Kile u ɲyɛ Siŋi Punifoo
76
Mɛceŋkuruŋke yyaha yyére shinŋi.
Nde mɛɛni maha ɲcêe ná ŋkɔ̀nnɔŋi i.
Asafu mɛɛni là.
Mɛceeni.
2 Zhuda tùluge shiinbilʼà Kile cè,
U mɛgʼà pêe Izirayɛli tùlugʼá.
3 U pyɛnge ɲyɛ Salɛmu i,
U tatɛɛnge ɲyɛ Siyɔn e.
4 Wani u à zàmpɛɛnbii ŋyahigii nage wogigii kyɛɛgɛ,
mà bâra pi tɔɔnnte yabeɲyi ná kàshikwɔnŋwɔhigii ná kàshikwɔnyaayi saɲyi puni na.
Shelaa
5 Kile,
sìnampe ná pèente na ɲyɛ mu na
mà tòro tèekwombaa ɲaɲyi na.
6 Kàshikwɔnmpiyi yaayi punʼà shwɔ yi na,
pi à sínnʼa ŋwɔ́ɔ,
pi saha sì n-yîri mɛ.
Kuru kàshikwɔnmpege kà ɲyɛ a jà a ku cyɛge yîrige maa kyaa pyi sahaŋki mɛ.
7 Yakuba u Kileŋi,
mu à pi fùguro ke,
shwɔnfeempii ná shwɔyʼà cwo mà círige.
8 Mu à sìi fyagara yaaga.
Mu lùuni ka sàa yîri,
jofoo u sí n-jà n-yyére mu yyaha na yɛ?
9 Mu à tɛ̀ɛn nìɲyiŋi na maa ma yukwɔɔni kyaa jwo,
ɲìŋke shiinbilʼà fyá fo mà fyâha.
10 Mu à yîri si yoge kwɔ̀n,
mpii pi à sílige ɲìŋke na ke,
si pire puni shwɔ.
Shela
11 Sùpyire lùyirini sí n-kɛ̂ɛnŋɛ n-pyi pèenɛ si ntaha mu na.
Sùpyire paanre tʼà shwɔ lùyirini na ke,
mu sí tire pwɔ maye na.
12 Yii a ɲwɔfaayi fáre Kafooŋi Kile yii Kileŋi á,
yii raa yi wwû.
Sùpyire ti ɲyɛ u kwùumpe e ke,
pire puni pi a yakanyi kaan u á.
Fyagara yaaga kʼà sìi ku ki.
13 U maha ɲùŋufembwoyi yàmpeente wwû yʼe,
maa uye pyi fagara yaaga ɲìŋke saanbilʼá.