Kilepeente mɛɛni sítaare kurugo
66
Mɛceŋkuruŋke yyaha yyére shinŋi.
Mɛceeni.
Mɛɛni.
Yii a ŋkwúuli funntange na Kile á,
yii puni pi ɲyɛ ɲìŋke na ke.
2 Yii mɛɛ cêe yii i u mɛge sìnampe kyaa jwo.
Yii mɛɛ cêe yii i pèenɛ taha u na.
3 Yii yi jwo Kile á:
«Mu kapyiiŋkii puni na ɲyɛ fyagara kabwɔhii.
Mu fànhe ɲyahaŋi kurugo,
mu zàmpɛɛnbii sí niŋkure sín mu á.
4 Diɲyɛ puni sùpyire sí niŋkure sín mu á,
si mɛɛ cêe si mu kêe,
si mu mɛge sìnampe kyaa jwo.»
Shelaa
5 Yii pa Kile kapyiiŋkii wíi.
Karigii u maha mpyi sùpyirʼá ke,
cyire na ɲyɛ fyagara kabwɔhii.
6 U à suumpe lwɔhe kɛ̂ɛnŋʼa pyi tawaga,
ka pi i ɲaarʼa ku jyiile.
Lire e,
wuu funntangawuubii pi mpyi wani u kabwɔhigii kurugo.
7 U na ɲyɛ ɲùŋufente e tèrigii puni i
u fànhe ɲyahaŋi cye kurugo.
U na supyishiŋi puni kàanmucaa ná u ɲyiigilʼe.
Lire e,
mpii pi à ɲùŋu kyán ke,
pire sì ɲùɲjirire ta mɛ.
Shela
8 Supyishiŋi puni,
yii fwù kan wuu Kileŋi á,
yii i myahigii cêe fànha na yii i u kêe.
9 Uru u à wuu munahigii lo.
Uru u à wuu shwɔ ɲcwuŋi na.
10 Ei Kile,
mu à wuu suguro,
mu à nage tɛ̀gʼa wuu suguro bà wà maha wyɛ́rɛfyin pyi mɛ.
11 Mu à wuu cû kànhaŋke na,
mu à tuguro nimbwɔrɔ tɛ̀gɛ wuu ɲuŋʼi.
12 Mu à wuu zàmpɛɛnbii yaha pi à pi shwɔyi fê a tòro wuu ɲùmbogigii ɲuŋʼi.
Wuu à jyè a fworo nage ná lwɔhe e,
ŋka mu à wuu yige
maa wuu lèŋɛ yyeɲiŋke cyage e.
13 Mii sí n-shà ná sárayi nizogoyi i mu bage e,
si na ɲwɔfaayi wwû mu á,
14 mii yabiliŋi ɲwɔge mpyi a yire ɲjemu fáa mu á
na yyefuge tèni i ke.
15 Mii sí yatɔɔre sìnmɛ woore tà pyi sáraga nizogogo mu á,
si mpàpeebii ná wusunaŋi pyi sáraga mu á.
Mii sí nupyɛhii ná sikapɛrii pyi sáraga mu á.
Shela
16 Yii mpii pi ɲyɛ na fyáge Kile na ke,
yii pa lógo.
Nde Kile à pyi mii á ke,
mii sí lire yyaha jwo.
17 Mii ɲwɔgʼà mɛɛ wà u á mà u yyere,
mii ɲjinʼà u ŋkèeŋi mɛɛni cêe.
18 Ká mpyi mii mpyi a kapii sɔ̂nŋɔ naye funŋʼi maa li ŋwɔhɔ,
Kafooŋi mpyi na sì n-lógo mii ɲwɔ na mɛ.
19 Ŋka ku ke,
Kile à lógo mii ɲwɔ na,
u à u niŋgyiini cyán mii ɲarage na.
20 Kile u kêe,
u ɲyɛ a cyé mii ɲarage na mɛ,
u mú ɲyɛ a mii nàzhan yige u cɛ̀nmpe e mɛ.