Saanŋi ntɛ̀gɛŋi kileɲarage
72
Solomani mɛɛni là.
Ei Kile,
saanŋi taanna,
bà u si mpyi sʼa yoge kyáali u a ntàanni ná mu ntìiŋi i mɛ.
Ma ma ntìiŋi le saanŋi jyaŋi zòmbilini i.
2 Lire ká mpyi,
u sí raa yoge kyáali mu shiinbii ɲuŋʼi ntìiŋi funŋke e,
sʼa fòŋɔfeebii yoge kyáali ná sèeŋi i.
3 Ɲaɲyi sí yyeɲiŋke nɔ sùpyire na,
mpùyi mú sí yyeɲiŋke nɔ pi na ntìiŋi kurugo.
4 U sí tànga kan u shiinbii yyefugofeebilʼá,
si fòŋɔfeebii pyìibii shwɔ,
si pi kyéregefeebii fwòoŋɔ u tooyi ɲwɔhʼi.
5 Ɲyɛ,
mà canŋaɲyiini yaha li i fwore yiŋke si i fwore,
sùpyire sí raa fyáge mu yyaha na tèrigii puni i.
6 Saanŋi sí n-pyi mu à jwo zànhe ku maha ɲcwo yafyinre na ke.
U sí n-pyi mu à jwo zànhe ku maha sùluge maha ɲìŋke ɲîŋɛ ke.
7 Shintíibii sí raa si yyaha na u saanre tèni i,
mà yiŋke yaha ku u fwore,
yyeɲiŋke sí n-sìi mpyi u shiinbii na.
8 U sí n-pyi yaayi puni ɲuŋɔ na,
mà lwɔ́ suumpe lwɔhe kà na,
mà sà nɔ kabɛrɛ na,
mà lwɔ́ Efirati baŋi na,
mà sà nɔ ɲìŋke tɛgɛni na.
9 Siwage shiinbii sí n-pa pi niŋkure sín u taan,
u zàmpɛɛnbii sí pwoore mûgo.
10 Tarisisi saanbii ná suumpe lwɔhe kàntugo saanbii
sí n-pa ma yaaya kan u á,
Seba ná Saba saanbii sí n-pa pi cye yaayi yà kan u á.
11 Saanbii puni sí pi niŋkure sín u yyahe taan,
supyishiŋi puni sí raa báare u á.
12 Ɲaha kurugo yɛ,
fòŋɔfooŋi u ɲyɛ na mɛɛ súu maa u yiri ke,
u sí uru shwɔ,
mà bâra yyefugofeebii pi ɲyɛ tɛgɛfee bàa ke.
13 U sí nùɲaara ta fànhabaafeebii ná fòŋɔfeebii na,
u sí fòŋɔfeebii munahigii shwɔ.
14 U sí pi shwɔ pi cwɔ̀nrɔfeebii ná supyikyanyi na.
Ɲaha kurugo yɛ,
pi munahigii kanʼà waha u na.
15 Kile u shì kan saanŋʼá!
Pi Seba kìni sɛɛnŋi kan u á.
Pi a Kile ɲáare u á tèrigii puni i,
pi raa jwó leni u á canŋa maha canŋa.
16 Yafaayi yi ɲwɔ kìni i fo yi nɔ ɲaɲyi ɲùɲcyage e.
Sùmaɲcahayi yi se
mu à jwo Liban cire.
Sùpyire ti ɲyaha kànɲyi i
mu à jwo sige ɲyɛge.
17 U mɛge ku kwôro fo tèekwombaa,
u mɛge ku mɔ canŋaɲyiini fiige.
Sùpyire tʼa jwóŋi leni tiyʼá ná u mɛge e,
supyishiŋi puni u a ŋko na Kile u u wuuni ɲwɔ.
18 Kafooŋi Kile,
Izirayɛli u Kileŋi u kêe,
uru kanni u maha kakyanhala karigii pyi.
19 U mɛge nisinaŋke ku kêe fo tèekwombaa.
Ɲìŋke puni ku ɲî u sìnampe na.
Amiina!
Amiina!
20 Zhese jyaŋi Dawuda ɲarage nizanŋke ku ɲyɛ ŋke.