Yyefugofoo kileɲarage
69
Mɛceŋkuruŋke yyaha yyére shinŋi.
Nde mɛɛni cèeŋkanni mɛgɛ ɲyɛ:
«Cire yafyɛɛnre» Dawuda mɛɛni là.
2 Ei Kile,
na shwɔ,
ɲaha kurugo yɛ,
lwɔhe na ŋko si mii ɲùŋɔ jò.
3 Mii na myîgimi fɛrɛge e,
tɔɔgɔ tacyanga bà ɲyɛ a sìi mɛ.
Mii na ntîri lwɔhe ɲwɔhʼi,
lufoompe na ŋkɛ̀ɛge ná mii i.
4 Mii à kwúulo fo mà sà na fànhe kwɔ̀,
mii ŋkɔ̀ɔngʼà waha fo na mii súuge,
mii Kileŋi,
mii à mu kuro wíi fo mii ɲyiigilʼà pa ŋkànha.
5 Mii kyalʼà pɛn mpimu á ɲùŋɔ bàa ke,
pirʼà ɲyaha mà tòro mii ɲùŋke ɲùɲjwoore na.
Mii zàmpɛɛnbii la ku ɲyɛ si mii bò ke,
pire fànhʼà sàa ɲyaha.
Pi à cwo mii na.
Mii ɲyɛ a ŋkemu lwɔ́ mɛ,
pi à jwo na fo mii i kuru kan pirʼá.
6 Ei Kile,
mu à mii sìɲcompe cè,
mii kapegigii mú sì ɲyɛ a ŋwɔhɔ mu na mɛ.
7 Kafooŋi,
kàshicyagefoo Kile,
mpii pi à pi sɔ̀nŋɔre taha mu na ke,
ma hà pire yaha pi sílige mii kurugo mɛ.
Izirayɛli u Kileŋi,
mpii pi ɲyɛ na mu caa ke,
ma hà pire ɲùɲyi yaha yi sôgo mii kurugo mɛ.
8 Ɲaha kurugo yɛ,
fahantʼà nɔ mii na mu kurugo,
ka silige si mii ɲùŋke sôgo.
9 Mii à pyi shincyi fiige na pyɛngɛ shiinbilʼá.
Mii à pyi nàmpɔnŋɔ fiige na cìnmpyiibilʼá.
10 Mu bage kani na mii súuge naŋkyaan fiige.
Fahante jwumpe mu fahafeebii ɲyɛ na yu ke,
tirʼà pyi mii woro.
11 Mii à mɛɛ sú maa ɲjìŋi yaha,
ka lire si fahana nɔ mii na.
12 Mii à cafubonia le,
ka pi i lire pyi kàfyɛn mɛɛ mii na.
13 Kànhe sùpyire tabinniyi i,
mii kani pi maha yu,
sinmbyaabii si i mii mɛge cêe pi myahigilʼe.
14 Ŋka mii wi ke,
mu mii ɲyɛ na ɲáare Kafooŋi Kile,
numɛ na ɲyɛ tère niɲcɛnnɛ mu u ɲwɔ mii na.
Ei Kile,
na ɲwɔ shwɔ ma cɛ̀nmpe kurugo,
maa na shwɔ ma ɲwɔmɛfente kurugo.
15 Na dìrʼa kò fɛrɛge e,
ma hà núru na yaha si ntîge ku ɲwɔhʼi mɛ.
Na shwɔ na zàmpɛɛnbii,
ná lwɔhe ɲwɔhɔntaanŋi na.
16 Ma hà lufoompe yaha pu kàre na mii i mɛ,
lwɔhe tunŋi kà hà na lyî mɛ,
kwùŋi kacyewyige ɲwɔ kà hà ntò na na mɛ.
17 Na ɲwɔ shwɔ Kafooŋi,
ɲaha kurugo yɛ,
mu cɛ̀nmpe cyiin ɲyɛ mɛ.
Ma ɲùɲaare nimbwɔɔre kurugo,
ma yyahe kɛ̂ɛnŋɛ ma a na wíi.
18 Ma hà kàntugo wà ma biliŋʼá mɛ.
Mii na ɲyɛ yyefuge e,
na ɲwɔ shwɔ fwɔ fwɔ.
19 File na na ma a na shwɔ,
na yige na zàmpɛɛnbii cye e.
20 Pi à mii cyahala,
maa mii sílige maa mii faha pyiŋkanni ndemu na ke,
mu à lire cè
Mu à mii kyéregefeebii puni cè.
21 Pi fahantʼà mii yatanɲyi bò
fo mà mii pyi mii i ya.
Mii mpyi na sɔ̂nŋi wà sí ɲùɲaara ta mii na,
ŋka wà ɲyɛ a ta si ɲùɲaara ta mii na mɛ.
Mii mpyi na sɔ̂nŋi na wà sí n-ta si mii zòŋi taala,
ŋka wà ɲyɛ a ta mɛ.
22 Pi à yasorogo le mii yalyire e,
byagʼà mii ta ke,
ka pi i ɛrɛzɛn sinntanhaga kan mii á.
23 Pi yalyire tayahage ku pyi kànhaŋa pi á,
ku u mpyi cwò fiige ku pi ceveebii cû.
24 Pi ɲyiigii cyi wwɔ̀ fo pi àha raa ɲaa mɛ,
pi tùbuubii pi kûrʼa yaha tèrigii puni i.
25 Ma nàvunŋke kwɔ̀ pi na,
ma lùyirini tîrige pi ɲuŋʼi.
26 Pi tatɛɛnyi yi waha,
sùpya kà sìi mpyi pi bayi i mɛ.
27 Ɲaha kurugo yɛ,
mpii mu à kíbe ke,
pi na pire kyérege,
mu à mpimu bânni ke,
pi na lire kani yu.
28 Pi kapegigii puni tugure tɛ̀gɛ pi ɲuŋʼi,
pi àha sìi nàzhan ta mu zhwoŋi i mɛ.
29 Pi mɛyi bò a yige shìŋi sémɛŋi i,
pi mɛyi kà hà zémɛ shintíibii wuyi shwɔhɔlʼe mɛ.
30 Mii wi ke,
mii na ɲyɛ fòŋɔfoo ná yyefugofoo.
Ei Kile,
cye le na á ma a na cwɔhɔ.
31 Mii sí mɛɛ cêe si Kile mɛge kêe,
mii sí u pêe si fwù kan u á.
32 Lire sí n-táan Kafooŋi á,
mà tòro nupee ɲɛ̀ŋii wu ná fèreye wu sáraga na.
33 Mpii pi à piye tîrige ke,
pire sí lire ɲya si mpyi funntange e.
Yii pi ɲyɛ na Kile caa ke,
Kile u shìtɔɔnwɔ kan yii á.
34 Ɲaha kurugo yɛ,
Kafooŋi na núru kanhamafeebilʼá,
u funŋɔ ɲyɛ na wwùu u shiinbii na mà pi yaha kàsuŋi i mɛ.
35 Nìɲyiiŋi ná ɲìŋke ku u kêe,
mà bâra suumpe lwɔhe ná ku ɲyii yaayi puni na,
36 ɲaha kurugo yɛ,
Kile sí Siyɔn shwɔ,
si Zhuda kànɲyi núruŋɔ si vaanra.
U shiinbii sí núru n-pa n-tɛ̀ɛn yʼe,
si yi pyi pi wuyo sahaŋki.
37 Sùpyire tʼà fworo u bilibilʼe ke,
pire sí kuru cyage ta kɔɔgɔ.
U kyalʼà táan mpimu á ke,
pire sí ku pyi pi tatɛɛngɛ.