Shintíibii sí n-pyi funntange e Kile yyahe taan
68
Mɛceŋkuruŋke yyaha yyére shinŋi.
Dawuda mɛɛni là.
Mɛceeni.
2 Kile u yîri,
u zàmpɛɛnbii pi caala,
u kyalʼà pɛn mpimu á ke,
pire puni pi fê u yyaha na.
3 Pi pînniŋɛ bà naŋgurugo maha mpînni mɛ,
pi ɲa bà nage maha seŋkuro ɲa mɛ.
Shinpiibii pi pînniŋɛ Kile yyahe taan.
4 Ŋka shintíibii sí múguro,
pi sí n-pyi funntange e Kile yyahe taan,
si múguro sèe sèlʼe.
5 Wuu myahii cêe Kile á,
wuu u mɛge ŋkèeŋi myahigii cêe.
Uru ŋgemu u maha ɲahaɲyi pyi u shwɔnyi wòtoroŋi ke,
yii kuro yaa u á.
U mɛgɛ ɲyɛ Kafooŋi Kile,
yii a múgure sèlʼe u yyahe taan.
6 Uru u ɲyɛ círimpii tuŋi maa mpyi leŋkwucyeebii tùpyikɔrɔŋi.
Amuni Kile ɲyɛ u cyage niɲcɛnŋke e.
7 Mpii pi ɲyɛ piye niŋkin ke,
Kile maha pyɛngɛshiin kan pirʼá.
U maha kàsujyiibii yige maa pi funɲyi táan.
Ŋka mpii pi à ɲùŋɔ kyán ke,
pire u tatɛɛnge sí n-pyi tawaga.
8 Ei Kile,
tèni i mu à fworʼa ma shiinbii yyaha cû ke,
tèni i mu à ɲaara pi yyahayyere síwage e ke,
Shelaa
9 ɲìŋkʼà cyɛ̂ɛnnɛ,
ka nìɲyiŋi si zànhe tîrige.
Lirʼà pyi Kile ɲyii na,
Sinayi u Kileŋi,
lirʼà pyi Kile ɲyii na,
Izirayɛli u Kileŋi.
10 Ei Kile,
mu à zànha niɲcɛnŋɛ cyán,
mu shiinbii fànhe ku mpyi a kwɔ̀ ke,
ka lire si fànha le pi e.
11 Mu shiinbilʼà tɛ̀ɛn mu kìni i,
Kile,
mu à lire bégele ma cɛ̀nmpe funŋke e,
kanhamafeebii mɛɛ na.
12 Kafooŋi à ɲwɔɲyɛgɛ jwo,
cyeebii pi ɲyɛ na jwumpe jáare ke,
ka pire si wà piye na mà pyi supyikurumbwɔhɔ.
13 Supyishiŋi sanŋi kàshicyɛyi u saanbilʼà fê,
pi punʼà fê.
Cyeebii pi à kwôro pyɛnge e ke,
ka pire si pi yaayi kulʼa táa táa.
14 Yii à sínni mpàkuruŋke shwɔhɔlʼe,
mà li ta sánmpaanni fukanɲyʼà tò ná wyɛ́rɛfyinŋi i,
li fukanzhire sʼà tò ná sɛɛnŋi yabiliŋi i.
15 Tèni i Siŋi Punifoo Kile à saanbii kɔ̀rʼa caala ke,
kàkuraŋa mpyi na ntîri Zalimɔ ɲaŋke ɲuŋʼi.
16 Kile ɲaŋke nimbwɔhe,
Basan ɲaŋke,
ɲaŋke ku ɲyɛ ná ɲùmbogigii niɲyagilʼe ke,
Basan ɲaŋke.
17 Ɲùmbogigii niɲyahigii ɲyɛ ɲaŋke ŋkemu na ke,
ɲaha na ɲaŋke Kile à cwɔɔnrɔ mà pyi u tatɛɛnge ke,
kuru ɲyipɛɛnni ɲyɛ yii e yɛ?
Nàkaana bàa,
wani Kafooŋi sí n-tɛ̀ɛn fo tèekwombaa.
18 Kile shwɔnyi wotoroyi na ɲyɛ kampwɔhii niɲyagigii.
Kanmpwɔhii niɲyagigii tatɛɛnɲyɛ niɲyahaya yi.
Kafooŋi sí n-pa n-yîri Sinayi ɲaŋke ɲuŋʼi,
si ŋkàre u cyage niɲcɛnŋke e.
19 Mu à dùgo nìɲyiŋi na,
mu à bilii niɲyahamii kulʼa kàre.
Mu à yaaya ta sùpyirʼá,
ali mpii pi à ɲùŋu kyán ke,
bà mu Kafooŋi Kile si mpyi si ntɛ̀ɛn kuru cyage e mɛ.
20 Fwùŋi ɲyɛ Kafooŋi wu canŋa maha canŋa.
Uru u maha wuu tugure lwúu.
Uru u ɲyɛ wuu shwofooŋi Kile.
Shela
21 Wuu Kileŋi u ɲyɛ shwofooŋi Kile.
Kafooŋi Kile u maha wuu shwuu kwùŋi na.
22 Ŋka Kile sí u zàmpɛɛnbii ɲùɲyi jya,
mpii pi ɲyɛ na kapyimbaagii pyi ke,
u sí pire ɲùɲyi ɲùɲjoro wuyi jya.
23 Kafooŋi à jwo:
«Mii sí n-yîri ná pi e Basan e si mpa,
mii sí n-yîri ná pi e fo suumpe lwɔhe ɲwɔhʼi si mpa,
24 bà yii si mpyi si yii tooyi jyé pi sìshyange e,
yii pwuunbii mú si pi nàzhan ta yii zàmpɛɛnbilʼe mɛ.»
25 Ei Kile,
ɲani mu à pyi ke,
pi à li ɲya.
Mii Kileŋi,
mii Saanŋi ɲani u cyage nisinaŋke e.
26 Mɛceebii mpyi yyahayyere,
ka yatinmbwɔɔnbii si ntaha,
pùcempyire si ɲyɛ pi shwɔhɔlʼe na pi pìnŋgaare bwùun.
27 Yii a fwù kaan Kile á yii tabinniyi puni i,
yii mpii pi ɲyɛ Izirayɛli tùluge shiinbii ke,
yii a fwù kaan Kafooŋi á.
28 Tùluyi puni nimbileni li ɲyɛ Bezhamɛ woge ke,
kuru ku ɲyɛ pi yyahayyere,
Ka Zhuda u ɲùŋufeebii ná pi supyikuruŋke si ntaha,
ka Zabulɔn u ɲùŋufeebii ná Nɛfitali u ɲùŋufeebii si ntaha pire fye e.
29 Mu u Kileŋi à jwo na ma fànha le.
Ei Kile,
ma sífente cyêe bà mu à têlʼa li pyi wuu á mɛ.
30 Mà mu yaha ma pêe pêe bage e Zheruzalɛmu ɲuŋɔ na,
saanbii sí n-pa ma yaayi kan mu á.
31 Naŋayaage ku ɲyɛ lwɔhʼe ke,
kuru fùguro,
mà bâra nupyɛhigii ná supyishiŋi sanŋi u nunaare ti maha ma ná wyɛ́rɛfyinŋi i na ma na niŋkure sínni mu taan ke.
Yogʼà táan supyishiŋi ŋgemu á ke,
pire bwɔ̀n a caala.
32 Shinbwoobii pìi na ma mà yîri Misira e,
Etiyopi shiinbilʼà pi cyeyi yîrige maa fî na ma Kile yyére.
33 Ɲìŋke saanre puni,
yii mɛɛ cêe Kile á,
yii ŋkèeŋi myahigii cêe Kafooŋi á.
Shela
34 U à dùgo nìɲyiŋi ɲuŋʼi shwɔgɔ fiige.
Uru nìɲyiŋʼà mpyi wani fo tèecyiini i.
U we u à mɛɛ wà,
u à u mɛɛni fànhaɲyahaga wuuni wà.
35 Yii sìi yii a yi yu na Kile fànhʼà ɲyaha,
u pèentʼà Izirayɛli puni lwɔ́,
u sífente sʼà nìɲyiŋi ɲî.
36 Ei Kile,
mu na ɲyɛ fyagara yaaga ma cyage niɲcɛnŋke e.
Izirayɛli u Kileŋi u maha sífente ná fànhe kaan u shiinbilʼá.
Kile u kêe!