Supyishiŋi puni u fwù kan Kile á
67
Mɛceŋkuruŋke yyaha yyére shinŋi.
Nde mɛɛnʼà yaa ná ŋkɔ̀nnɔŋi i.
2 Ei Kile!
Ɲùɲaara ta wuu na maa jwo lwɔ́ wuu na,
Wuu yaha wuu ma cɛ̀nmpe ɲya wuye shwɔhɔlʼe.
Shelaa
3 bà ɲìŋke sùpyire si mpyi si mu kuni cè,
supyishiŋi puni si li cè na mu u ɲyɛ shwofooŋi mɛ.
4 Ei Kile!
Supyishiŋi u a fwù kaan mu á
supyishiŋi puni u a mu kêre!
5 Sùpyire ti pyi funntange e ti raa myahigii cêe,
na mu à tíi ma fànhe karigii pyiŋkanni i,
na mu u à supyishiŋi yyemɛɛni cû ɲìŋke na.
Shela
6 Ei Kile!
Supyishiŋi u a fwù kaan mu á
Supyishiŋi puni u a mu kêre!
7 Ɲìŋke yafaayʼà ɲwɔ.
Kile,
wuu Kileŋi u jwó lwɔ́ wuu na.
8 Kile u jwó lwɔ́ wuu na,
ɲìŋke cyeyi puni yʼa fyáge u na.