Kile à yaa ná ŋkèeŋi i
65
Mɛceŋkuruŋke yyaha yyére shinŋi.
Dawuda mɛɛni là.
Mɛceeni.
2 Ei Kile,
mu à yaa ná ŋkèeŋi i Siyɔn kànhe e.
Ɲwɔfaayi wuu à fáa mu á ke,
wuu sí yire wwû.
3 Mu u maha ɲarayi shwuu ke,
sùpyire puni sí n-pa mu yyére.
4 Mii ntìimbaaŋi tugurʼà dùgo mii na,
ŋka mu maha wuu kapegigii yàfani wuu na.
5 Sùpyire mu à cwɔɔnrɔ maa pi yaha pi à file mu na
bà pi sí mpyi si ŋkwôro mu pyɛnge e mɛ,
pire wuunʼà ɲwɔ.
Wuu sí n-tìn mu pyɛnge yacɛnɲyi i.
Mu pêe pêe babwɔhe kyaa li.
6 Wuu shwofooŋi Kile,
mu à wuu ɲwɔ shwɔ,
ná ma kapyiiŋkii kakyanhala wogigilʼe
mu ntìiŋi kurugo.
Sùpyire puni sɔ̂nŋɔrʼà taha mu na,
ali mpii pi ɲyɛ ɲìŋke tɛgɛni
ná suumpe lwɔhe tɛgɛni na ke.
7 Uru u à ɲaɲyi pyi yʼà tɛ̀ɛn u fànhe cye kurugo.
U puni na ɲyɛ sífenɛ.
8 U maha suumpe lwɔhe tùnmpe fyâhaŋa,
maa lufoompe tùnmpe fyâhaŋa,
maa supyiɲyahare tùnmpe fyâhaŋa.
9 Sùpyire ti ɲyɛ fo ɲìŋke tɛgɛni na ke,
tire punʼà fyá mu kakyanhala karigii yyaha na.
Mu à canŋafworompe shiinbii
ná canŋaɲcwumpe shiinbii ɲî funntange na.
10 Mu maha yaha ɲìŋke na maa zànhe kaan kʼá,
mu maha sàa ku pyi kʼà táan.
Kile baŋʼà ɲî lwɔhe na.
Mu maha sùmaŋi kaan sùpyirʼá,
mu maha ɲìŋke yalʼa yaa lire mɛɛ na.
11 Mu maha sulawyiigii ɲî sèlʼe ná lwɔhe e,
maa puŋkunnuɲyi jya jya.
Mu maha zànhe tɛ̀gʼa cyi pi,
maa sùmafyinre pyi ti i yîri fànha na.
12 Mu kacɛɛnŋkii kurugo,
yyeeni takwɔɔre sí n-táan,
Cyaga maha cyagʼe mu à tòro ke,
yire puni maha ntáan.
13 Yatɔɔre talyige punʼà ɲwɔ síwage e,
ɲaɲyi shwɔ̀hɔŋʼà ɲî funntange na.
14 Sige punʼà ɲî yatompyɛɛre na,
kɛrɛyi punʼà ɲî yafaayi na,
myahigii na ɲcêe cyeyi puni i ná funntange e.