Kile u ɲyɛ shinpiŋi sàrafooŋi
64
Mɛceŋkuruŋke yyaha yyére shinŋi.
Dawuda mɛɛni là.
2 Ei Kile,
na parage lógo.
Na shwɔ na zànmpɛnŋi na,
uru ŋgemu yyaha na mii na fyáge ke.
3 Vùnŋke shinpiibilʼà pwɔ mii na ke,
na shwɔ kuru na,
maa na shwɔ kapyimbaagii pyifeebii tatɛnmpɛɛnre na.
4 Pi ɲjirigilʼà jwɔgɔ kàshikwɔnŋwɔɔ fiige,
pi jwumpe sɔɔnre sʼà pi tàanlii fiige.
5 Pi maha ŋwɔhɔ maa pire tɛ̀gʼa shincɛnŋi ŋwɔn.
Pi maha li pâa u e ali pi ɲyɛ na fyáge mɛ.
6 Pi maha piye sintaa ware kapyimbaagii na,
maa yi jwo piyʼá na pi kànhaɲya ŋwɔhʼa cyán sùpyire na.
Pi maha jwo:
«Jofoo u ɲyɛ na yi ɲaa yɛ?»
7 Kapiini kanni na pi maha sɔ̂nŋi.
Pi maha jwo:
«Wuu à bégelʼa kwɔ̀,
vùnmpwɔɔre wuu à pyi ke,
tʼà sàa ɲwɔ»
Sèeŋi na,
sùpyaŋi funŋkʼà cûgo,
u funŋɔ kani ɲyɛ na cìni mɛ.
8 Ŋka Kile sí tàanlii tɛ̀gɛ pi wà,
pire sí ntíi pi tîrige.
9 Pi yábilimpii jwumpe sí n-cwo pi ɲuŋʼi.
Shin maha shin ká pi ɲya ke,
urufoo sí u ɲùŋke kwôro.
10 Lire ká mpyi,
sùpyire puni sí n-fyá,
pi sí raa Kile kapyiini yu,
pi sí li yyaha cè.
11 Shintíiŋi sí n-pyi funntange e Kafooŋi Kile kurugo,
si u pyi u taŋwɔhɔge.
Zòɲcɛɛnmpii feebii sí ɲùɲjirire ta.