Kile maha mpyi ná u shiinbilʼe yyefuge tèni i
77
Mɛceŋkuruŋke yyaha yyére shinŋi,
Yedutun.
Asafu mɛɛni là.
2 Mii na Kile yiri maa ŋkwúuli.
Mii na Kile yiri u u na yini lógo.
3 Mii yyefuge canŋke,
mii à Kafooŋi cya.
Mii à na cyeyi yîrigʼa yaha u á numpilage e.
Mii ɲyɛ a ɲɛɛ wà tufiige zòntaala jwumɔ na mɛ.
4 Kile kani ká ntîge mii funŋʼi,
mii maha ŋkyɛ̀n.
Mii aha sɔ̂nŋɔ u na,
mii yatanɲyi maha ŋkwû mii na.
Shelaa
5 Mu à mii sige ŋɔɔmpe na.
Mii funŋkʼà wùrugo,
mii saha ɲyɛ a na niɲjwumɔ cè mɛ.
6 Mii na sɔ̂nŋi canmpyagigii nintorogii karigii,
ná yyeegii nintorigii wogigii na.
7 Mii maha sɔ̂nŋɔ na meceɲjɛgigii na,
numpililyɛge e,
mii maha sɔ̂nŋɔ cyire karigii na naye funŋʼi
maa naye yíbe ɲjwo:
8 «Kafooŋi sí n-cyé wuu na si ŋkwôro bɛ?
U sì ɲɛɛ kacɛnnɛ pyi wuu á sahaŋki mà?
9 U cɛ̀nmpʼà yyére amɛ fee fee la?
Pà saha ɲyɛ a sìi u á mà jwo wuu á u shi i mà?
10 Kile à funŋɔ wwɔ̀ si ɲùɲaara ta wuu na bɛ?
U lùunʼà yîri mà u ɲùmpiŋke kwɔ̀ bɛ?»
Shela
11 Mii à jwo:
«Mii yyefuge ɲùŋke ku ŋke,
ɲjwo nìɲyiŋi u Kileŋi saha ɲyɛ na karigii pyi tèecyiini fiige mɛ.»
12 Mii sí funŋɔ cwo Kafooŋi Kile kapyiiŋkii na.
Sèeŋi na,
mii sí funŋɔ cwo mu tèemɔnɔ kakyanhala karigii nimpyiiŋkii na.
13 Mii sí n-sɔ̂nŋɔ mu kapyiiŋkii puni na,
mii sí funŋɔ cwo mu kabwɔhigii na.
14 Kile,
mu kurigilʼà fíniŋɛ,
kileŋi ŋgire u à pêe mu Kile fiige yɛ?
15 Mu u ɲyɛ Kile,
ŋgemu u maha kakyanhala karigii pyi ke.
Mu à ma sífente cyêe sùpyire na.
16 Mu sífente cye kurugo,
mu à ma shiinbii yige cye e,
Yakuba shiinbii ná Yusufu shiinbii.
Shela
17 Ei Kile,
lùbwɔhʼà mu ɲya,
lùbwɔhʼà mu ɲya ke,
maa fyá.
Lwɔhe tunŋʼà cúnŋɔ cúnŋɔ.
18 Ɲahaɲyʼà zànha niɲyahaga cyán,
kileŋi à wwɔ̀ maa ntînni,
mu ŋyahigii mú sí i wàa na mâre.
19 Mu kiletinnʼà fworo zànhe kafebwɔhe funŋke e,
kileɲinʼà bɛ̀ɛnmpe yige diɲyɛŋi cyeyi puni i,
ɲìŋkʼà cúnŋɔ maa ɲcyɛ̂ɛnnɛ.
20 Mu à ma kuni wwû suumpe lwɔhe niŋke e,
mu à ma tatoroge wwû lùbwɔhe e,
ŋka wà ɲyɛ a mu nintahigii fyèŋi ɲya mɛ.
21 Mu à ma shiinbii yyaha cû
Musa ná Arɔn cye kurugo mà kàre mpàkuruŋɔ fiige.