Kileɲarabage ɲjyàŋi parage
74
Asafu mɛɛni là.
Ei Kile,
ɲaha kurugo mu à wuu wà a yaha takwɔgɔ bàa yɛ?
Mpàkuruŋke mu ɲyɛ na nâha ke,
ɲaha kurugo mu lùunʼà yîri kuru taan yɛ?
2 Funŋɔ cwo ma shiinbii na,
mu à pire mpimu cwɔɔnrɔ fo tèemɔni i mà pyi ma wuu ke.
Yire tùluyi ɲùŋɔ mu à wwû ke,
funŋɔ cwo yi na.
Siyɔn ɲaŋke ku ɲyɛ mu tatɛɛnge ke,
funŋɔ cwo kuru na.
3 Yire cyeyi yʼà kɛ̀ɛgʼa yaha fo tèemɔni i ke,
yîrʼa pa yi wíi,
wuu zàmpɛɛnbilʼà mu cyage niɲcɛnŋke yaayi puni kɛ̀ɛge.
4 Mu zàmpɛɛnbilʼà kwúulo fànha na mu cyage niɲcɛnŋke e.
Pi à pi dìrapoobii pwɔ mà pyi tàafye.
5 Pi à pyi mu à jwo sùpyiibii pi à kaciiyi lwɔ́,
mà kàrʼa sà a taha páanni ke.
6 Pi à kaciiyi ná màritoobii tɛ̀gʼa yaayi nisinaɲyi puni bwɔ̀n a jya jya.
7 Pi à nage le mu cyage niɲcɛnŋke na,
pi à mu tatɛɛnge ɲjini faha.
8 Pi mpyi na ŋko piye funŋʼi:
Wuu sí pi puni shi bò siɲcyan.
Cyeyi i Kile shiinbii mpyi maha piye bínnini kìni i ke,
pi à yire puni súugo.
9 Wuu saha ɲyɛ na tàafyeebii ɲaa mɛ,
Kile tùnntunŋɔ saha ɲyɛ mɛ,
shin mú ɲyɛ a sìi wuu e ŋgemu u à ɲcyii karigii tèekwooni cè mɛ.
10 Ei Kile,
zàmpɛɛnbii sí ŋkwôro raa mu fwɔ́hɔre zà nɔ fo tèni ndire na yɛ?
Mu sí pi yaha pi a mu mɛge kɛ̀ɛge zà nɔ tèni ndire na yɛ?
11 Ɲaha kurugo mu à cû maye na kyaa pyimbaa yɛ?
Ma kàniŋɛ cyɛge yige ma tɛ̀gʼa pi shi bò.
12 Ei Kile,
mu u ɲyɛ mii saanŋi mà lwɔ́ fo tèecyiini i.
Mu u maha sùpyire shwuu ɲìŋke cyeyi puni i.
13 Mu u à suumpe lwɔhe taa
mà pyi shuunni ma sífente funŋke e maa ku funŋɔ yapiyi ɲùmbogigii jya.
14 Mu u à Leviyatana ɲùɲyi jya,
maa u kyaare kan sigeyaayʼà yi pyi yi yalyire.
15 Mu u à lùbilibii múgo,
maa lufoompe pyi pʼi fwu.
Baabii pi mpyi pi mpyi na ware mɛ,
mu à pire puni waha.
16 Canŋke ɲyɛ mu wogo,
numpilage mú ɲyɛ mu wogo,
mu u à canŋaɲyiini ná yiŋke dá.
17 Mu u à ɲìŋke puni tɛgɛni wwû,
mu u à nùŋwɔhe ná bɛ̀nge pyi yi i ɲyɛ.
18 Kafooŋi Kile,
funŋɔ cwo li na,
na zàmpɛɛnbii na mu fwɔ́hɔre,
supyishiŋi sanŋi funŋɔbashiinbii si i mu fare.
19 Ma hà ma mpáannib munaani yaha sigeyapiyi cye e mɛ,
ma hà funŋɔ wwɔ̀ ma shiinbii kanhamawuubii munahigii na tèni là tufiige e mɛ.
20 Funŋɔ cwo ma tunmbyaare na,
ɲaha kurugo yɛ,
kìni numpire cyeyi punʼà ɲî kakuumpyiibii na.
21 Ma hà kanhamafeebii silige wuubii yaha
pi núrʼa kàre mɛ.
Fòŋɔfeebii ná yyefugofeebii yaha pi a ma mɛge kêre.
22 Ei Kile,
yîri maa maye tùbile kɔ̀rɔ.
Funŋɔ cwo li na,
na funŋɔbaashiinbii na mu fare tayahaga bàa.
23 Ma hà funŋɔ wwɔ̀ ma zàmpɛɛnbii kwuuyi na mɛ.
Mpii pi ɲyɛ na mu tùnni ke,
tùnmpe nimbwompe pire ɲyɛ na mpyi ke,
funŋɔ cwo puru na.