛ silige ŋkemu na mɛ.
67 U à cyé Yusufu bage shiinbii na,
u ɲyɛ a Efirayimu tùluge shiinbii cwɔɔnrɔ mɛ.
68 Zhuda shiinbii u à cwɔɔnrɔ,
Siyɔn ɲaŋke kyaa li,
lire lʼà táan u á.
69 Wani u à u cyage nisinaŋke dùrugo fo nìɲyiŋi i,
mu à jwo ɲìŋɛ,
ŋkemu ku sí n-pyi wani tèrigii puni i ke.
70 U à Dawuda cwɔɔnrʼa pyi u báarapyi,
mpàabii ɲwɔhʼi u à sà u yyere.
71 Mpànɛɛbii na u à u láha,
u u mpa mpyi u shiinbii nàhafooŋi,
pire mpimu pi ɲyɛ Yakuba shiinbii ke,
si n-yaha Izirayɛli shiinbii na,
pire mpimu pi ɲyɛ u yabiliŋi wuubii ke.
72 Ka Dawuda si pi nâha ná funɲcɛnŋʼi,
maa pi yyaha cû ná yákilifente e.