Yyecwugofoo kileɲarage
71
Ei Kafooŋi Kile,
mii à mu pyi na taŋwɔhɔge,
ma hà na yaha si sílige mɛ.
2 Mu ntìiŋi funŋke e,
na ɲùŋɔ wwû,
na shwɔ.
Niŋgyiini pɛrɛ ma a lógo na ɲwɔ na,
ma a na shwɔ.
3 Pyi mii kafaage ŋkemu ɲwɔhʼi mii sí raa ŋwɔhɔni ke,
ŋkemu na mii sí n-jà nɔ tèrigii puni i ke.
Mu à li lwɔ́ si mii shwɔ,
ɲaha kurugo yɛ,
mu u ɲyɛ mii kafaage ná mii kàshisulukaaŋke.
4 Ei mii Kileŋi,
na shwɔ shinpiibii na,
na shwɔ shintíimbaabii ná shinkyanyi na.
5 Ɲaha kurugo yɛ,
Kafooŋi Kile,
mu u ɲyɛ mii sɔ̀nŋɔre tatahage.
Mà lwɔ́ mii nimbileere wuŋi,
mii à naye tíiŋɛ mu na.
6 Mà lwɔ́ mii à si ke,
mu u à mii cwɔhɔ.
Mu à yaha mii na mà lwɔ́ mii à si ke.
Ɲùŋɔ na ɲyɛ li na,
mii u a mu kêre tèrigii puni i.
7 Mii à pyi kakyanhala yaaga shinɲyaharʼá,
ŋka mu u ɲyɛ mii taŋwɔhɔge fànhaɲyahaga woge.
8 Mii ɲwɔgʼà ɲî mu mɛge ŋkèeŋi myahigii na,
ku na mu mɛge sìnampe yu canŋa maha canŋa.
9 Ma hà bú na niɲjewuŋi wà n-yaha mɛ,
mii fànhe ka bú ŋkwɔ̀,
ma hà ɲcyé na na mɛ.
10 Ɲaha kurugo yɛ,
mii zàmpɛɛnbii na mii yu,
mpii pi ɲyɛ na mii peeli ke,
pirʼà vùnŋɔ pwɔ mii na.
11 Pi à jwo:
«Kile a cyé u na,
yii cyán u fye e yii i u cû,
ɲaha kurugo yɛ,
shwofoo ɲyɛ u na mɛ.»
12 Ei Kile,
ma hà laaga tɔɔn na na mɛ.
Mii Kileŋi ta fyâa ma a ma a pa na tɛ̀gɛ.
13 Mpii pi ɲyɛ na mii cɛ̂ɛge ke,
pire pi sílige fo pi wuuni li kɛ̀ɛgɛ.
Mpii pi ɲyɛ na kapii caa si mpyi mii na ke,
pire pi sàa sílige fo si pi ɲùɲyi sôgo.
14 Mii wi ke,
mii sɔ̀nŋɔre tatahagʼà ɲwɔ tèrigii puni i,
mii sí là bâra mu ŋkèŋi na.
15 Mii sí raa mu ntìiŋi kyaa yu na ɲwɔge e,
sʼa mu sùpyire zhwoŋi kyaa yu canŋa maha canŋa,
ɲaha kurugo yɛ,
mii ɲyɛ a mu kacɛɛnŋkii nimpyiiŋkii pɛ̀rɛgɛ cè mɛ.
16 Kafooŋi Kile,
mii sí raa mu kakyanhala karigii kyaa yu.
Mu kanni ntìiŋi kyaa mii sí raa yu.
17 Ei Kile,
mu à mii kâla mà mii yaha nàŋkocyɛɛge e,
fo mà pa nɔ niɲjaa na,
mii maha mu kakyanhala karigii kyaa yu.
18 Ɲyɛ,
numɛ mii à lyɛ mà ɲùŋke fíniŋɛ ke,
Ei Kile,
ma hà cye wwû na taan mɛ.
Lire e,
mii sí raa mu fànhe ɲyahaŋi yu numɛ sùpyirʼá
sʼa mu sífente kyaa yu lyeɲwɔɲyi nimpaɲyi punʼá.
19 Ei Kile,
mu ntìiŋʼà kàrʼa sà nɔ fo nìɲyiŋi na,
mu sʼà kakyanhala kabwɔhii pyi.
Ei Kile,
mu ɲcaŋi u ɲyɛ jofoo yɛ?
20 Mu à yyefugo niɲyahaga ná nàvunŋɔ nɔ wuu na sèlʼe.
Mu sí núru shìŋi kan wuu á,
si wuu yige kakyaare kacyewyicuguŋke e.
21 Mu sí pèenɛ taha mii na sahaŋki,
si mii zòŋi taala sahaŋki.
22 Mii Kileŋi,
mii wi ke,
mu ɲwɔmɛfente kurugo,
mii sí fwù kan mu á ná na mpòoŋke e.
Mii sí mu ŋkèeŋi myahigii cêe ná ŋkɔ̀nnɔŋi i,
mu Izirayɛli u Kileŋi niɲcɛnŋʼá.
23 Mii sí myahigii cêe si mu kêe.
Mii ɲwɔseeyi sí funntanga myahigii cêe mu á,
ɲaha kurugo yɛ,
mu à mii munaani shwɔ.
24 Mii ɲwɔge sí raa mu ntìiŋi kyaa yu canŋa maha canŋa,
ɲaha kurugo yɛ,
mpii la ku mpyi si kapii pyi mii na ke,
pirʼà silige fo mà pi ɲùɲyi sôgo.