Sémeŋi Tanrewuŋi
(Zaburu 73—89)
Shinpiŋi takwɔɔre
73
Asafu mɛɛni là.
Sèeŋi na Kile à ɲwɔ Izirayɛli na,
mpii pi ɲyɛ ná zòvyinre e ke,
u à ɲwɔ pire na.
2 Lire ná li wuuni mú i,
mii tooyi mpyi na ŋko si wwû mii ɲwɔhʼe,
lʼà kwôro numbilere mii tooyi si n-tɛ̂rʼa fworo mii ɲwɔhʼe,
3 ɲaha kurugo yɛ,
yàmpeente feebii yiɲcyɛgʼà jyè mii i,
mii à shinpiibii karigii ɲya cyi i sì yyaha na.
4 Yyefuge ɲyɛ na pi taa pi shìŋi campyagilʼe mɛ,
pi cyeere ɲyɛ yyeɲiŋke e tèrigii puni i.
5 Kawaagii cyi ɲyɛ na sùpyire sannte taa ke,
cyire ɲyɛ na pi taa mɛ,
kanhare ti ɲyɛ na sùpyire sannte taa ke,
tire ɲyɛ na pi taa mɛ.
6 Lire kurugo pi à yàmpeente le piye na mu à jwo kacɛnŋkuuro tʼà le yaaga na ku wiimɛ si ntáan.
Pi à kyampe karigii pyi mu à jwo pi yaciyi vàantiɲyi.
7 Ntìimbaaŋi na fwore pi e,
pi zòmpyagilʼà ɲî sɔ̀nŋɔ peere na.
8 Pi maha sùpyire fwɔ́hɔre,
pi maha jwuŋgampe yu.
Pi jwumpe puni ɲyɛ yàampeenɛ jwumɔ ma rii súuli.
9 Pi maha pi ɲwɔyi leni nìɲyiŋi karigilʼe,
pi jwumpe maha ŋkɛ̀ɛge ɲìŋke yyaha kurugo.
10 Lire kurugo sùpyire punʼà yyaha kɛ̂ɛnŋɛ pi yyére,
maa pi jwumpe bya lwɔhɔ fiige.
11 Pi maha jwo:
«Kile sí n-jà wuu kapyiiŋkii cè pyiŋkanni ndire na yɛ?
Kileŋi u ɲyɛ nìɲyiŋi na ke,
uru sí n-jà nde cè la?»
12 Amuni shinpiibii ɲyɛ,
pi maha mpyi yyeɲiŋke e tèrigii puni i,
là si i bârali pi cyeyaayi na.
13 Lire kurugo mii à na zòmbilini mâra fyìnmpe e tawage e,
maa na cyeyi yige kapegilʼe tawage e.
14 Ɲaha kurugo yɛ,
canŋa maha canŋa yyefuge ɲyɛ mii na.
Ɲyɛ̀gɛ maha ɲyɛ̀gɛ,
mii ɲyɛ kanhare e.
15 Mii nʼa mpyi na yu pi fiige,
mii mpyi sí mu shiinbii ɲwɔhɔ yaha.
16 Tèni i mii mpyi na lire kani caa si li yyaha cè ke,
tire tugure mpyi a bìli mii na,
17 Fo tèni i mii à jyè Kile bage niɲcɛnŋke e ke.
Lire tèni i mii à ta a shinpiŋi takwɔɔre cè.
18 Sèeŋi na,
mu à pi yaha tatɛrɛge e,
mu maha pi cyáan si pi shi bò.
19 Fyagarʼà pi pînniŋɛ,
maa pi shi tò tère niŋkin i.
20 Nde sùpyaŋi maha ɲaa ŋɔɔnge e ke,
u aha ɲɛ̀,
bà lire maha mpînni u na mɛ,
Kafooŋi mu sí tire sùpyire pînniŋɛ amuni.
21 Mà lwɔ́ mii funŋkʼà ɲî cyire karigii na,
fo mà sà nɔ mii zòmbilini na ke,
22 mii à pyi sìɲcoŋɔ,
yákili saha mpyi mii á mɛ.
Mii mpyi funŋɔ bàa,
yaatɔɔgɔ fiige mu yyaha taan.
23 Lire ná li wuuni mú i,
mii sí n-kwôro ná mu i,
mu sí mii cû na kàniŋɛ cyɛge na.
24 Mu sí mii yyaha cû ná ma yákilifente e,
si mii le mu sìnampe e mú.
25 Jo u ɲyɛ mii á nìɲyiŋi na mu kàntugo na yɛ?
Yaage kà tufiige ɲyɛ a táan mii á ɲìŋke na mu kàntugo mɛ.
26 Mii cyeere ná mii zòmbilini fànhe mɛɛ ká ŋkwɔ̀,
Kile u ɲyɛ mii zòmbilini kafaage
ná mii nàzhanŋi tèrigii puni i.
27 Sèe wi,
mpii pi à kàntugo wà mu na ke,
pire wuuni si ŋkɛ̀ɛge.
Mpii pi à mu yaha ke,
mu sí pire shi bò.
28 Mii á,
mà file Kile na,
lire li ɲyɛ mii yyeɲiŋke.
Mii sí Kafooŋi Kile pyi na taŋwɔhɔge
sʼa u kabwɔhigii nimpyiŋkii yu.