Wuu Kile kêe u kapyiiŋkii kurugo
75
Mɛceŋkuruŋke yyaha yyére shinŋi.
Nde mɛɛni cèeŋkanni mɛgɛ ɲyɛ:
«Ma hà kakyara pyi mɛ» Azafu mɛɛni là.
Mɛceeni.
2 Kile,
wuu fwù na ɲyɛ mu na,
wuu fwù na ɲyɛ mu na,
mu mɛge mpèeŋi na ɲyɛ wuu ɲwɔyi i,
sùpyire na mu kabwɔgigii kyaa yu.
3 Kafooŋi à jwo:
«Tèni mii à kan ke,
lire ká nɔ,
mii sí yoge kwɔ̀n ntìiŋi funŋke e.
4 Ɲìŋke ná ku sùpyiibii sí n-cyɛ̂ɛnnɛ,
ŋka mii u sí ku tígile n-yyéreŋɛ.
Shelaa
5 Mii sí yi jwo yàampeentefeebilʼá:
“Yii àha yiye pêe mɛ,”
si yi jwo shinpiibilʼá:
“Yii àha yiye dùrugo mɛ.”
6 Yii àha yiye dùrugo nìɲyi na amuni mɛ,
yii yàmpeente jwumbwompe yaha.»
7 Ɲaha kurugo yɛ,
pèente ɲyɛ na yîri canŋafyinmpe e
lire ɲyɛ mɛ,
canŋacwumpe e mɛ,
ti mú ɲyɛ na yîri síwage e mɛ.
8 Kile kanni u ɲyɛ yukyaaŋi,
u maha wà tîrige maa wà dùrugo.
9 Fùɲcwoŋkwuu na ɲyɛ Kafooŋi Kile cye e,
Ɛrɛzɛn sinmpe nizurumpe si ɲyɛ lʼe fo na ŋkânŋi.
U sí pà wu.
Ɲìŋke shinpiibii sí puru bya,
fo si pu bùruburuyi mú bya.
10 Mii wi ke,
mii sí n-kwôro raa myahigii cêe,
mii sí myahigii cêe si Yakuba u Kileŋi kêe.
11 U sí shinpiibii yàmpeente fukanɲyi kyɛɛgɛ,
ŋka shintíibii ɲùɲyi sí n-yîrige.